واشنگٹن: امریکی صنعت کار بل گیٹس نے متوفی فنانسر اور جنسی جرائم میں ملوث مجرم جیفری ایپسٹین کے ساتھ اپنے تعلقات پر وضاحت پیش کی ہے۔ گیٹس فاؤنڈیشن کے ایک ٹاؤن ہال پروگرام میں ملازمین سے خطاب کرتے ہوئے انہوں نے تسلیم کیا کہ ایپسٹین سے ملنا ان کی “بہت بڑی غلطی” تھی۔ اس بات کی تصدیق فاؤنڈیشن کے ترجمان نے کی۔

امریکی اخبار 'دی وال اسٹریٹ جرنل' کی رپورٹ کے مطابق، گیٹس نے ملازمین سے کہا کہ ایپسٹین کے ساتھ وقت گزارنا اور فاؤنڈیشن کے عہدیداروں کو بھی ان ملاقاتوں میں شامل کرنا ایک غلط فیصلہ تھا۔ رپورٹ میں ٹاؤن ہال کی ریکارڈنگ کا حوالہ دیتے ہوئے بتایا گیا کہ گیٹس نے کہا، “میں اپنی غلطی کی وجہ سے جن لوگوں کو اس میں گھسیٹا گیا، ان سے معذرت خواہ ہوں۔

” امریکہ کے محکمہ انصاف (یو ایس ڈپارٹمنٹ آف جسٹس) کی جانب سے جاری کردہ دستاویزات سے معلوم ہوا ہے کہ ایپسٹین کی سزا مکمل ہونے کے بعد بھی گیٹس اور ایپسٹین کی کئی ملاقاتیں ہوئیں۔ ان ملاقاتوں میں گیٹس کی فلاحی سرگرمیوں کو وسعت دینے پر گفتگو کی گئی تھی۔

رپورٹ کے مطابق، گیٹس نے یہ بھی تسلیم کیا کہ ان کے دو روسی خواتین کے ساتھ تعلقات تھے، جن کے بارے میں بعد میں ایپسٹین کو علم ہو گیا تھا۔ تاہم انہوں نے واضح کیا کہ ان معاملات کا ایپسٹین کی متاثرین سے کوئی تعلق نہیں تھا۔ گیٹس نے ملازمین سے کہا، “میں نے کوئی غیر قانونی کام نہیں کیا اور نہ ہی کسی غیر قانونی عمل کا مشاہدہ کیا۔”

محکمہ انصاف کے دستاویزات میں کچھ تصاویر بھی شامل ہیں جن میں گیٹس خواتین کے ساتھ نظر آ رہے ہیں، تاہم ان خواتین کے چہرے دھندلا دیے گئے ہیں۔ گیٹس نے ملازمین کو بتایا کہ یہ تصاویر ایپسٹین کے کہنے پر اس کی معاون خواتین کے ساتھ ملاقات کے بعد لی گئی تھیں۔ انہوں نے زور دے کر کہا، “میں نے کبھی بھی ایپسٹین کی متاثرین کے ساتھ وقت نہیں گزارا۔”