واشنگٹن: دنیا کے امیر ترین شخص ایلون مسک نے خاموشی سے اپنی مجوزہ سیاسی جماعت امریکہ پارٹی کے قیام کے منصوبے کو مؤخر کر دیا ہے۔ وال اسٹریٹ جرنل کی رپورٹ کے مطابق، ایلون مسک نے اپنے قریبی حلقوں کو بتایا ہے کہ وہ فی الحال اپنی توجہ کاروباری امور اور ریپبلکن نائب صدارتی امیدوار جے ڈی وینس کے ساتھ اپنے تعلقات کو مضبوط رکھنے پر مرکوز رکھنا چاہتے ہیں۔

مسک کا ماننا ہے کہ نئی سیاسی جماعت کی تشکیل جے ڈی وینس کے ساتھ تعلقات کو نقصان پہنچا سکتی ہے، خاص طور پر ایسے وقت میں جب وہ 2028 کے ممکنہ صدارتی انتخاب میں وینس کی حمایت پر غور کر رہے ہیں۔ یاد رہے کہ ایلون مسک نے جولائی میں ڈونلڈ ٹرمپ کے ساتھ ٹیکس کٹوتیوں اور اخراجات کے بل پر اختلاف کے بعد اپنی نئی جماعت بنانے کا اعلان کیا تھا، جس کا مقصد امریکی سیاست میں ایک نیا اعتدال پسند راستہ نکالنا تھا۔

تاہم، اس سیاسی منصوبے نے مسک کو مالی طور پر بھی نقصان پہنچایا۔ رپورٹ کے مطابق، سیاسی مداخلت کے بعد مارکیٹ میں ردعمل کے نتیجے میں ان کے اثاثوں کی مالیت میں 76 ارب ڈالر کی کمی واقع ہوئی۔ ابھی تک اس معاملے پر نہ تو ٹیسلا اور نہ ہی وائٹ ہاؤس کی جانب سے کوئی سرکاری بیان جاری کیا گیا ہے۔

البتہ یہ واضح ہے کہ ایلون مسک، مستقبل میں جے ڈی وینس کی قیادت میں ریپبلکن پارٹی کے اندر سے اثر و رسوخ بڑھانے کو ترجیح دے رہے ہیں بجائے اس کے کہ وہ ایک نئی جماعت کے ذریعے سیاسی میدان میں قدم رکھیں۔