تل ابیب:اسرائیلی وزیرِاعظم بنجمن نیتن یاہو نے اعلان کیا ہے کہ حماس کی قیادت دنیا میں اب کسی بھی جگہ محفوظ نہیں رہی۔ ان کا یہ بیان قطر کے دارالحکومت دوحہ میں حماس کے رہنماؤں پر کیے گئے فضائی حملوں کے بعد سامنے آیا۔

یروشلم میں امریکی سفارت خانے کی ایک تقریب سے خطاب کرتے ہوئے نیتن یاھو نے کہا: وہ دن گزر گئے جب حماس کے رہنما ناقابلِ رسائی سمجھے جاتے تھے۔ اب کسی کو چھوٹ نہیں دی جائے گی۔ انہوں نے واضح کیا کہ یہ کارروائی اسرائیلی شہریوں کے تحفظ اور سات اکتوبر کے حملوں کے ذمہ داروں سے حساب برابر کرنے کے لیے کی گئی۔

ان کا کہنا تھا کہ اگر حماس امریکی صدر ڈونلڈ ٹرمپ کی پیش کردہ جنگ بندی کی تجویز قبول کر لے تو جنگ فوراً ختم ہو سکتی ہے۔ نیتن یاہو کے مطابق اسرائیل اصولی طور پر اس تجویز کو تسلیم کر چکا ہے، اور اس کا آغاز تمام قیدیوں کی فوری رہائی سے ہونا چاہیے۔ اسرائیلی فوج نے دعویٰ کیا ہے کہ فضائی کارروائی براہِ راست اور درست نشانے پر کی گئی، جس کا کوڈ نام "قمۃ النار" رکھا گیا۔

فوجی ترجمان کے مطابق نشانہ بنائے گئے افراد برسوں سے حماس کی سرگرمیوں کی قیادت کر رہے تھے اور وہ اسرائیل کے خلاف جاری جنگ کے اہم ذمہ دار تھے۔ دوسری جانب قطر نے دوحہ کی رہائشی عمارتوں پر فضائی حملے کی مذمت کی ہے، جہاں حماس کے بعض رہنما قیام پذیر تھے۔

تاہم فوری طور پر یہ واضح نہیں ہو سکا کہ کن رہنماؤں کو نشانہ بنایا گیا اور ان کا انجام کیا ہوا۔ نیتن یاہو نے اپنے دفتر سے جاری بیان میں کہا کہ یہ کارروائی مکمل طور پر اسرائیل کی اپنی منصوبہ بندی اور فیصلے کے تحت کی گئی: اسرائیل نے منصوبہ بنایا، اسرائیل نے اسے انجام دیا اور اسرائیل ہی اس کی پوری ذمہ داری قبول کرتا ہے۔