غزہ : اتوار کے روز اسرائیل کے تازہ فضائی حملوں میں کم از کم 38 فلسطینی ہلاک ہو گئے ہیں۔امریکی خبر رساں ایجنسی اے پی کے مطابق، یہ حملے ایسے وقت میں کیے گئے ہیں جب اسرائیلی حکومت نے اپنی مذاکراتی ٹیم قطر بھیج دی ہے، جبکہ وزیر اعظم بنیامین نیتن یاہو امریکہ کے دورے پر روانہ ہو چکے ہیں، جہاں وہ غزہ میں ممکنہ ڈیل پر بات چیت کریں گے۔
نیتن یاہو کی پیر کے روز امریکی صدر ڈونلڈ ٹرمپ سے ملاقات طے ہے، جس میں وہ غزہ میں ابتدائی 60 دنوں کی جنگ بندی کے مجوزہ منصوبے پر تبادلہ خیال کریں گے۔اس منصوبے میں غزہ میں انسانی امداد کی رسائی میں توسیع کے بدلے حماس کی قید میں موجود یرغمالیوں کی جزوی رہائی شامل ہے۔
یاد رہے کہ 7 اکتوبر 2023 کے حملے کے دوران فلسطینی عسکریت پسندوں نے 251 افراد کو یرغمال بنایا تھا، جن میں سے اسرائیلی فوج کے مطابق 27 ہلاک ہو چکے ہیں اور 49 اب بھی غزہ میں قید ہیں۔
ادھر دوحہ میں جنگ بندی مذاکرات کے لیے متحرک ثالثوں نے حماس کو آگاہ کیا ہے کہ بات چیت اتوار سے شروع ہو رہی ہے۔جمعے کو حماس نے ایک بیان میں کہا تھا کہ وہ "فوری اور سنجیدگی سے مذاکرات میں شامل ہونے کے لیے تیار" ہے، تاہم قطر اور مصر کے ثالثوں کے ذریعے موصول ہونے والی امریکی تجاویز پر حماس نے ابھی تک تفصیلی ردعمل نہیں دیا ہے۔
وزیر اعظم نیتن یاہو نے پہلے ہی اعلان کیا تھا کہ وہ ایک مذاکراتی ٹیم قطر بھیج رہے ہیں، مگر ساتھ ہی یہ بھی واضح کیا کہ حماس کی جانب سے پیش کیے گئے بعض مطالبات "ناقابلِ قبول" ہیں۔
نیتن یاہو کے دفتر سے جاری بیان میں کہا گیا کہ:"قطری تجاویز میں جن تبدیلیوں کا مطالبہ حماس کر رہا ہے، وہ اسرائیل کو قبول نہیں۔"اتوار کے روز ایک اسرائیلی اہلکار نے بتایا کہ سیکیورٹی کابینہ نے ہفتے کی رات شمالی غزہ میں امداد بھیجنے کی منظوری دے دی ہے، جہاں شہری خوراک کی شدید قلت کا سامنا کر رہے ہیں۔
اہلکار نے اپنا نام ظاہر نہ کرنے کی شرط پر بتایا کہ انہیں میڈیا سے بات کرنے کی اجازت نہیں، اس لیے وہ مزید تفصیلات نہیں بتا سکتے۔مارچ میں اسرائیل کی جانب سے جنگ بندی کے خاتمے کے بعد شمالی غزہ میں صرف محدود امداد بھیجی جا رہی ہے۔دریں اثنا، یمن میں ایران کے حمایت یافتہ حوثی باغیوں کے ایک ترجمان نے ایک ریکارڈ شدہ پیغام میں دعویٰ کیا کہ گروپ نے رات کو اسرائیل کے بین گورین ایئرپورٹ پر بیلسٹک میزائل داغے۔تاہم اسرائیلی فوج نے کہا کہ تمام میزائلوں کو فضا میں ہی تباہ کر دیا گیا۔
