نئی دہلی: ہندوستان کی بری فوج کے سربراہ جنرل اوپیندر دویدی کو امریکہ کی ریاست پنسلوانیا میں واقع یو ایس آرمی وار کالج کے "انٹرنیشنل ہال آف فیم" میں شامل کر لیا گیا ہے۔ وہ یہ اعزاز حاصل کرنے والے تیسرے بھارتی آرمی چیف ہیں۔ یو ایس آرمی وار کالج کے ممتاز فیلو جنرل دویدی، جنرل وی کے سنگھ اور جنرل بکرم سنگھ کے بعد اس ہال آف فیم میں شامل ہونے والے بھارتی مسلح افواج کے تیسرے سربراہ ہیں۔

بھارتی فوج نے ایکس (سابقہ ٹوئٹر) پر ایک پوسٹ میں کہا کہ آرمی چیف جنرل اوپیندر دویدی نے امریکہ کے آرمی وار کالج، کارلائل بیرکس کا دورہ کیا جہاں انہیں انٹرنیشنل ہال آف فیم میں شامل کیا گیا۔ یہ اعزاز انہیں جنرل وی کے سنگھ اور جنرل بکرم سنگھ کے بعد ملا ہے۔

اپنے دورۂ امریکہ کے دوران جنرل دویدی نے کالج کے اساتذہ اور بین الاقوامی فوجی طلبہ سے قیادت، پیشہ ورانہ عسکری تعلیم اور بدلتی ہوئی سکیورٹی صورتحال پر خطاب بھی کیا۔ اس معزز ادارے کے سابق طالب علم جنرل دویدی نے وہاں کے اہم مراکز کا دورہ کیا اور تعلیمی پروگراموں میں حصہ لیا۔ اس ہفتے کے آغاز میں آرمی چیف نے اپنے دورۂ امریکہ کا آغاز ہوائی سے کیا، جہاں انہیں یونائیٹڈ اسٹیٹس آرمی پیسفک کے ہیڈکوارٹر فورٹ شافٹر میں گارڈ آف آنر پیش کیا گیا۔

انہوں نے یو ایس آرمی پیسفک کے کمانڈنگ جنرل رونالڈ پی کلارک اور دیگر سینئر رہنماؤں سے ملاقات کی۔ اس ملاقات میں بھارت-امریکہ دفاعی تعاون کو مضبوط بنانے اور ہند-بحرالکاہل خطے میں امن و استحکام کے مشترکہ وژن کو آگے بڑھانے پر تبادلۂ خیال کیا گیا۔

بھارتی فوج کے مطابق، آرمی چیف نے اوآہو جزیرے کا بھی دورہ کیا، جہاں انہوں نے تربیتی نظام اور کثیر جہتی آپریشنل تیاریوں کا جائزہ لیا۔ یہ دورہ بھارتی فضائیہ کے سربراہ امر پریت سنگھ اور بحریہ کے سربراہ دنیش ترپاٹھی کے حالیہ دورۂ امریکہ کے فوراً بعد ہوا ہے، جو دونوں ممالک کے درمیان اعلیٰ سطحی فوجی تبادلوں کے تسلسل کو ظاہر کرتا ہے۔