احسان فضلی / سرینگر

یہ محض اتفاق ہو سکتا ہے کہ جموں و کشمیر کی گجر بکروال قبائلی برادری سے تعلق رکھنے والی دو خواتین اپنی شاندار کامیابیوں کی وجہ سے سرخیوں میں ہیں۔ سرحدی ضلع راجوری کی ڈاکٹر ارم چودھری نے یو پی ایس سی سول سروسز امتحان میں آل انڈیا رینک 40 حاصل کیا ہے، جبکہ دوسری شبنم صدیق ہیں، جو پلوامہ کے ترال علاقے میں ایک خیمہ نما گھر میں رہتی ہے اور ایک مزدور کی بیٹی ہے، مگر اس کے باوجود بارہویں جماعت کے بورڈ امتحانات میں 93 فیصد نمبر حاصل کیے ہیں۔گوجر-بکروال برادری مویشی بانوں اور خانہ بدوشوں پر مشتمل ہے اور جموں و کشمیر کی پسماندہ ترین برادریوں میں سے ایک ہے۔

ڈاکٹر ارم چودھری، جو راجوری کے درہال گاؤں سے تعلق رکھتی ہیں، نہ صرف جموں و کشمیر سے تعلق رکھنے والی پہلی قبائلی خاتون ہیں جنہوں نے اعلیٰ رینک کے ساتھ یو پی ایس سی سول سروسز امتحان پاس کیا، بلکہ وہ ملک بھر میں مسلمانوں میں پہلی پوزیشن پر آئی ہیں۔ وہ ایم بی بی ایس کی ڈگری رکھتی ہیں اور انہوں نے چوتھی کوشش میں یہ امتحان کامیابی سے پاس کیا ہے۔

وہ اپنی برادری کی پہلی خاتون ڈاکٹر بھی ہیں۔

وہ نہ صرف ملک کے تقریباً 1000 کامیاب امیدواروں میں اعلیٰ کارکردگی دکھانے والی خواتین میں شامل ہیں بلکہ جموں و کشمیر سے تعلق رکھنے والے درجن سے زائد کامیاب امیدواروں میں سرفہرست ہیں۔ یہ ان کی آخری کوشش تھی، اس سے قبل وہ 2023 میں یو پی ایس سی میں آل انڈیارینک 852 کے ساتھ کامیاب ہوئی تھیں، اور اپنے ہدف کے حصول اور عوامی خدمت کے جذبے کو لے کر مسلسل آگے بڑھتی رہیں۔ایک مقامی صحافی نے ارم کی کامیابی سے متعلق ایک ویڈیو  ایکس (سابقہ ٹوئٹر) پر شیئر کی ہے

Dr Iram Choudhary from Rajouri has secured Rank 40 in the UPSC exam#JammuAndKashmir #UPSC #IAS #CivilServicesExam
#UPSCResults pic.twitter.com/x2fGHP51MZ

— News Bulletin (@newsbulletin05) April 22, 2025

 وہ بچپن سے ہی محنتی رہی ہے اور کبھی پیچھے مڑ کر نہیں دیکھا، ارم کے والد نثار احمد چودھری نے راجوری سے آواز دی وائس سے بات کرتے ہوئے کہا۔ گزشتہ سال جب ارم نے آل انڈیا رینک 852 کے ساتھ کامیابی حاصل کی توانہیں ریلوےسروسز الاٹ کی گئی اور وہ اس وقت راجستھان کے اودے پور میں ٹریننگ پر ہیں۔اس نے ایک بار پھر کوشش کرنے کا فیصلہ کیا، اور یہ فیصلہ اس کے خوابوں کی تعبیر بن گیا-نثار چودھری، جو ایک ریٹائرڈ انجینئر ہیں نےکہا- وہ اپنی بیٹی کی مسلسل محنت پر خوشی اور فخر محسوس کرتے ہیں، جس نے اسے نہ صرف ملک کے اعلیٰ رینک ہولڈرز میں شامل کیا بلکہ جموں و کشمیر کی ٹاپر بھی بنایا۔

ارم نے بارہویں جماعت تک تعلیم راجوری میں حاصل کی، جو کہ پاکستان کے ساتھ کنٹرول لائن پر واقع ایک سرحدی قصبہ ہے، اور وہ ہمیشہ تعلیم میں بہترین رہی۔ بعد ازاں وہ ایم بی بی ایس کے لیے منتخب ہوئیں اور 2013 سے 2019 تک گورنمنٹ میڈیکل کالج، جموں سے ڈگری مکمل کی۔ تاہم، ان کے دل میں سول سروسز کا خواب تھا اور انہوں نے اسے حقیقت بنانے کے لیے مسلسل محنت کی۔

پلوامہ میں، شبنم صدیق کی شاندار کامیابی پر ہر طرف خوشی کا ماحول ہے، جنہوں نے جے اینڈ کے بورڈ آف اسکول ایگزامینیشنز کے حالیہ بارہویں جماعت کے نتائج میں 93 فیصد نمبر حاصل کیے۔

ان کی کامیابی کو انسانی عزم، ہمت اور حوصلے کی جیت کے طور پر دیکھا جا رہا ہے—ایک ایسی لڑکی جو نہ گھر کی مالک ہے، نہ الگ کمرہ رکھتی ہے، نہ کسی قسم کی سہولیات، اور پھر بھی اس نے بارہویں جماعت میں 500 میں سے 463 نمبر حاصل کیے۔

No private coaching, no warm room & no internet. Just sheer willpower, raw intellect, and a dream burning brighter than her surroundings. This young Tribal girl, living in a plastic-sheeted home in KASHMIR-TRAL, has shocked everyone by scoring 467 marks in 12th. Such students… pic.twitter.com/qYl9i2qg9G

— Vikas Amin (@Vikasamiin) May 2, 2025

 مقامی میڈیا سے گفتگو کرتے ہوئے شبنم نے کہا کہ اس کی کامیابی میں اس کے والدین اور مقامی اسکول کے اساتذہ کا بڑا کردار ہے جنہوں نے اسے حوصلہ دیا۔ اس کا خواب ہے کہ وہ آئی اے ایس آفیسر بنے اور وہ چاہتی ہے کہ حکومت اس کی مدد کرے۔

اس کے والد ایک مزدور کے طور پر کام کر کے بڑے خاندان کا خرچ اٹھاتے ہیں۔ وہ اپنے والدین اور بہن بھائیوں کے ساتھ پلوامہ کے پانر ترال علاقے میں ایک ترپال کے خیمے کے نیچے رہتی ہے۔اس کی کامیابی پر اس کا خاندان، اساتذہ اور والدین بے حد خوش ہیں۔ مقامی روایت کے مطابق، نتائج کے بعد اسے کھجوریں، ٹافیاں پیش کی گئیں اور ہار پہنائے گئے۔