سنگاپور: عالمی سطح پر غیر یقینی صورتحال کے باوجود سنگاپور کی لیبر مارکیٹ نے 2026 کی دوسری سہ ماہی میں بھی ترقی کا سلسلہ برقرار رکھا۔ سنگاپور کی وزارتِ محنت کی جانب سے جمعہ کو جاری ابتدائی تخمینوں کے مطابق مجموعی روزگار میں مسلسل انیسویں سہ ماہی بھی اضافہ ریکارڈ کیا گیا، جبکہ بے روزگاری کی شرح کم اور مستحکم رہی۔ وزارت کے مطابق اپریل سے جون 2026 کے دوران مجموعی روزگار میں 10,700 افراد کا اضافہ ہوا، جو پہلی سہ ماہی کے 9,400 کے مقابلے میں زیادہ ہے اور گزشتہ سال کی اسی مدت میں ہونے والے 10,400 کے اضافے کے تقریباً برابر ہے۔
مقامی افراد کے روزگار میں اضافہ جاری رہا، اگرچہ اس کی رفتار پہلی سہ ماہی کے مقابلے میں کچھ سست رہی۔ یہ اضافہ بنیادی طور پر ضروری خدمات اور سرکاری شعبے میں ہوا۔ دوسری جانب غیر مقامی کارکنوں کے روزگار میں، جو پہلی سہ ماہی میں سست پڑ گیا تھا، دوسری سہ ماہی میں دوبارہ تیزی آئی، جس کی بڑی وجہ تعمیرات اور مینوفیکچرنگ کے شعبے رہے۔ اعداد و شمار کے مطابق جون 2026 میں مجموعی بے روزگاری کی شرح 2.0 فیصد رہی، جو مارچ 2026 کے برابر ہے۔ مقامی باشندوں میں بے روزگاری کی شرح 2.9 فیصد رہی، جبکہ شہریوں کی بے روزگاری 3.1 فیصد سے کم ہو کر 3.0 فیصد رہ گئی۔
دوسری سہ ماہی میں ملازمتوں سے برطرف کیے جانے والوں کی تعداد پہلی سہ ماہی کے 3,830 سے بڑھ کر 4,500 ہو گئی۔ یہ اضافہ بنیادی طور پر بیرونی منڈیوں پر انحصار کرنے والے بعض شعبوں میں کاروباری تنظیمِ نو (ری اسٹرکچرنگ) کے باعث ہوا۔ تاہم وزارت نے کہا کہ برطرفیوں کی مجموعی سطح اب بھی معاشی کساد بازاری کے دوران دیکھی جانے والی سطح سے کافی کم ہے۔
وزارت کے مطابق جون میں مستقبل سے متعلق اشاریوں میں بھی بہتری دیکھی گئی۔ آئندہ تین ماہ میں نئی بھرتیاں کرنے کی توقع رکھنے والی کمپنیوں کا تناسب مئی کے 40.6 فیصد سے بڑھ کر جون میں 43.9 فیصد ہو گیا، جبکہ تنخواہوں میں اضافے کی توقع رکھنے والی کمپنیوں کا تناسب 23.7 فیصد سے بڑھ کر 29.3 فیصد ہو گیا۔ اسی دوران آئندہ ملازمین کو فارغ کرنے کی توقع رکھنے والی کمپنیوں کا تناسب 3.2 فیصد سے کم ہو کر 2.7 فیصد رہ گیا۔
وزارت نے کہا کہ بھرتیوں، تنخواہوں اور برطرفیوں سے متعلق بہتر ہوتے ہوئے رجحانات اس بات کی نشاندہی کرتے ہیں کہ لیبر کی طلب اب بھی مضبوط ہے، اگرچہ بعض شعبوں میں معاشی غیر یقینی صورتحال اور کاروباری تنظیمِ نو کے باعث کمپنیاں احتیاط سے کام لے رہی ہیں۔ حکومت نے کہا کہ وہ افرادی قوت میں تبدیلی، مہارتوں کی ترقی، کیریئر سپورٹ اور ملازمتوں کی ازسرِ نو تشکیل سے متعلق پروگراموں کے ذریعے آجروں اور کارکنوں کی مدد جاری رکھے گی۔ وزارت کی جانب سے 2026 کی دوسری سہ ماہی کی تفصیلی لیبر مارکیٹ رپورٹ ستمبر کے وسط میں جاری کی جائے گی۔
