قاہرہ:کیرالہ اسٹیٹ حج کمیٹی کے چیئرمین اور جامعہ مرکز الثقافۃ السنیہ کے پرو چانسلر و سیکریٹری معروف عالم دین ماہر لسانیات اور تاریخ داں ڈاکٹر حسین محمد ثقافی نے عرب جمہوریہ مصر کی وزارت اوقاف کے زیر اہتمام سپریم کونسل برائے اسلامی امور کی 36ویں بین الاقوامی کانفرنس میں شرکت کی۔

اس عظیم اور تاریخی کانفرنس کی سرپرستی عرب جمہوریہ مصر کے صدر ڈاکٹر عبدالفتاح السیسی نے کی۔ کانفرنس میں مختلف ممالک کے وزراء اعلیٰ حکام نامور علماء مفکرین محققین اور مذہبی و سرکاری اداروں کے نمائندوں نے شرکت کی۔

کانفرنس کا مقصد عالم اسلام کو درپیش عصری فکری اور دعوتی مسائل کے حل پر غور کرنا تھا۔ کانفرنس کا مرکزی موضوع مصنوعی ذہانت پر بڑھتے ہوئے انحصار کے دوران پیشوں کی اخلاقیات اور ان کا مستقبل تھا جو تیز تکنیکی تبدیلیوں کے دور میں اہم چیلنج بن چکا ہے۔

کانفرنس کے مباحثے کے دوران ڈاکٹر حسین محمد ثقافی نے روایتی پیشے اور نئے امکانات کے عنوان سے ایک علمی مقالہ پیش کیا۔ اس مقالے میں انہوں نے قدیم پیشوں کی موجودہ اہمیت اور نئی اخلاقیات و ٹکنالوجی کے تناظر میں ان کی مطابقت پر جامع گفتگو کی۔

کانفرنس کے موقع پر ڈاکٹر حسین محمد ثقافی نے ہندوستان کے مفتی اعظم شیخ ابوبکر احمد کی جانب سے مبارکباد بھی پیش کی۔ اس عمل کے ذریعے عالمی اسلامی مکالمے میں ہندوستان کی فعال علمی شرکت کو اجاگر کیا گیا۔