ڈھاکہ: بنگلہ دیش کے وزیرِ داخلہ کے مشیر لیفٹیننٹ جنرل (ریٹائرڈ) محمد جہانگیر عالم چوہدری نے کہا ہے کہ ملک کی عبوری حکومت آئندہ عام انتخابات کو ’’آزاد، منصفانہ اور پُرامن‘‘ طریقے سے کرانے کے لیے ہر ممکن کوشش کر رہی ہے۔ بنگلہ دیش میں پارلیمانی انتخابات آئندہ سال فروری میں ہونے والے ہیں۔

سرکاری خبر رساں ایجنسی بنگلہ دیش سنگباد سنگستھا (بی ایس ایس) کی خبر کے مطابق، یہاں کیرانی گنج میں ایک پولنگ سینٹر کا دورہ کرنے کے بعد چوہدری نے کہا کہ انتخابات کی مجوزہ تاریخ کا اعلان کر دیا گیا ہے، تاہم حتمی تاریخ کا اعلان الیکشن کمیشن کرے گا۔ انہوں نے کہا، تمام لوگ پُرامن انتخابات چاہتے ہیں۔ ہم اگلے انتخابات کو آزاد، منصفانہ اور پُرامن طریقے سے کرانے کے لیے ہر ممکن کوشش کر رہے ہیں۔

چوہدری نے عوام سے قانون نافذ کرنے والے اداروں کے ساتھ ’’مکمل تعاون‘‘ کرنے کی اپیل کی اور کہا کہ ان کے تعاون کے بغیر منصفانہ اور پُرامن انداز میں انتخابات کرانا ممکن نہیں ہے۔ بنگلہ دیش کے چیف ایڈوائزر محمد یونس نے ہفتے کو ایک اعلیٰ سطحی اجلاس کی صدارت کی اور عام انتخابات کے لیے پولنگ مراکز پر ’’مکمل سیکیورٹی‘‘ انتظامات یقینی بنانے کی اپیل کی۔

بنگلہ دیش کے چیف الیکشن کمشنر (سی ای سی) اے ایم ایم نصیر الدین نے کہا ہے کہ عام انتخابات فروری 2026 کے پہلے ہفتے میں ہوں گے۔