نورالحق اگرتلہ

 سترہ سالہ تسلیمہ صرف دیکھ سکتی ہے۔ وہ بول نہیں سکتی اور سن بھی نہیں سکتی۔ وہ اپنے اردگرد کے ماحول کے اشاروں کو سمجھ کر اپنے دل کی کیفیت کے مطابق ردعمل ظاہر کرتی ہے۔ پیدائشی طور پر گونگی اور بہری تسلیمہ کا دایاں ہاتھ بھی معذور ہے۔

جسمانی معذوری کے باوجود تسلیمہ غیر معمولی ذہین ہے۔ اس نے میٹرک امتحان میں 80 فیصد نمبر حاصل کر کے سب کو حیران کر دیا۔ اپنی جسمانی کمزوریوں کو پس پشت ڈال کر اس نے صرف آنکھوں کی روشنی اور عزم کی طاقت سے اپنی تاریک زندگی کو تعلیم کے نور سے منور کرنے کا سفر شروع کیا ہے۔

تریپورہ کے دور افتادہ جمپوئی جلا بلاک کے پرمود نگر کے قبائلی اکثریتی گاؤں کی رہنے والی تسلیمہ اختر اس سال ہائر سیکنڈری کی امتحان دینے جا رہی ہے۔ اس کے والد سید علی ایک دیہاڑی مزدور ہیں۔ خاندان انتہائی غریب ہے اور رہنے کے لیے مضبوط مکان بھی موجود نہیں۔ ایسے حالات میں تسلیمہ کی تعلیمی کامیابی اس خاندان کے لیے امید کی نئی کرن ہے۔ وہ اپنی ذہنی قوت کے سہارے مسلسل حالات کا مقابلہ کر رہی ہے۔

تسلیمہ شروع سے ہی پڑھائی میں نمایاں رہی ہے۔ وہ اپنے بائیں ہاتھ سے لکھ کر میٹرک میں 80 فیصد نمبر حاصل کرنے میں کامیاب ہوئی۔ کسی خاص استاد یا اضافی رہنمائی کے بغیر وہ اب ہائر سیکنڈری کا امتحان دینے جا رہی ہے۔ تریپورہ بورڈ کے تحت اس کے امتحانات 25 تاریخ سے شروع ہوں گے۔

اس کی جدوجہد کی خبر ملنے پر بشرا م گنج تھانے کے او سی اجیت دیوبَرما اس کے گھر پہنچے۔ تریپورہ پولیس کے انسپکٹر اجیت دیوبَرما اپنی انسان دوستی کے لیے جانے جاتے ہیں۔ ایک غریب مسلم اور معذور طالبہ کی ذہانت کے بارے میں سن کر وہ خود اس کے گھر گئے۔

انہوں نے تسلیمہ کے لیے پھل غذائیت سے بھرپور اشیا اور تعلیمی سامان پیش کیا۔ ساتھ ہی کچھ مالی مدد بھی فراہم کی اور دعا کی کہ وہ 95 فیصد نمبر حاصل کر کے ہائر سیکنڈری میں کامیاب ہو۔ ان کا کہنا تھا کہ تسلیمہ کی ذہانت اور حوصلہ انہیں بہت متاثر کر گیا ہے۔

انہوں نے یقین ظاہر کیا کہ تسلیمہ 95 فیصد نمبر کے ساتھ امتحان پاس کرے گی۔ انہوں نے کالج میں داخلے سمیت ہر مرحلے پر مدد کا وعدہ کیا اور اپنا ذاتی فون نمبر بھی تسلیمہ اور اس کے والد کو دیا۔ ایک قبائلی پولیس افسر کی جانب سے ایک غریب معذور مسلم لڑکی کی تعلیم کے لیے اس تعاون کو سوشل میڈیا پر بے حد سراہا جا رہا ہے۔