پٹنہ: بہار کی بانکی پور اسمبلی نشست پر ہونے والے ضمنی انتخاب کے لیے بھارتیہ جنتا پارٹی (بی جے پی) نے منگل کو اپنی یوا مورچہ کے رہنما ابھیشیک کمار کو امیدوار نامزد کر دیا۔ یہ نشست پارٹی کے قومی صدر نتن نبین کے استعفے کے بعد خالی ہوئی تھی۔
نئی دہلی میں بی جے پی کے مرکزی دفتر سے جاری بیان کے مطابق، پارٹی کی مرکزی انتخابی کمیٹی نے ابھیشیک کمار کے نام کی منظوری دے دی ہے۔ پارٹی ذرائع کے مطابق، "بنٹی" کے نام سے مشہور ابھیشیک کمار اس وقت بی جے پی یوا مورچہ، بہار کے ریاستی نائب صدر ہیں۔
بانکی پور اسمبلی ضمنی انتخاب میں پرشانت کشور نے اپنی جماعت جن سوراج کی جانب سے میدان میں اترنے کا اعلان کیا ہے، جبکہ راشٹریہ جنتا دل (آر جے ڈی) نے ریکھا گپتا کو اپنا امیدوار بنایا ہے۔ ریکھا گپتا گزشتہ سال ہونے والے اسمبلی انتخابات میں رنر اپ رہی تھیں۔
