اقوامِ متحدہ: اقوامِ متحدہ کی جنرل اسمبلی نے مصنوعی ذہانت (اے آئی) کے اثرات اور خطرات کا جائزہ لینے کے لیے 40 رکنی عالمی سائنسی پینل کے قیام کی بھاری اکثریت سے منظوری دے دی، جبکہ امریکہ نے اس تجویز کی سخت مخالفت کی۔ اس پینل کے قیام کی تجویز پیش کرنے والے اقوامِ متحدہ کے سیکریٹری جنرل انتونیو گوتریس نے اسے “اے آئی کی عالمی سائنسی سمجھ بوجھ کی سمت ایک بنیادی قدم” قرار دیا۔

گوتریس نے جمعرات کو کہا کہ “ایسے وقت میں جب اے آئی تیزی سے ترقی کر رہا ہے، یہ پینل ٹھوس اور آزاد سائنسی بصیرت فراہم کرے گا تاکہ تمام رکن ممالک، چاہے ان کی تکنیکی صلاحیت کچھ بھی ہو، مساوی بنیادوں پر شمولیت اختیار کر سکیں۔” انہوں نے اسے اے آئی کے حقیقی معاشی اور سماجی اثرات کے جائزے کے لیے پہلا مکمل طور پر آزاد عالمی سائنسی ادارہ قرار دیا۔ 193 رکنی جنرل اسمبلی میں اس پینل کے حق میں 117 ممالک نے ووٹ دیا، جبکہ دو ممالک نے مخالفت میں ووٹ ڈالا۔

امریکہ اور پیراگوئے نے اس کے خلاف ووٹ دیا، جبکہ تیونس اور یوکرین نے ووٹنگ میں حصہ نہیں لیا۔ دوسری جانب امریکہ کے کئی اتحادیوں نے روس، چین اور متعدد ترقی پذیر ممالک کے ساتھ مل کر اس تجویز کی حمایت کی۔ اقوامِ متحدہ میں امریکی مشن کی کونسلر لارین لولیس نے اس پینل کو “اقوامِ متحدہ کے دائرہ اختیار کی خلاف ورزی” قرار دیتے ہوئے کہا کہ “اے آئی کی حکمرانی اقوامِ متحدہ کی ہدایت کا موضوع نہیں ہے۔

انہوں نے کہا کہ اے آئی کے شعبے میں عالمی رہنما کی حیثیت سے امریکہ جدت کو تیز کرنے اور اپنے بنیادی ڈھانچے کو مضبوط بنانے کے لیے پرعزم ہے۔ ان کے مطابق ڈونلڈ ٹرمپ انتظامیہ “ہم خیال ممالک کے ساتھ مل کر مشترکہ اقدار کے مطابق اے آئی کی ترقی کو فروغ دینے” کی حمایت کرے گی۔