کابل: افغانستان اور پاکستان کے درمیان بڑھتے تناؤ کے دوران دوحہ میں ہونے والی ایک میٹنگ میں سیزفائر کا اعلان کیا گیا ہے۔ اس موقع پر طالبان کے نائب وزیر داخلہ مولوی محمد نبی عمری نے پاکستان کو سخت انتباہ جاری کرتے ہوئے کہا ہے کہ اگر افغانستان نے پاکستانی فوج کو جارح قرار دے دیا، تو انہیں بھارتی سرحد تک دھکیل دیا جائے گا۔

سی این این-نیوز 18 کے مطابق، مولوی عمری نے پاکستانی فوج کو براہ راست وارننگ دیتے ہوئے کہا: "اگر افغان قبائل اور قوم آپ کو دینی حکم کی بنیاد پر حملہ آور قرار دے دیں، تو میں اللہ کی قسم کھاتا ہوں، آپ کو بھارتی سرحد تک بھی **تحفظ حاصل نہیں ہوگا۔" مولوی محمد نبی عمری نے اسلام آباد کے عوام اور فوجی قیادت پر شدید تنقید کی۔

انہوں نے کہا کہ پاکستانی فوجی حکومت ہر کام غیروں کی مرضی سے کرتی ہے۔ انہوں نے مزید کہا کہ "آپ نے حال ہی میں شہباز شریف کو ڈونلڈ ٹرمپ سے خوشامدی لہجے میں بات کرتے ہوئے دیکھا ہوگا۔"

مولوی عمری نے ممکنہ علاقائی دعووں کی طرف بھی اشارہ کرتے ہوئے کہا کہ: "موجودہ حالات یہ ظاہر کرتے ہیں کہ ڈورنڈ لائن کے اُس پار کے علاقے، جو کبھی افغانستان نے کھو دیے تھے، اب وہ دوبارہ افغان سرزمین میں شامل ہو سکتے ہیں۔" یہ دھمکی ایسے وقت میں سامنے آئی ہے جب افغانستان-پاکستان سرحد پر کشیدگی عروج پر ہے۔

حال ہی میں سرحد پار جھڑپوں کے دوران دونوں ممالک کے درجنوں فوجی اور عام شہری ہلاک ہوئے۔ کابل نے الزام لگایا ہے کہ اسلام آباد نے 48 گھنٹے کے جنگ بندی معاہدے کی خلاف ورزی کی ہے، جس کے تحت تقریباً ایک ہفتے سے جاری لڑائی پر عارضی طور پر روک لگائی گئی تھی۔

قطر کی وزارت خارجہ کی جانب سے دوحہ میں دونوں ممالک کے نمائندوں کے درمیان ایک میٹنگ منعقد کی گئی، جہاں پاکستان اور افغانستان نے فوری جنگ بندی پر اتفاق کیا۔ اس کے بعد طے پایا کہ اگلی ملاقات ترکی کے شہر استنبول میں ہوگی۔