نئی دہلی
آبنائے ہُرمز کو عبور نہ کر پانے کی وجہ سے سینکڑوں جہازوں پر سوار تقریباً 20,000 ملاح خلیج میں پھنس گئے ہیں۔ ان جہازوں میں گیس اور تیل کے ٹینکرز سمیت کئی مال بردار جہاز شامل ہیں۔دنیا کے کل تیل اور مائع قدرتی گیس (ایل این جی) کا تقریباً پانچواں حصہ اسی آبی راستے سے گزرتا ہے۔
سمندری ڈیٹا فراہم کرنے والی کمپنی "لوئیڈز لسٹ انٹیلیجنس" کے مطابق 13 سے 19 اپریل کے درمیان اس آبنائے سے تقریباً 80 جہاز گزرے، جبکہ جنگ سے پہلے اس راستے سے روزانہ تقریباً 130 یا اس سے زیادہ جہاز گزرتے تھے۔اقوام متحدہ کے مطابق جنگ شروع ہونے کے بعد اب تک درجنوں جہازوں پر حملوں میں کم از کم 10 ملاح ہلاک ہو چکے ہیں۔
گزشتہ ہفتے امریکی صدر ڈونلڈ ٹرمپ نے جنگ بندی کو غیر معینہ مدت کے لیے بڑھا دیا تھا، اس کے باوجود امریکہ نے ایرانی بندرگاہوں پر ناکہ بندی جاری رکھی۔ اس کے جواب میں ایران نے آبنائے میں جہازوں پر فائرنگ کی اور دو جہازوں کو قبضے میں لے لیا۔
دوسری جانب "اسٹاک ہوم انٹرنیشنل پیس ریسرچ انسٹی ٹیوٹ" کی ایک رپورٹ کے مطابق مشرق وسطیٰ میں 2025 کے دوران فوجی اخراجات تقریباً مستحکم رہے، جبکہ دنیا کے دیگر حصوں میں ان میں اضافہ دیکھا گیا۔رپورٹ کے مطابق پورے خطے کے فوجی اخراجات میں صرف 0.1 فیصد اضافہ ہوا، تاہم اسرائیل اور ایران دونوں کے اخراجات میں درحقیقت کمی آئی ہے۔
سال 2025 میں اسرائیل کا فوجی خرچ 4.9 فیصد کم ہو کر 48.3 ارب ڈالر رہ گیا، جو 2024 کے مقابلے میں جنگ کی شدت میں کمی کی عکاسی کرتا ہے۔
