سنگاپور: رئیل اسٹیٹ کے شعبے کی تنظیم کریڈائی کے مطابق مختلف مصنوعات پر جی ایس ٹی کی شرحوں میں کمی سے صارفین کی خریدنے کی صلاحیت بڑھے گی اور آنے والے تہواری سیزن میں رہائشی جائیدادوں کی مانگ میں تیزی آئے گی۔

پورے ہندوستان میں 13,000 اراکین رکھنے والی اس تنظیم نے کہا کہ سیمنٹ اور کچھ دیگر تعمیراتی سامان پر جی ایس ٹی شرحوں میں کمی کے باعث تعمیراتی لاگت گھٹنے کی امید ہے۔ یہ تنظیم یہاں اپنا سالانہ پروگرام کریڈائی-نیٹکان منعقد کر رہی ہے اور اس نے زور دے کر کہا کہ جی ایس ٹی کو معقول بنانے کا فائدہ گاہکوں کو دیا جائے گا۔

البتہ کریڈائی نے یہ بھی جوڑا کہ ایسا کرنے کے لیے ضروری ہے کہ سیمنٹ کمپنیاں اور تعمیراتی مواد کے دیگر تیار کنندگان اپنی قیمتوں میں کمی کریں۔ نئی جی ایس ٹی شرحیں 22 ستمبر سے نافذ ہوں گی۔ کریڈائی کے چیئرمین بومن ایرانی نے جمعرات دیر رات ایک پریس کانفرنس سے خطاب کرتے ہوئے کہا، ’’جی ایس ٹی کو معقول بنانے سے لوگوں میں جوش پیدا ہوا ہے۔

صارفین میں مثبت احساس ہے، جو تہواری سیزن سے پہلے ایک اچھا اشارہ ہے۔‘‘ کریڈائی کے صدر شیکھر پٹیل نے کہا کہ جی ایس ٹی شرحوں میں کمی، عام بجٹ 2025-26 میں ٹیکس کی ترغیبات اور ریزرو بینک آف انڈیا کی ریپو ریٹ میں کمی سے رہائش کی مانگ بڑھے گی۔ انہوں نے کہا کہ 2025 کے پہلے چھ مہینوں میں مکانوں کی قیمتیں تو بڑھی ہیں لیکن فروخت شدہ یونٹس کی تعداد میں کمی آئی ہے۔