کیمبرج:ایک تازہ ترین طبی مطالعے میں انکشاف ہوا ہے کہ اپینڈکس (اندھی آنت) کا کینسر، جو پہلے ایک نہایت نایاب بیماری سمجھی جاتی تھی، اب تیزی سے نوجوان نسل کو متاثر کر رہا ہے۔ برطانیہ کی اینگلیا رسکن یونیورسٹی کے محقق جسٹن سٹیبنگ کی زیر قیادت اس تحقیق نے طبی ماہرین کو حیران کر دیا ہے۔ مطالعے کے مطابق، 1970 کی دہائی کے بعد پیدا ہونے والے افراد میں اس کینسر کے کیسز میں نمایاں اضافہ دیکھا گیا ہے۔

یہ تعداد 1940 کی دہائی میں پیدا ہونے والے افراد کی نسبت تین سے چار گنا زیادہ ہے۔ اگرچہ اس بیماری کی مجموعی شرح اب بھی کم ہے، تاہم اس میں مسلسل اضافہ طبی حلقوں کے لیے باعثِ تشویش بن چکا ہے۔ ماہرین کے مطابق، یہ کینسر اب صرف عمر رسیدہ افراد تک محدود نہیں بلکہ 30، 40 سال یا اس سے بھی کم عمر کے افراد کو نشانہ بنا رہا ہے۔

حالیہ اعداد و شمار کے مطابق، اب تقریباً ہر تین میں سے ایک کیس 50 سال سے کم عمر کے بالغ افراد میں سامنے آ رہا ہے، جو کہ دیگر گیسٹرو-انٹسٹائنل کینسروں کے مقابلے میں کہیں زیادہ ہے۔ تحقیق میں اس رجحان کی کوئی حتمی وجہ تو بیان نہیں کی گئی، لیکن ماہرین کا ماننا ہے کہ یہ تبدیلی ماحول، طرزِ زندگی، خوراک اور جسمانی سرگرمیوں میں آنے والے ڈرامائی تغیرات کا نتیجہ ہو سکتی ہے۔

موٹاپامیں 1970 کی دہائی سے موٹاپے کی شرح میں نمایاں اضافہ ہوا ہے، جو کینسر کی متعدد اقسام میں خطرہ بڑھانے والا اہم عنصر سمجھا جاتا ہے۔ فاسٹ فوڈ، میٹھے مشروبات، سرخ گوشت اور پراسیسڈ غذا کا زیادہ استعمال بھی آنتوں کے کینسر سے جوڑا جا رہا ہے۔ کم جسمانی سرگرمی: طویل وقت تک بیٹھے رہنے اور سکرینوں پر گزارے گئے وقت نے بھی خطرات کو بڑھایا ہے۔

تحقیق میں یہ امکان بھی ظاہر کیا گیا ہے کہ ہم اب ایسے ماحولیاتی عوامل کے زیرِ اثر ہیں جن سے سابقہ نسلیں محفوظ تھیں۔ صنعتی پیداوار، پلاسٹک، کیمیکل، اور پانی کی کوالٹی جیسے عناصر پر بھی توجہ دی جا رہی ہے، تاہم یہ تمام مفروضے ابھی تحقیقی مراحل میں ہیں۔ اس بیماری کی ایک بڑی پیچیدگی یہ ہے کہ اس کی علامات نہایت مبہم ہوتی ہیں — جیسے ہلکا پیٹ درد، سوجن، یا رفع حاجت کی عادات میں تبدیلی — جنہیں اکثر معمولی سمجھ کر نظر انداز کر دیا جاتا ہے۔

بیشتر کیسز میں اپینڈکس کینسر کا انکشاف اُس وقت ہوتا ہے جب مریض کو اپینڈیسائٹس کے شبہے میں سرجری کی جاتی ہے، اور اس وقت تک بیماری عموماً کافی پھیل چکی ہوتی ہے۔ ماہرین نے تشویش ظاہر کی ہے کہ فی الحال اپینڈکس کینسر کے لیے کوئی مؤثر اسکریننگ ٹیسٹ موجود نہیں ہے۔

چونکہ یہ بیماری اب بھی نایاب سمجھی جاتی ہے، اس لیے روایتی امیجنگ یا اینڈوسکوپی سے بھی اس کا پتہ چلانا مشکل ہوتا ہے۔ طبی ماہرین نے زور دیا ہے کہ اگرچہ یہ کینسر نایاب ہے، لیکن نوجوانوں میں اس کی بڑھتی شرح مریضوں اور معالجین دونوں کے لیے ایک انتباہ ہے کہ وہ علامات کو سنجیدگی سے لیں اور مشتبہ معاملات میں جلد جانچ کا بندوبست کریں۔