آواز دی وائس / نئی دہلی

تمل ناڈو کے ضلع سیلم کی کَلورائن پہاڑیوں سے تعلق رکھنے والی ایک قبائلی لڑکی راجیشوری نے اپنے مرحوم والد کا خواب پورا کرتے ہوئے ایک تاریخی کامیابی حاصل کی ہے۔ راجیشوری، نے  جو ملیالی (شیڈول ٹرائب) کمیونٹی سے تعلق رکھتی ہیں،جے ای ای ایڈوانسڈ امتحان میں کامیابی حاصل کر کے آئی آئی ٹی میں داخلے کے لیے اہلیت حاصل کر لی ہے۔ یہ کامیابی صرف ان کی ذاتی جیت نہیں، بلکہ پورے قبائلی سماج کے لیے ایک مثال اور تحریک بن چکی ہے۔

سیلم سے تقریباً 65 کلومیٹر دور واقع گاؤں کرومن تھرائی، جہاں کی 90 فیصد آبادی قبائلی ہے، وہاں تعلیم کو اب بھی ایک دُور کا خواب سمجھا جاتا ہے۔ زیادہ تر بچے آٹھویں جماعت کے بعد اسکول چھوڑ دیتے ہیں کیونکہ غربت، ہجرت اور وسائل کی کمی ان کے راستے کی دیوار بن جاتی ہے۔لیکن راجیشوری کے والد اینڈی نے اس رواج کو توڑنے کا فیصلہ کیا تھا۔ درزی کا کام کرتے ہوئے انہوں نے اپنے چار بچوں کو تعلیم دلانے کا خواب دیکھا اور اس خواب کو پورا کرنے کے لیے دن رات محنت کی۔ ان کی اہلیہ کویتا نے بھی مزدوری کر کے اس خواب میں اپنا کردار ادا کیا ۔بدقسمتی سے، 2024 میں اینڈی کا کینسر کے باعث انتقال ہو گیا۔ وہ اپنی بیٹی کو آئی آئی ٹی جاتے دیکھنے کا خواب دل میں لیے اس دنیا سے رخصت ہو گئے۔ مگر ان کی بیٹی نے ہار نہیں مانی — بلکہ جے ای ای ایڈوانسڈ میں ایس ٹی زمرے میں آل انڈیا رینک 417 حاصل کر کے اپنے والد کی ادھوری خواہش پوری کر دی۔

راجیشوری نے دسویں جماعت میں 500 میں سے 438 نمبر، اور بارہویں جماعت میں 600 میں سے 521 نمبر حاصل کیے۔ وہ گورنمنٹ ٹرائبل ریزیڈنشل ہائیر سیکنڈری اسکول، کرومن تھرائی کی طالبہ ہیں۔ انہوں نے میتھ-بایولوجی اسٹریم کا انتخاب کیا اور خاص طور پر کیمیا اور ریاضی میں بہترین کارکردگی کا مظاہرہ کیا۔ریاستی حکومت کے زیر انتظام جے ای ای کوچنگ پروگرام کے تحت انہیں ایروڈ ضلع کے پیرو٘ندُرئی میں تربیت فراہم کی گئی۔ ان کے اساتذہ نے جے ای ای کے پیٹرن سے واقف کرایا اور مسلسل رہنمائی فراہم کی۔ راجیشوری کو آئی آئی ٹی مدراس میں داخلے کی پوری امید ہے۔

اگرچہ کمپیوٹر سائنس یا الیکٹریکل انجینئرنگ جیسے مقبول شعبوں میں سیٹ حاصل کرنا مشکل ہو سکتا ہے، لیکن ان کی کامیابی کی علامتی اور سماجی اہمیت بہت بڑی ہے۔ تمل ناڈو کے آدی دراوڑ اور قبائلی فلاح و بہبود محکمہ(ADTW) کے حکام اور اساتذہ کا کہنا ہے کہ وہ ممکنہ طور پر کسی سرکاری قبائلی بورڈنگ اسکول سے آئی آئی ٹی میں پہنچنے والی پہلی طالبہ بن سکتی ہیں۔اس وقت راجیشوری، کمیژی میں واقع ایکلویہ ماڈل ریزیڈنشل اسکول میں ایک خصوصی تیاری پروگرام میں شریک ہیں، جہاں انہیں انگریزی زبان، سافٹ اسکلز اور آئی آئی ٹی کے ماحول کے مطابق ڈھلنے کی تربیت دی جا رہی ہے۔

والد کی وفات کے بعد بھائی نے سنبھالا خاندان

والد کے انتقال کے بعد راجیشوری کے بڑے بھائی سری گنیش نے سلائی کا کام سنبھال لیا تاکہ خاندان کا خرچ چل سکے۔ ان کی والدہ آج بھی دیہاڑی پر کام کرتی ہیں۔ ایسے مشکل حالات میں سے نکل کر آئی آئی ٹی تک کا سفر طے کرنا ایک غیر معمولی کامیابی ہے۔راجیشوری کہتی ہیں کہ میرے بھائی بہن بھی پڑھائی میں اچھے تھے، لیکن انہیں جے ای ای جیسی مقابلہ جاتی امتحانات کے بارے میں کوئی معلومات نہیں تھیں۔ میرے اساتذہ نے میرا ساتھ دیا اور مجھے راستہ دکھایا۔

راجیشوری بنے گی نئی نسل کی تحریک

ADTW محکمہ کے افسر وجیّن بتاتے ہیں کہ حکومت کی کوششیں — جیسے مفت درخواست، والدین کی کونسلنگ، مفت کوچنگ اور رہائش کی سہولت — نے راجیشوری کو اس مقام تک پہنچنے میں مدد دی۔ راجیشوری نے اعتماد سے کہاکہ میری یہ کامیابی آنے والے وقت میں کئی قبائلی طلبہ کو بڑے خواب دیکھنے اور انہیں حاصل کرنے کی ترغیب دے گی۔

ایک خواب، ایک جدوجہد، ایک تاریخ

راجیشوری کی کہانی صرف ایک طالبہ کی کامیابی کی داستان نہیں، بلکہ یہ ایک والد کے خواب، ایک ماں کی محنت، ایک بھائی کی قربانی اور پورے سماج کی اجتماعی کوشش کا بیان ہے۔ یہ کہانی ثابت کرتی ہے کہ اگر موقع ملے، تو پہاڑوں کے پیچھے سے بھی سورج نکل سکتا ہے۔