آواز دی وائس

نیپال میں ہونے والے پرتشدد احتجاج کے دوران اب چین کی بھی رائے سامنے آئی ہے۔ شِنہوا نیوز کے مطابق بدھ کو چین نے نیپال کے تمام فریقین سے درخواست کی ہے کہ وہ ملکی مسائل کو مناسب طریقے سے حل کریں اور سماجی نظم و استحکام بحال کریں۔ قابل غور بات یہ ہے کہ چین کی طرف سے جاری بیان میں سابق وزیر اعظم کے پی شرما اولی کا نام تک نہیں لیا گیا۔

چینی وزارت خارجہ کے ترجمان کا بیان

چینی وزارت خارجہ کے ترجمان لن جیان نے ایک میڈیا بریفنگ میں نیپال کی صورتحال پر تبصرہ کرتے ہوئے کہا کہ چین اور نیپال کے درمیان روایتی طور پر دوستانہ ہمسایہ تعلقات رہے ہیں۔ ہمیں امید ہے کہ نیپال میں تمام طبقے ملکی مسائل کو مناسب طریقے سے سنبھالیں گے اور سماجی نظم و علاقائی استحکام کو جلد از جلد بحال کریں گے۔

لن جیان نے اولی کا نام نہیں لیا

نیپال میں سوشل میڈیا پابندی کے خلاف جین -زی تحریک کی وجہ سے کے پی شرما اولی کو وزیراعظم کے عہدے سے مستعفی ہونا پڑا۔ چینی وزارت خارجہ کے ترجمان لن جیان نے میڈیا بریفنگ کے دوران اولی کے استعفے پر کوئی تبصرہ نہیں کیا۔ اولی کو چین نواز رہنما مانا جاتا ہے اور انہوں نے چین کے ساتھ نیپال کے اسٹریٹجک تعلقات کو مضبوط کرنے میں اہم کردار ادا کیا ہے۔

نیپال میں پرتشدد احتجاج

بدعنوانی اور سوشل میڈیا پر حکومت کی پابندی کے خلاف پیر کو جین -زی تحریک کے دوران پولیس کی کارروائی میں کم از کم 19 افراد ہلاک ہوئے۔ ان ہلاکتوں کے بعد احتجاج شدید ہوگیا اور وزیر اعظم اولی نے منگل کو اپنے عہدے سے استعفیٰ دے دیا۔ حالات اتنے خراب ہوگئے تھے کہ مظاہرین نے پارلیمنٹ، صدر کے دفتر، وزیر اعظم کے رہائش گاہ، سرکاری عمارتوں، سیاسی جماعتوں کے دفاتر اور سینئر رہنماؤں کے گھروں میں آگ لگا دی۔ فی الحال نیپال میں حالات کو قابو میں کرنے کے لیے فوج کو آگے آنا پڑا ہے۔