بیجنگ/اسلام آباد:چین اور پاکستان نے مغربی ایشیا میں جاری تنازع کے خاتمے کے لیے پانچ نکاتی امن تجویز پیش کی ہے، جس میں خلیجی خطے میں امن و استحکام کی بحالی اور آبنائے ہرمز سے جہازوں کی محفوظ آمدورفت کو یقینی بنانے کی اپیل کی گئی ہے۔ یہ تجویز پاکستان کے نائب وزیر اعظم اور وزیر خارجہ اسحاق ڈار کے ایک روزہ دورۂ بیجنگ کے دوران چین کے وزیر خارجہ وانگ یی کے ساتھ ملاقات کے بعد پیش کی گئی۔

دونوں رہنماؤں نے خلیج اور مغربی ایشیا کی صورتحال کا جائزہ لیا، جبکہ ڈار نے وانگ کو ترکیہ، مصر اور سعودی عرب کے وزرائے خارجہ کے ساتھ اپنی حالیہ بات چیت کے بارے میں آگاہ کیا، جس کا مقصد امریکہ اور ایران کے درمیان جاری کشیدگی کو ختم کرنے کے لیے مذاکرات کو فروغ دینا تھا۔

ملاقات کے بعد جاری مشترکہ بیان میں دونوں ممالک نے پانچ نکات پر مشتمل تجویز پیش کی، جن میں فوری طور پر جنگ بندی، جلد از جلد امن مذاکرات کا آغاز، غیر فوجی اہداف کا تحفظ، بحری راستوں کی حفاظت اور اقوام متحدہ کے منشور کی بالادستی کو برقرار رکھنا شامل ہے۔ بیان میں کہا گیا کہ چین اور پاکستان نے فوری طور پر دشمنی ختم کرنے اور تنازع کو مزید پھیلنے سے روکنے کی اپیل کی ہے، اور متاثرہ علاقوں میں انسانی امداد کی اجازت دینے پر زور دیا ہے۔

انہوں نے جلد از جلد امن مذاکرات شروع کرنے کی ضرورت پر بھی زور دیا۔ بیان میں کہا گیا کہ ایران اور خلیجی ممالک کی خودمختاری، علاقائی سالمیت، قومی آزادی اور سلامتی کا احترام کیا جانا چاہیے، اور تنازعات کے حل کے لیے مکالمہ اور سفارت کاری ہی واحد قابل عمل راستہ ہے۔ دونوں ممالک نے اس بات پر بھی زور دیا کہ جنگ کے دوران عام شہریوں کے تحفظ کے اصولوں کی پابندی کی جائے۔

مشترکہ بیان میں کہا گیا کہ تمام فریقین شہریوں اور غیر فوجی اہداف پر حملے فوری طور پر بند کریں، بین الاقوامی انسانی قوانین کی مکمل پاسداری کریں، اور توانائی، پانی صاف کرنے کے پلانٹس، بجلی گھروں اور پرامن جوہری تنصیبات جیسے اہم بنیادی ڈھانچے پر حملے روکیں۔

چین اور پاکستان نے بحری راستوں کے تحفظ کی اہمیت پر بھی زور دیا اور آبنائے ہرمز کو عالمی تجارت اور توانائی کی ترسیل کے لیے نہایت اہم گزرگاہ قرار دیا۔ بیان کے مطابق، دونوں ممالک نے تمام فریقین سے مطالبہ کیا کہ آبنائے ہرمز میں پھنسے جہازوں اور عملے کی حفاظت یقینی بنائی جائے، تجارتی جہازوں کو محفوظ راستہ فراہم کیا جائے اور معمول کی آمدورفت جلد بحال کی جائے۔

آخر میں، انہوں نے کشیدگی کم کرنے کے لیے اقوام متحدہ کے منشور کی بالادستی برقرار رکھنے پر زور دیا۔ اس سے قبل پاکستان کے دفتر خارجہ نے کہا تھا کہ اسلام آباد اور بیجنگ کے درمیان اسٹریٹجک شراکت داری ہے، جو علاقائی اور عالمی امور پر قریبی رابطے اور مشاورت پر مبنی ہے۔

چین روانگی سے پہلے اسحاق ڈار نے اسلام آباد میں سعودی عرب، ترکیہ اور مصر کے وزرائے خارجہ کے ساتھ چار فریقی اجلاس میں شرکت کی۔ اس دوران انہوں نے وانگ یی سے ٹیلیفون پر بات چیت اور پاکستان میں چین کے سفیر سے ملاقاتوں کے ذریعے رابطہ برقرار رکھا۔ ادھر چین نے کہا کہ اس کے تیل بردار تین جہاز آبنائے ہرمز عبور کر چکے ہیں، اور اس عمل میں تعاون کرنے والے متعلقہ فریقین کا شکریہ ادا کیا۔

چینی وزارت خارجہ کی ترجمان ماؤ ننگ نے ایک پریس کانفرنس میں کہا کہ متعلقہ فریقین کے تعاون سے یہ جہاز کامیابی سے گزرے۔ انہوں نے کہا کہ آبنائے ہرمز عالمی تجارت اور توانائی کی ترسیل کے لیے ایک نہایت اہم راستہ ہے، اور چین خطے میں فوری جنگ بندی اور امن کی بحالی کا حامی ہے۔

امریکی پابندیوں کے باوجود چین کئی سالوں سے ایرانی تیل کا بڑا درآمد کنندہ رہا ہے۔ اطلاعات کے مطابق ایران اپنے قریبی اسٹریٹجک تعلقات کی بنیاد پر چینی جہازوں کو گزرنے کی اجازت دے رہا ہے۔ امریکہ اور اسرائیل کی جانب سے ایران پر حملوں کے بعد چین مسلسل تمام ممالک سے فوجی کارروائیاں فوری طور پر روکنے کی اپیل کر رہا ہے۔