ڈھاک: بنگلہ دیشی وزارت خارجہ نے کہا ہے کہ بنگلہ دیش اور پاکستان نے تعلقات مزید مضبوط بنانے پر اتفاق کرلیا، اسحاق ڈار اور مشیرخارجہ نے ڈھاکہ میں ملاقات کی تفصیلات کے مطابق وزارت خارجہ بنگلہ دیش نے پاکستان اور بنگلہ دیش کے مضبوط تعلقات پر بیان جاری کیا ہے، ترجمان وزارت خارجہ بنگلہ دیش نے کہا کہ نائب وزیراعظم اسحاق ڈار اور مشیرخارجہ بنگلہ دیش نے ڈھاکہ میں ملاقات کی، باہمی ملاقات میں تعاون کو مزید مضبوط کرنے کے عزم کا اعادہ کیا گیا۔

وزارت خارجہ بنگلہ دیش نے کہا کہ پاکستان اور بنگلہ دیش کے درمیان 6 دو طرفہ معاہدوں پر دستخط کیے گئے، ڈھاکہ میں ہونے والے مذاکرات دو طرفہ تعلقات میں اہم پیشرفت ہیں۔

ترجمان نے کہا کہ پاکستان اور بنگلہ دیش نے مختلف شعبوں میں تعاون بڑھانے پر اتفاق کیا، اعلیٰ سطحی ملاقات میں خطے کی صورتحال اور باہمی دلچسپی کے امور پر گفتگوکی گئی، دونوں ملک اپنے عوام کی بہتری کےلیے دوطرفہ تعلقات مزید مضبوط کریں گے۔

اعلامیہ میں کہا گیا کہ نائب وزیراعظم اسحاق ڈار نے بنگلہ دیش کے ہم منصب کی دعوت پر دورہ کیا، گرمجوشی اور نیک نیتی سے دوطرفہ اجلاس کا انعقاد کیا گیا

وزارت خارجہ بنگلہ دیش نے مزید کہا کہ نائب وزیراعظم کا دورہ، ملاقاتیں دونوں ملکوں میں برادرانہ تعلقات کی عکاس ہیں، خطے اور عالمی صورتحال پر باہمی تعاون سمیت دیگر امور پر گفتگوکی گئی۔

اعلامیہ میں کہا گیا کہ تجارت، زراعت، تعلیم، صحت، توانائی سمیت دیگر شعبوں میں تعاون پر تبادلہ خیال کیا گیا، مشیرخارجہ بنگلہ دیش نے دو طرفہ مضبوط تعلقات کی اہمیت پر زور دیا۔

مشیرخارجہ بنگلہ دیش نے دونوں ملکوں میں نجی شعبےکی اہمیت پر گفتگو کی، پاکستان بنگلہ دیش ویزہ عمل کو آسان بنانے پر اتفاق کیا گیا، پاکستان بنگلہ دیش کے درمیان بحری امور میں بہتری پر گفتگو کی گئی۔

وزارت خارجہ بنگلہ دیش نے کہا کہ اسحاق ڈار نے بتایا ’’پاکستان بنگلہ دیش نالج کوریڈور‘‘ کا قیام عمل میں لایا جارہا ہے، اسحاق ڈار نے بتایا بنگلہ دیش کے 500 طلبا کو اسکالرشپ دی جائیں گی، اسحاق ڈار نے بتایاکہ میڈیکل شعبے میں بھی بنگلہ دیش کے طلبا کو اسکالرشپ دیں گے۔

اعلامیہ میں کہا گیا کہ نائب وزیراعظم نے کہا کہ جدید طبی سہولتیں بھی فراہم کی جائیں گی، پاکستان جولائی کی طلبا تحریک میں زخمیوں کو بھی علاج کی سہولت دےگا۔

وزارت خارجہ بنگلہ دیش نے مزید کہا کہ تحریک میں زخمی طلبا سمیت 40 افراد کا پاکستان میں جدید علاج کیا جائےگا، پاکستان نے بنگلہ دیش کی ہاکی ٹیم کو ٹریننگ دینے کی بھی پیش کش کی ہے۔

اعلامیہ میں کہا گیا کہ روہنگیا میں نسل کشی کےخلاف پاکستان سے حمایت جاری رکھنے کی درخواست کی گئی، پاکستان اور بنگلادیش نے میانمار روہنگیا میں نسل کشی کی مذمت کی ہے، اسحاق ڈار نے مشیرخارجہ کو دورہ پاکستان کی دعوت دی۔