ویلنگٹن،: بین الاقوامی توانائی ایجنسی (IEA) کے سربراہ فاتح بیرول نے پیر کے روز کہا کہ ایران جنگ کے باعث عالمی معیشت کے سامنے “بہت بڑا خطرہ” پیدا ہو گیا ہے۔ انہوں نے آسٹریلیا کے دارالحکومت کینبرا میں نیشنل پریس کلب سے خطاب کرتے ہوئے کہا، "اگر یہ بحران اسی طرح جاری رہا تو کوئی بھی ملک اس کے اثرات سے محفوظ نہیں رہے گا۔"

بیرول نے کہا کہ مغربی ایشیا کا یہ بحران 1970 کی دہائی کے تیل کے دو بڑے بحرانوں اور روس-یوکرین جنگ کے دوران گیس مارکیٹ پر پڑنے والے اثرات سے بھی زیادہ سنگین ہو سکتا ہے۔ ان کا یہ بیان ایسے وقت میں آیا ہے جب تہران پر پیر کی صبح اسرائیل کی جانب سے حملوں کا سلسلہ تیز ہوا۔ ادھر ایک سینئر امریکی فوجی کمانڈر نے ایران کے شہریوں سے کہا ہے کہ وہ فی الحال محفوظ پناہ گاہوں میں رہیں، جبکہ ایران نے اپنے خلیجی پڑوسی ممالک پر حملے تیز کرنے اور ان کے بجلی گھروں کو نشانہ بنانے کی دھمکی دی ہے۔

بیرول کے مطابق اس پورے خطے میں نو ممالک کے تقریباً 40 توانائی کے مراکز “سنگین یا انتہائی سنگین طور پر متاثر” ہو چکے ہیں۔ انہوں نے یہ بھی کہا کہ وہ یورپ اور ایشیا کی حکومتوں کے ساتھ تیل کے ذخائر فراہم کرنے کے امکانات پر بات چیت کر رہے ہیں۔ انہوں نے کہا، "ہم مارکیٹ کی صورتحال پر نظر رکھیں گے۔ اگر ضرورت پڑی تو ہم یقیناً اقدامات کریں گے، لیکن پہلے ہم حالات کا جائزہ لیں گے اور رکن ممالک کے ساتھ مشاورت کریں گے۔