نئی دہلی/ آواز دی وائس
دنیا بھر سے مسلمان اسلام کے پانچ ستونوں میں سے ایک "حج" کی ادائیگی کے لیے سعودی عرب کے شہر مکہ مکرمہ میں جمع ہو رہے ہیں۔ اس بار بھی حج کے دوران عازمین حج کو سخت دھوپ سمیت کئی چیلنجز کا سامنا کرنا پڑے گا۔ اس سال 12 سال سے کم عمر کے بچوں کو حج پر لے جانے پر پابندی عائد کی گئی ہے، جو حالیہ برسوں میں ایک بڑا پالیسی فیصلہ مانا جا رہا ہے۔
اطلاعات کے مطابق سعودی عرب نے یہ فیصلہ بچوں کی سلامتی کے پیش نظر احتیاطاً لیا ہے کیونکہ حج کے دوران بھاری بھیڑ کے باعث چھوٹے بچوں کے لیے ماحول خطرناک ہو سکتا ہے۔
اسلامی تعلیمات کے مطابق بچوں پر بلوغت تک نماز، روزہ جیسے فرائض لاگو نہیں ہوتے، لہٰذا انہیں حج سے مستثنیٰ قرار دیا گیا ہے۔ عازمین کی عمر سے متعلق کوئی سرکاری اعداد و شمار جاری نہیں کیے گئے ہیں، لیکن زیادہ تر افراد کی عمریں 35 سے 64 سال کے درمیان بتائی جا رہی ہیں۔
حج پر اوسطاً چار ہزار سے بیس ہزار امریکی ڈالر تک خرچ آتا ہے، جو سفر کے دنوں، سہولیات، حاجی کے ملک، کرنسی، ٹیکس وغیرہ پر منحصر ہوتا ہے۔ زیادہ تر ترقی پذیر ممالک کے لوگ حج پر آتے ہیں۔ کچھ ممالک میں حج پر جزوی سبسڈی بھی دی جاتی ہے، لیکن اس کے باوجود حج کے اخراجات میں بہت زیادہ کمی نہیں آتی۔
بنگلہ دیش کی حج ایجنسی ایسوسی ایشن کے جنرل سیکریٹری فرید احمد مجومدار نے کہا کہ اس سال ان کے ملک کو 1,27,000 زائرین بھیجنے کی اجازت تھی، لیکن اتنے زائرین نہیں بھیجے جا سکے۔ اس کی سب سے بڑی وجہ ہے چیزوں کی بہت زیادہ قیمتیں۔
پاکستان حکومت نے حج پیکیج کے تحت نرخوں میں کمی کی ہے اور ادائیگی کے طریقۂ کار کو بھی آسان بنایا ہے۔ ایک کسان اور چھوٹے کاروباری زہیر احمد نے بتایا کہ ان کے پاس حج کے لیے مکمل رقم نہیں تھی، اس لیے انہوں نے دسمبر میں ادائیگی شروع کی اور تین قسطوں میں فروری تک مکمل رقم ادا کر دی۔ انہوں نے کہا کہ اگر ایسا نہ ہوتا، تو شاید میں حج کے لیے نہ جا پاتا۔
اسی طرح سعودی عرب نے بھی مقامی زائرین کے لیے آسان قسطوں میں ادائیگی کی سہولت فراہم کی ہے، جس کے تحت بکنگ کے 72 گھنٹے کے اندر 20 فیصد رقم، رمضان کے دوران 40 فیصد اور بقیہ 40 فیصد رمضان کے بعد ادا کرنا ہوتا ہے۔
اگرچہ حج زندگی میں صرف ایک بار فرض ہے، لیکن لوگ پوری زندگی اس کے انتظار میں نہیں رہنا چاہتے۔ چونکہ حج کی گنجائش محدود ہوتی ہے، اس لیے ممالک نے کوٹا مقرر کر رکھا ہے۔
انڈونیشیا اور ملائیشیا جیسے مسلم اکثریتی ممالک میں حج کے لیے کئی دہائیوں تک انتظار کرنا پڑ سکتا ہے۔ انڈونیشیا میں تقریباً 54 لاکھ افراد حج کی باری کا انتظار کر رہے ہیں اور یہ تعداد ہر سال بڑھ رہی ہے۔
اگرچہ ایک سے زیادہ بار حج کرنے پر کوئی اسلامی پابندی نہیں ہے، لیکن کچھ حکومتیں یہ مانتی ہیں کہ اس سے دوسرے افراد کو موقع نہیں مل پاتا، خاص طور پر زیادہ آبادی والے ممالک میں۔
ہندوستان میں ایک سے زیادہ بار حج کرنے پر پابندی ہے اور قومی حج کمیٹی پہلے حج کر چکے افراد کی درخواستیں قبول نہیں کرتی، البتہ بزرگوں یا خصوصی کیٹیگری میں آنے والے افراد کے ساتھ جانے والوں کو استثناء حاصل ہوتا ہے۔
اپریل میں، غیر مجاز حاجیوں پر قابو پانے اور حج کو منظم کرنے کے لیے سعودی حکومت نے 14 ممالک کے لیے قلیل مدتی ویزا جاری کرنا معطل کر دیا، جن میں ہندوستان، پاکستان، بنگلہ دیش، مصر، انڈونیشیا، عراق، نائیجیریا، اردن، الجزائر، سوڈان، ایتھوپیا، تیونس، یمن اور مراکش شامل ہیں۔
ماضی میں لوگ قلیل مدتی ویزا پر سعودی عرب آ کر بغیر سرکاری اجازت کے مکہ مکرمہ میں حج ادا کرتے تھے۔ سعودی وزارت داخلہ نے مئی میں خبردار کیا کہ بغیر درست ویزا کے حج کے دوران مکہ میں داخل ہونے کی کوشش کرنے والے کسی بھی فرد پر 20,000 ریال (تقریباً 5,330 امریکی ڈالر) کا جرمانہ عائد کیا جائے گا۔
