دولت رحمان۔ گوہاٹی

آسام کی معروف وکیل اور کالم نگار زیبہ زوریہ نے سابق بالی ووڈ اداکارہ زائرہ وسیم کے حالیہ بیان پر سخت تنقید کی ہے جس میں انہوں نے یوم آزادی کی تقریبات میں کشمیری اسکولی طالبات کی شرکت پر سوال اٹھایا تھا۔ زیبہ زوریہ نے زائرہ وسیم کے مؤقف کو اسلام میں بڑھتی ہوئی انتہا پسندی کی عکاسی اور مسلم خواتین کی تعلیم اور شناخت کی غلط تشریح قرار دیا ہے۔زائرہ وسیم نے 2019 میں اپنے مذہبی عقائد کے ساتھ اداکاری کی مطابقت پر تحفظات کا اظہار کرتے ہوئے فلمی دنیا چھوڑ دی تھی۔ حال ہی میں انہوں نے کشمیر کے ایک اسکول میں یوم آزادی کی تقریب میں طالبات کے اسٹیج پر رقص کی ویڈیو سامنے آنے کے بعد جموں و کشمیر وقف بورڈ کی اس پروگرام میں شمولیت پر سوال اٹھایا تھا۔

انہوں نے سوال کیا تھا کہ کیا مسلم برادری کی خدمت کے لیے قائم مذہبی ادارے کو ایسے پروگرام کی حمایت کرنی چاہیے جہاں بچوں خصوصاً لڑکیوں سے اسٹیج پر پرفارم کروایا جائے۔زائرہ وسیم کا کہنا تھا کہ اداروں کو اس کے بجائے بچوں کی حوصلہ افزائی کرنی چاہیے کہ وہ سوچیں۔ تخلیق کریں۔ سیکھیں۔ گفتگو کریں۔ تعمیر کریں اور معاشرے میں اپنا کردار ادا کریں۔ انہوں نے کشمیر کی تعلیمی۔ روحانی اور فکری روایت کا بھی حوالہ دیا۔انہوں نے واضح کیا تھا کہ ان کی تنقید بچوں پر نہیں بلکہ ان اداروں پر ہے جو ایسے پروگرام منعقد کرتے اور ان کی سرپرستی کرتے ہیں۔

’’یہ رقص سے زیادہ تشویشناک بات ہے‘‘

سماجی مسائل پر ٹیلی ویژن مباحثوں میں بھی نظر آنے والی زیبہ زوریہ نے اس مؤقف پر سخت اعتراض کیا۔ انہوں نے کہا کہ یہ معاملہ محض ایک رقص کی تقریب پر اختلاف سے کہیں زیادہ سنگین ہے۔زیبہ زوریہ نے سوشل میڈیا پلیٹ فارم ایکس پر اپنی پوسٹ میں کہا کہ ایک آسامی مسلم خاتون کی حیثیت سے انہیں یہ دلیل خود اس رقص سے زیادہ تشویشناک محسوس ہوتی ہے جس پر اعتراض کیا گیا ہے۔انہوں نے کہا کہ یہ مؤقف خاص طور پر اس وقت متضاد محسوس ہوتا ہے جب اسے ایسی شخصیت کی جانب سے پیش کیا جائے جس نے خود فلم اور فنون لطیفہ کے ذریعے عوامی زندگی میں مقام بنایا۔انہوں نے سوال کیا کہ صرف یوم آزادی کی تقریب میں رقص کرنے کی وجہ سے کشمیری لڑکیوں کو ’’اسٹیج کی سجاوٹ‘‘ تک محدود کیوں سمجھا جائے۔زیبہ زوریہ نے کہا کہ اگر یہ دلیل دی جائے کہ اسکولوں کو لڑکیوں کو مباحثے۔ سائنس۔ کتابوں۔ تاریخ۔ شاعری۔ علمی سرگرمیوں اور کھیلوں کے زیادہ مواقع فراہم کرنے چاہئیں تو وہ اس کی حمایت کریں گی۔تاہم انہوں نے وقف بورڈ اور اسلامی اقدار کو اس انداز میں بحث میں شامل کرنے پر اعتراض کیا جس سے یوں محسوس ہو کہ ہندوستان کا یوم آزادی منانے والے مسلم بچے کسی مذہبی کشمکش کا شکار ہیں۔

’’میرا اسلام مجھے ہندوستان سے دوری ثابت کرنے کا تقاضا نہیں کرتا‘‘

اپنے تجربات کا حوالہ دیتے ہوئے زیبہ زوریہ نے کہا کہ مسلم شناخت کے لیے اس ملک یا معاشرے سے ثقافتی دوری اختیار کرنا ضروری نہیں جہاں مسلمان رہتے ہیں۔انہوں نے کہا کہ آسام کی مقامی مسلم برادریوں کی تاریخ آسامی معاشرے کے ساتھ گہری طرح جڑی ہوئی ہے۔ان کا کہنا تھا کہ ان کی آسامی شناخت ان کے اسلام کو کمزور نہیں کرتی اور ان کا اسلام انہیں بار بار ہندوستان سے اپنی دوری ثابت کرنے کا تقاضا نہیں کرتا۔انہوں نے وقف بورڈ کو ایسا ’’مذہبی سرحدی چوکی‘‘ قرار دینے کے تصور کو بھی مسترد کیا جو یہ طے کرے کہ مسلمان اپنی ہندوستانی شناخت کا کتنا اظہار کرسکتے ہیں۔ان کے مطابق مسلم تعلیمی اور فلاحی ادارے صرف اس لیے اپنی مسلم شناخت نہیں کھوتے کہ ان کے طلبہ یوم آزادی مناتے ہیں۔انہوں نے سوال کیا کہ آخر حد کہاں پار ہوئی۔ رقص سے۔ لڑکیوں سے۔ ترنگے سے یا اس بات سے کہ کشمیری مسلم لڑکیاں قومی پرچم کے ساتھ پوری طرح مطمئن نظر آئیں۔

’’ایک لڑکی رقص بھی کرسکتی ہے اور سائنس دان بھی بن سکتی ہے‘‘

زیبہ زوریہ نے فکری کامیابی اور فنون لطیفہ کے اظہار کو ایک دوسرے کی ضد قرار دینے کے تصور کو بھی چیلنج کیا۔انہوں نے سوال کیا کہ یہ تصور کیوں قائم کیا جائے کہ ایک مسلم لڑکی جو رقص کرتی ہے وہ بیک وقت سائنس دان۔ اسکالر یا دانشور نہیں بن سکتی۔انہوں نے کہا کہ کسی مسلم لڑکی کی ذہانت کو اس بات سے کیوں جانچا جائے کہ وہ کسی تقریب میں پرفارم کرنے کے لیے تیار ہے یا نہیں۔ان کے مطابق مسلم لڑکیوں کو ایسی محدود شناختوں میں قید نہیں کیا جانا چاہیے جہاں تعلیم۔ مذہب۔ تخلیقی صلاحیت اور عوامی زندگی میں شرکت کو ایک دوسرے کی ضد سمجھا جائے۔انہوں نے کہا کہ ایک مسلم لڑکی صبح قرآن پڑھ سکتی ہے۔ دوپہر میں ریاضی کے مسائل حل کرسکتی ہے۔ شام کو رقص کرسکتی ہے اور بڑی ہوکر وقت کی حکومت سے اختلاف بھی کرسکتی ہے۔ ان میں سے کوئی ایک چیز دوسری کو ختم نہیں کرتی۔

As an Assamese Muslim woman, I find this argument more disturbing than the dance she is offended by. And coming from a former Bollywood actor, the irony is difficult to miss.

You built part of your own public career in an industry of cinema, music, dance and performance. Nobody… https://t.co/PUPyK2sv38

— Zeba Zoariah (@ZZoariah) August 17, 2026

’’مسلم شناخت اتنی کمزور نہیں‘‘

زیبہ زوریہ نے اس تصور پر بھی تنقید کی کہ مسلم شناخت اتنی کمزور ہے کہ کوئی گیت۔ رقص یا ہندوستانی پرچم اسے متاثر کرسکتا ہے۔انہوں نے کہا کہ مسلم شناخت کو اتنا کمزور سمجھنا بند کرنا چاہیے کہ ایک گیت۔ رقص یا ہندوستانی پرچم اسے آلودہ کرسکتا ہے۔انہوں نے اپنی شناخت کے حوالے سے کہا کہ وہ آسامی بھی ہیں۔ مسلمان بھی اور ہندوستانی بھی۔ انہیں اپنی ایک شناخت کو دوسری کی تصدیق کے لیے کبھی ختم کرنے کی ضرورت محسوس نہیں ہوئی۔زیبہ زوریہ کے مطابق اصل المیہ مسلم لڑکیوں کا ترنگے کے ساتھ رقص کرنا نہیں بلکہ یہ ہے کہ بالغ افراد بچوں کو تحفظ فراہم کرنے کے نام پر شناخت کے بحران سے دوچار کردیں۔

زائرہ وسیم کا مؤقف

زائرہ وسیم نے 16 اگست کو ایکس پر اپنی پوسٹ میں کشمیر میں وقف بورڈ سے متعلق ایک اسکول میں یوم آزادی کی تقریب کی ویڈیو سامنے آنے کے بعد یہ سوال اٹھایا تھا کہ مذہبی ذمہ داری رکھنے والا ادارہ بچوں کی اسٹیج پرفارمنس پر مشتمل تقریبات کا حصہ کیوں بنے۔انہوں نے کہا تھا کہ کشمیر کی ایک شاندار روایت رہی ہے جہاں تعلیم کو ذہنوں کو روشن کرنے۔ کردار سازی۔ علم کے فروغ اور روحانی ترقی کا ذریعہ سمجھا جاتا رہا ہے۔ان کے مطابق اگر کسی ادارے کا مقصد مذہبی خدمت ہے تو اس کی ذمہ داری ہے کہ وہ معاشرے کو روحانی۔ اخلاقی اور فکری طور پر مضبوط بنائے۔انہوں نے یہ بھی واضح کیا کہ ان کی تنقید بچوں کے خلاف نہیں بلکہ ان اداروں کے خلاف ہے کیونکہ بچے عموماً وہی سرگرمیاں انجام دیتے ہیں جو اسکول یا ادارے ان کے لیے ترتیب دیتے ہیں۔دونوں شخصیات کے متضاد مؤقف نے مسلم شناخت۔ خواتین کی تعلیم۔ فنون لطیفہ۔ حب الوطنی اور عوامی زندگی میں مذہبی اداروں کے کردار کے حوالے سے ایک وسیع بحث کو جنم دیا ہے۔ زیبہ زوریہ کا مؤقف ہے کہ مذہبی عقیدہ اور ہندوستانی شناخت ایک دوسرے کی ضد نہیں اور مسلم لڑکیوں کو بااختیار بنانے کا مطلب ان کے اختیارات محدود کرنا نہیں بلکہ ان کے لیے مزید راستے کھولنا ہے۔