کینبرا، 9 جون (دی کنورسیشن):
7 اکتوبر 2023 کو، 1000 سے زائد حماس جنگجوؤں نے جنوبی اسرائیل پر دھاوا بول دیا، جہاں انہوں نے 1200 مردوں، عورتوں اور بچوں کو قتل کیا اور 250 افراد کو اغوا کر کے غزہ لے گئے۔ یہ ہولوکاسٹ کے بعد یہودیوں کا سب سے ہلاکت خیز قتل عام تھا۔اسی دن، اسرائیلی وزیرِ اعظم بنیامین نیتن یاہو نے قوم سے کہا: "اسرائیل حالتِ جنگ میں ہے۔اسرائیلی دفاعی افواج(IDF) نے فوراً فوجی کارروائی کا آغاز کیا تاکہ یرغمالیوں کو رہا کیا جا سکے اور حماس کو شکست دی جا سکے۔ تب سے اب تک، 54,000 سے زائد فلسطینی مارے جا چکے ہیں، جن میں اکثریت عورتوں اور بچوں کی ہے۔اسرائیل نے بین الاقوامی قانون کے تحت اپنے ردعمل کو جائز قرار دیا ہے، کیونکہ ہر ملک کو "اپنے دفاع کا فطری حق" حاصل ہے، جیسا کہ نیتن یاہو نے 2024 کے آغاز میں کہا تھا۔
یہ حق اقوام متحدہ کے چارٹر 1945 کی دفعہ 51 میں درج ہے:
موجودہ چارٹر میں کوئی بھی شق اقوامِ متحدہ کے کسی رکن کے انفرادی یا اجتماعی فطری حقِ دفاع کو متاثر نہیں کرتی اگر اس پر مسلح حملہ کیا جائے۔جنگ کے آغاز میں بہت سے ممالک نے تسلیم کیا کہ اسرائیل کو اپنے دفاع کا حق حاصل ہے، لیکن یہ بھی واضح کیا کہ یہ دفاع بین الاقوامی انسانی قانون کے مطابق ہونا چاہیے۔تاہم، اکتوبر 7 کے حملے کے 20 ماہ بعد، بنیادی قانونی سوالات ابھرے ہیں،کیا اسرائیل لامحدود مدت تک دفاع کے نام پر جنگ جاری رکھ سکتا ہے؟یا اب یہ ایک جارحیت بن چکی ہے جو فلسطینیوں کے خلاف کی جا رہی ہے؟
بین الاقوامی قانون میں دفاعِ خودی(Self-defence)
دفاعِ خودی کا بین الاقوامی قانون میں طویل پس منظر ہے۔
1837 میں امریکہ کے ایک بحری جہاز دی کیرولین کے خلاف برطانوی کارروائی پر ہونے والے سفارتی تبادلے میں دفاعِ خودی کے اصول سامنے آئے۔ دونوں ممالک نے اس بات پر اتفاق کیا کہ دفاعِ خودی کا استعمال "غیر معقول یا حد سے زیادہ" نہیں ہونا چاہیے۔دوسری جنگ عظیم میں اتحادی طاقتوں نے جرمن اور جاپانی جارحیت کے خلاف دفاعِ خودی کے اصولوں پر زور دیا۔اصل میں یہ حق ریاستی حملے کے ردعمل تک محدود تھا، لیکن 2001 کے نائن الیون حملوں کے بعد اسے غیر ریاستی عناصر جیسے القاعدہ کے حملوں پر بھی لاگو کیا گیا۔اسرائیل ایک جائز، تسلیم شدہ ریاست ہے اور اقوامِ متحدہ کا رکن ہے، اس لیے اسے اپنے دفاع کا حق حاصل ہے ۔ چاہے یہ حملے ہمسایہ ممالک یا غیر ریاستی عناصر جیسے حماس، حزب اللہ یا یمن کے حوثی باغیوں کی طرف سے ہوں۔لیکن یہ حق لا محدود نہیں۔ اس پر دو اصول لاگو ہوتے ہیں: ضرورت(necessity)اور تناسب(proportionality)۔
تناسب کا جائزہ
بین الاقوامی عدالتِ انصاف نے حالیہ برسوں میں دفاع کے اصول میں تناسب کی اہمیت کو تسلیم کیا ہے۔بین الاقوامی قانون کے مطابق، تناسب کا اطلاق صرف حملے کے فوری بعد نہیں بلکہ پوری جنگ کے دوران ہوتا ہے۔یہ درست ہے کہ قانون کے مطابق جنگ اس وقت تک جاری رہ سکتی ہے جب تک حملہ آور ہتھیار نہ ڈال دے، لیکن اس کا مطلب یہ نہیں کہ مخالف کی پوری زمین کو تباہ کر دیا جائے۔تناسب کا اصول عام شہریوں کو بھی تحفظ دیتا ہے۔ فوجی کارروائی صرف حملہ آور قوتوں کے خلاف ہونی چاہیے، نہ کہ عام شہریوں کے خلاف۔اسرائیل نے اگرچہ حماس کے جنگجوؤں کو نشانہ بنایا ہے، خاص طور پر وہ جنہوں نے اکتوبر 7 کے حملے کی منصوبہ بندی کی، لیکن ان حملوں کے نتیجے میں فلسطینی شہریوں کی بڑی تعداد میں ہلاکت ہوئی ہے۔لہٰذا، 20 ماہ سے جاری اس جنگ میں بے تحاشا شہری ہلاکتیں، قحط کی معتبر اطلاعات، اور غزہ کے شہروں کی تباہی اس بات کی طرف اشارہ کرتی ہے کہ اسرائیل کا دفاع کا دعویٰ اب غیر متناسب ہو چکا ہے۔
کیا یرغمالیوں کی بازیابی دفاع کا حصہ ہے؟
اسرائیل یہ بھی کہہ سکتا ہے کہ وہ یرغمالیوں کو چھڑانے کے لیے دفاع کا حق استعمال کر رہا ہے، لیکن یہ جواز بین الاقوامی قانون میں متنازع ہے۔اسرائیل نے 1976 میں یوگنڈا کے عنتیبے ہوائی اڈے سے 103 یرغمالیوں کو بازیاب کروایا تھا۔ لیکن موجودہ قانون میں اس کی بہت کم مثالیں ملتی ہیں اور کوئی عالمی اتفاقِ رائے موجود نہیں ہے۔غزہ میں جنگ کی وسعت، مدت، اور شدت اس بات کی اجازت نہیں دیتی کہ اسے محض یرغمالیوں کی بازیابی کہا جائے۔ اس کا مقصد حماس کو مکمل طور پر ختم کرنا بھی ہے۔لہٰذا، یرغمالیوں کی بازیابی کو دفاع کے طور پر پیش کرنا، موجودہ جنگ کے لیے مناسب قانونی جواز نہیں بن پاتا۔
کیا یہ جارحیت(Aggression) ہے؟
اگر اسرائیل اب دفاعِ خودی کا جواز نہیں پیش کر سکتا تو کیا اس کے اقدامات بین الاقوامی قانون کی رو سے جارحیت (Aggression) تصور ہوں گے؟اسرائیل کہہ سکتا ہے کہ وہ غزہ میں ایک قابض طاقت(occupying power) کے طور پر سیکیورٹی آپریشن کر رہا ہے۔بین الاقوامی عدالتِ انصاف نے پچھلے سال کہا تھا کہ اسرائیل غزہ میں غیر قانونی قبضے میں ملوث ہے، لیکن یہ فیصلہ اکتوبر 7 کے بعد کے حالات پر لاگو نہیں ہوتا۔اسرائیل نے اگرچہ پورے غزہ پر جسمانی قبضہ نہیں کیا، لیکن وہاں وہ مؤثر کنٹرول رکھتا ہے، جو کہ قانونی طور پر قبضے کے مترادف ہے۔لیکن اسرائیلی فوج کی کارروائیاں صرف ایک قابض طاقت کے محدود سیکیورٹی آپریشن سے کہیں بڑھ کر ہیں۔ یہ مکمل مسلح تنازع کی صورت اختیار کر چکی ہیں۔اگر کوئی اور قانونی جواز نہ ہو، تو اسرائیل کی موجودہ کارروائیاں بین الاقوامی قانون کے تحت جارحیت کے زمرے میں آتی ہیں۔اقوام متحدہ کا چارٹر اور انٹرنیشنل کریمنل کورٹ کا روم اسٹیٹیوٹ جارحیت کو غیر قانونی قرار دیتا ہے، جب تک کہ اس کا قانونی جواز نہ ہو۔
جارحیت کی صورتیں جیسے:
جیسے عالمی برادری نے روس کی یوکرین پر جارحیت کو مسترد کیا، کیا اب وہی موقف اسرائیل کے خلاف بھی اپنائے گی؟(دی کنورسیشن)
