واشنگٹن: نیویارک کی ایک وفاقی عدالت نے بدھ کو اپنے حکم میں کہا کہ وہ کمپنیاں جنہوں نے پچھلے ماہ سپریم کورٹ کی جانب سے منسوخ کیے گئے درآمدی محصول کی ادائیگی کی تھی، اب رقم کی واپسی (ریفنڈ) کی حقدار ہیں۔

اس کو ٹرمپ انتظامیہ کے لیے ایک بڑی شکست کے طور پر دیکھا جا رہا ہے۔ امریکی بین الاقوامی تجارتی عدالت کے جج رچرڈ ایٹن نے لکھا کہ ریکارڈ پر موجود تمام درآمد کنندگان سپریم کورٹ کے اس فیصلے سے فائدہ اٹھانے کے حقدار ہیں، جس کے تحت صدر ڈونلڈ ٹرمپ کی جانب سے پچھلے سال بین الاقوامی ہنگامی اقتصادی طاقت کے قانون (IEEPA) کے تحت عائد کیے گئے بھاری درآمدی محصولات کو منسوخ کر دیا گیا تھا۔

سپریم کورٹ نے یہ پایا تھا کہ ہنگامی اختیارات والے قانون کے تحت یہ محصولات غیر آئینی تھے۔ عدالت نے واضح کیا کہ صدر یکطرفہ طور پر محصولات مقرر یا تبدیل نہیں کر سکتے، کیونکہ ٹیکس لگانے کا اختیار واضح طور پر کانگریس کے پاس ہے۔ جج ایٹن نے اپنے فیصلے میں لکھا کہ وہ صرف IEEPA محصولات کی واپسی سے متعلق مقدمات کی سماعت کریں گے۔ یہ فیصلہ ریفنڈ کے عمل کے حوالے سے وضاحت فراہم کرتا ہے، جس کا ذکر سپریم کورٹ نے اپنے 20 فروری کے فیصلے میں نہیں کیا تھا۔