تحریر: آشا کھوسہ

1. اندرا گاندھی
"اندرا گاندھی کا راج ہے" — یہ وہ جملہ تھا جو ستر کی دہائی میں مرد حضرات عورتوں کی برتری کو تسلیم کرنے کے لیے استعمال کرتے تھے۔ بھارت کی پہلی خاتون وزیر اعظم کے طور پر اندرا گاندھی کے دور میں 1971 میں پاکستان کے خلاف جنگ میں فتح حاصل ہوئی۔ "گنگی گڑیا" کہلانے سے لے کر ملک کی پہلی فیصلہ کن فوجی فتح تک پہنچنا اور "درگا" کے لقب سے پکارا جانا، ان کی قیادت نے بھارتی خواتین کو مردوں کے برابر، بلکہ کئی مواقع پر آگے بھی لا کھڑا کیا۔ ان کے سیاسی فیصلے متنازع ہو سکتے ہیں، مگر خواتین کے لیے وہ ایک ایسی رہنما بن کر ابھریں جو کھادی یا روایتی ریشمی ساڑھی میں عالمی رہنماؤں سے ملاقات کرتی اور قومی سلامتی پر جرات مندانہ فیصلے لیتی تھیں۔ ایمرجنسی کا نفاذ جمہوریت میں ایک وقفہ تھا، مگر انہوں نے انتخابات میں شکست قبول کی اور جمہوریت کی واپسی کو ممکن بنایا۔ ان کے دور میں خواتین نے ملک کی ترقی میں نمایاں کردار ادا کیا۔

2. کرن بیدی
1972 میں بھارتی پولیس سروس (IPS) میں شامل ہونے والی پہلی خاتون کرن بیدی نے بھارتی خواتین کے لیے نئی راہیں کھولیں۔ محض ایک پولیس افسر ہی نہیں، بلکہ ایک سرگرم اور نڈر شخصیت کے طور پر مشہور ہوئیں۔ دہلی میں ٹریفک خلاف ورزیوں کے خلاف ان کی کارروائیاں انہیں "کرین بیدی" کا لقب دلا گئیں۔ انہوں نے وزیر اعظم اندرا گاندھی کے قافلے سے گاڑی بھی ہٹا دی تھی۔ کرن بیدی کی جرات اور فرض شناسی نے ہزاروں لڑکیوں کو فوج اور پولیس میں شمولیت کی ترغیب دی۔

3. پی ٹی اوشا
کیرالہ کے ساحل پر ننگے پاؤں دوڑتی ایک دبلی پتلی لڑکی کی تصویر 1980 کی دہائی میں بھارتی ایتھلیٹکس کی پہچان بن گئی۔ "پایولی ایکسپریس" کے نام سے مشہور پی ٹی اوشا نے خواتین کی ایتھلیٹکس میں عالمی سطح پر بھارتی موجودگی قائم کی۔ 1984 لاس اینجلس اولمپکس میں 400 میٹر ہرڈلز میں محض 0.01 سیکنڈ سے تمغہ گنوانا بھی ان کی عظمت کی دلیل تھا۔ انہوں نے کھیلوں میں خواتین کے لیے رکاوٹیں توڑیں، معاشرتی رویے بدلے اور اپنی اکیڈمی کے ذریعے نئی نسل کو تیار کیا۔

4. سشما سواراج
بھارتی سیاست میں مردوں کے غلبے کے دور میں سشما سواراج نے اپنی جگہ بنائی۔ وہ قائد حزبِ اختلاف، مختصر مدت کے لیے دہلی کی وزیر اعلیٰ، اور بعد میں وزیر خارجہ رہیں۔ ان کی شاندار تقریری صلاحیت اور حاضر جوابی نے انہیں پارلیمان میں ممتاز مقام دلایا۔ وزیر خارجہ کے طور پر انہوں نے سوشل میڈیا کے ذریعے دنیا بھر میں پھنسے بھارتی شہریوں کی براہِ راست مدد کر کے "عوام کی وزیر" کا لقب حاصل کیا۔

5. سمی گریوال
چند فلمی کرداروں کے بعد، سمی گریوال نے اپنے شو Rendezvous with Simi Garewal (1997–2012) سے بھارتی ٹی وی پر سیلیبرٹی انٹرویوز کا نیا معیار قائم کیا۔ سفید لباس، نرم لہجہ اور گہری گفتگو ان کی پہچان بن گئی۔ انہوں نے نہ صرف میزبانی بلکہ پروڈکشن اور ڈائریکشن میں بھی خواتین کے لیے نئی راہیں کھولیں۔

6. شہناز حسین
خوبصورتی کی صنعت میں انقلابی تبدیلی لانے والی پہلی بھارتی خاتون کاروباری شخصیت۔ انہوں نے "دادھی ماں کے نسخے" سے تیار کردہ جڑی بوٹیوں پر مبنی مصنوعات کو عالمی سطح پر مقبول بنایا۔ ان کے فریئنچائز ماڈل نے ہزاروں گھریلو خواتین کو اپنے گھروں سے بیوٹی سیلون شروع کرنے کا موقع دیا۔ ان کی اکیڈمی نے 40,000 سے زائد غریب خواتین کو بیوٹی اور ویلنَس کی تربیت دی۔

7. سدھا مورتی
مصنفہ، سماجی کارکن، اور انفوسس فاؤنڈیشن کی چیئرپرسن کے طور پر سدھا مورتی نے تعلیم، صحت اور دیہی ترقی میں نمایاں خدمات انجام دیں۔ انہوں نے ہزاروں اسکول اور لائبریریاں قائم کیں، اور اپنی سادہ مگر اثرانگیز تحریروں سے لاکھوں قارئین کے دل جیتے۔ پدم بھوشن اور پدم شری ایوارڈ یافتہ سدھا مورتی کو حال ہی میں راجیہ سبھا کی رکن نامزد کیا گیا۔

8. زویا اختر
نئی نسل کی فلم ساز زویا اختر نے بھارتی سینما کو حقیقت پسندانہ کہانیوں اور جدید انداز سے نوازا۔ لک بائی چانس، زندگی نہ ملے گی دوبارہ، گلی بوائے جیسی فلموں میں انہوں نے رشتوں، طبقاتی فرق اور صنفی کرداروں کو بغیر وعظ و نصیحت کے پیش کیا۔ وہ OTT پلیٹ فارمز پر بھی کامیاب رہیں، جس سے بھارتی کہانیوں کو عالمی سطح پر نیا مقام ملا۔

9. رینی سائمن-کھنہ
آل انڈیا ریڈیو اور دوردرشن کی پہلی خاتون نیوز اینکر جن کی گہری، پُراعتماد آواز نے 80 اور 90 کی دہائی میں سنجیدہ خبروں کو نیا معیار دیا۔ ان کی پیشہ ورانہ مہارت اور باوقار انداز نے خواتین اینکرز کے لیے نئے دروازے کھولے۔ آج بھی دہلی میٹرو کے اعلانات اور اہم سرکاری تقریبات میں ان کی آواز سنائی دیتی ہے

 بچندری پال, ایک کوہ پیما  جنہوں نے 1984 میں دنیا کی بلند ترین چوٹی ماؤنٹ ایورسٹ کی چوٹی پر پہنچنے والی پہلی ہندوستانی خاتون ہونے کا اعزاز حاصل کیا۔پال ایک دیہی مزدور گھرانے میں پیدا ہوئیں، جو آج کے اتراکھنڈ میں واقع ہے، وہ سات بہن بھائیوں میں سے ایک تھیں۔ وہ ایک باصلاحیت طالبہ تھیں لیکن جب انہوں نے اسکول ٹیچر بننے کے بجائے پیشہ ور کوہ پیما بننے کا فیصلہ کیا تو اپنے گھر والوں اور رشتہ داروں کی سخت مخالفت کا سامنا کرنا پڑا۔ تاہم، جلد ہی انہوں نے اپنے منتخب کردہ میدان میں کامیابی حاصل کر لی۔ کئی چھوٹی چوٹیوں کو سر کرنے کے بعد وہ ہندوستان کی پہلی مخلوط ٹیم (مرد و خواتین) میں شامل رہیں،جس نے ماؤنٹ ایورسٹ سر کرنے کی مہم کا آغاز کیا۔ یہ مہم مئی 1984کے اوائل میں شروع ہوئی، لیکن ایک برفانی تودہ گرنے سے ان کا کیمپ دب گیا ،گروپ کے نصف سے زیادہ افراد کو زخم یا تھکن کی وجہ سے واپسی پر مجبور ہونا پڑا۔ اس کے باوجود، پال اور باقی ٹیم نے پیش قدمی جاری رکھی اور وہ 23 مئی 1984ء کو چوٹی تک پہنچ گئیں۔