نئی دہلی :ایران نے اسرائیل کے خلاف اپنی '12 روزہ جنگ' کے دوران اخلاقی حمایت اور یکجہتی کے پیغامات پر بھارت کے "مہذب اور آزادی سے محبت کرنے والے عوام" کا دلی شکریہ ادا کیا ہے۔ واضح رہے کہ اس جنگ میں اسرائیل کو امریکہ کی پشت پناہی حاصل تھی۔حالیہ فوجی تنازع میں فتح کا دعویٰ کرتے ہوئے بھارت میں ایرانی سفارت خانے نے سیاسی قیادت، عام شہریوں اور کارکنان سمیت ان تمام افراد کا شکریہ ادا کیا جنہوں نے تہران کے ساتھ بھرپور اور کھل کر یکجہتی کا اظہار کیا۔بدھ کے روز سوشل میڈیا پلیٹ فارم ایکس (سابقہ ٹوئٹر) پر ایرانی سفارت خانے نے لکھا۔۔۔۔ صیہونی حکومت اور ریاستہائے متحدہ کی عسکری جارحیت کے خلاف ایرانی قوم کی فتح کے موقع پر، بھارت میں اسلامی جمہوریہ ایران کا سفارت خانہ بھارت کے تمام مہذب اور آزادی پسند عوام ۔ جن میں معزز شہری، سیاسی جماعتیں، معزز ارکان پارلیمنٹ، غیر سرکاری تنظیمیں، مذہبی اور روحانی رہنما، یونیورسٹی کے پروفیسرز، میڈیا کے ارکان، سماجی کارکن اور تمام وہ افراد و ادارے شامل ہیں ۔ کا تہہ دل سے شکریہ ادا کرتا ہے جنہوں نے حالیہ دنوں میں مختلف طریقوں سے عظیم ایرانی قوم کے ساتھ کھل کر اور ثابت قدمی سے یکجہتی کا اظہار کیا۔"

Statement of the Embassy of the Islamic Republic of Iran in New Delhi

On the occasion of the Iranian nation's victory in the face of military aggression by the Zionist regime and the United States, the Embassy of the Islamic Republic of Iran in New Delhi extends its heartfelt…

۔ Iran in India (@Iran_in_India) June 25, 2025

ایران-اسرائیل جنگ اس وقت تھمی جب امریکی صدر ڈونلڈ ٹرمپ نے مداخلت کرتے ہوئے دونوں ممالک کے درمیان جنگ بندی کا اعلان کیا ۔ یہ اعلان اُس وقت سامنے آیا جب امریکی افواج نے ایران میں تین کلیدی نیوکلیائی تنصیبات پر حملے کیے۔ تاہم جنگ بندی کے اعلان کے بعد بھی کئی گھنٹوں تک دشمنی جاری رہی، اور دونوں ممالک نے ایک دوسرے پر میزائل برسائے۔13 جون کو اسرائیل نے تہران کی فوجی اور اہم تنصیبات، بشمول نیوکلیائی سہولیات اور بیلسٹک میزائل فیکٹریوں، پر وسیع حملے شروع کیے، جس سے مشرق وسطیٰ میں کشیدگی میں زبردست اضافہ ہوا۔

ان حالات میں بھارت سے کئی آوازیں اٹھیں ، جن میں سے بیشتر نے ایران کی مکمل حمایت کی، جبکہ حکومت نے کشیدگی کم کرنے کی اپیل کی۔ عام عوام نے بھی سوشل میڈیا پر ایران کے حق میں آواز اٹھائی اور اسرائیل و امریکہ کی پالیسیوں پر تنقید کی۔وزیر اعظم نریندر مودی نے ایرانی صدر مسعود پہزشکیان سے بات کی اور تشویش کا اظہار کیا، جبکہ کانگریس کی سابق صدر سونیا گاندھی سمیت متعدد کانگریسی رہنماؤں نے تہران سے مکمل یکجہتی کا اظہار کیا۔

ایرانی سفارت خانے نے مزید کہا ۔۔۔ جب ایرانی عوام پر قابض صیہونی حکومت کی سفاکانہ فوجی جارحیت جاری تھی، اُس وقت بھارت سے موصول ہونے والے یکجہتی کے پیغامات، اخلاقی حمایت، عوامی بیانات، اور امن دوست سرگرمیوں میں فعال شرکت ہمارے لیے ایک بڑی ہمت افزائی تھی۔ یہ اقدامات اقوام کے بیدار ضمیر اور بین الاقوامی قانون و انصاف سے وابستگی کی غمازی کرتے ہیں۔"

سفارت خانے نے اپنی طویل پوسٹ میں امریکی فضائی حملوں ۔ جو ایران کے نیوکلیائی مراکز فوردو، نطنز اور اصفہان پر کیے گئے ۔ کی سخت مذمت کرتے ہوئے اسے اقوام متحدہ کے منشور، انسانی اصولوں اور بین الاقوامی قانون کی بنیادی اقدار کی سنگین خلاف ورزی قرار دیا۔ اس کے ساتھ ساتھ، ایرانی شہریوں کو بھی سراہا گیا کہ وہ مشکلات کے باوجود اپنی حکومت کے ساتھ ڈٹے رہے۔ایرانی سفارت خانے نے بھارت کے مختلف علاقوں سے ملنے والی مسلسل حمایت کو سراہتے ہوئے کہا کہ اقوام کا اتحاد اور یکجہتی جنگ، تشدد اور ناانصافی کے خلاف ایک مضبوط دیوار ہے۔بیان کے اختتام پر کہا گیا کہ ایک بار پھر ہم عظیم بھارتی قوم کے عوام اور اداروں کی جانب سے دکھائی گئی سچی اور قیمتی حمایت پر دلی شکریہ ادا کرتے ہیں۔

ایران-اسرائیل جنگ کا پس منظر

یہ جنگ دو ہفتے قبل اُس وقت شروع ہوئی جب اسرائیل نے مغربی ایشیا میں موجود ایرانی اہداف کو نشانہ بنایا۔ تل ابیب کا دعویٰ ہے کہ ایران ان دہشت گرد گروپوں (جیسے حماس اور حوثی) کی حمایت کرتا ہے جو اسرائیل سے برسرپیکار ہیں۔دوسری طرف امریکہ نے ایران کے نیوکلیائی پروگرام کی مخالفت میں اسرائیل کی مکمل حمایت کی اور کہا کہ وہ ایران کو نیوکلیائی ہتھیار بنانے سے روکنے کے لیے پرعزم ہے تاکہ دنیا میں امن قائم رہے۔ایران نے ان حملوں کو بلااشتعال جارحیت قرار دیتے ہوئے اسرائیل پر بیلسٹک میزائل اور فضائی حملے کیے۔ کئی روز تک جاری رہنے والی اس دشمنی کے بعد، 23 جون کو امریکہ کی ثالثی سے جنگ بندی پر اتفاق ہوا۔