نئی دہلی : آواز دی وائس

 ’آپ صرف گلاب کی خوبصورتی بیان نہیں کر سکتے۔ آپ صرف یہ نہیں کہہ سکتے کہ اس کی خوشبو کیسی ہے، پتیاں کیسی ہیں، رنگ کیسا ہے، آپ کو اس کے کانٹوں کے بارے میں بھی لکھنا ہوگا۔ یہ آپ کی ذمہ داری ہے۔‘--ا

ن تاثرات اور تجربات کا اظہار حال ہی میں انٹرنیشنل بکر پرائز جیتنے والی ہندوستانی  مصنفہ بانو مشتاق نے کیا ہے-بانو مشتاق، جو کہ کنڑ زبان  میں لکھنے والی پہلی مصنفہ ہیں جنہیں یہ عالمی ادبی اعزاز حاصل ہوا،- ایک نٹرویو میں بانو مشتاق نے کہا کہ تمام مصنفین شعوری یا لاشعوری طور پر اپنے تجربات کی بنیاد پر لکھتے ہیں۔ایک مصنف کی ذمہ داری ہے کہ وہ سچ کو بیان کرے۔

پہلی انگریزی ترجمہ شدہ کتاب: ہارٹ لیمپ

بانو مشتاق کی پہلی انگریزی ترجمہ شدہ کتاب ہارٹ لیمپ ہے، جو بارہ طاقتور مختصر کہانیوں پر مشتمل ہے۔بکر پرائز اس کتاب کی مترجم دیپا بھاستی اور بانو مشتاق، دونوں کو مشترکہ طور پر دیا گیا۔ناقدین نے ان کہانیوں کو ان کی بے باکی، نرم طنز، اور پدرشاہی، ذات پات اور مذہب پر گہری تنقید کے باعث خوب سراہا ہے۔یاد رہے کہ بانو مشتاق کا ادبی کیریئر چھ دہائیوں پر محیط ہے۔ اس دوران انہوں نے ساٹھ سے زائد کہانیاں تحریر کیں، اور ان کے چھ کہانی مجموعے شائع ہوئے جن میں وہ سماج کے کئی حساس اور پیچیدہ موضوعات کو نہایت گہرائی اور سچائی سے اجاگر کرتی نظر آتی ہیں۔اگرچہ ان کی تخلیقات کنڑ زبان میں ہیں، تاہم ان کی تحریروں میں اردو، دکنی اور عربی زبانوں کی جھلک بھی نمایاں طور پر محسوس کی جا سکتی ہے۔ یہی لسانی آمیزش ان کی کہانیوں کو نہ صرف ایک منفرد ادبی رنگ عطا کرتی ہے بلکہ ان کی ثقافتی گہرائی اور تہذیبی شعور کو بھی نمایاں کرتی ہے۔بانو مشتاق کی تحریریں محض فکشن نہیں بلکہ وہ ایک ایسے سماج کی ترجمان ہیں جہاں عورت، ذات، مذہب اور طبقاتی تفریق کے مسائل روزمرہ کی حقیقت ہیں اور یہی ان کے افسانوی سفر کو ایک مضبوط، باوقار اور دیرپا ادبی روایت میں ڈھالتا ہے۔

بانو مشتاق بکر ز ایوارڈ کے ساتھ

پابندیوں سے بغاوت

 ریاست کرناٹک کے ایک چھوٹے سے قصبے ہاسن میں 1948 میں پیدا ہونے والی بانو مشتاق نے ایک روایت پسند مسلمان گھرانے میں پرورش پائی۔ ان کے والد سرکاری ملازم تھے، جنہوں نے بانو کو آٹھ برس کی عمر میں ایک کانوینٹ اسکول میں داخل کروایا۔ اس اسکول میں تعلیم کا ذریعہ کنڑ زبان تھی، جو ریاست کی سرکاری زبان بھی ہے۔بانو نے مختصر وقت میں نہ صرف کنڑ زبان میں مہارت حاصل کر لی بلکہ یہی زبان آگے چل کر ان کی ادبی شناخت، تخلیقی اظہار اور فکری مزاحمت کا وسیلہ بن گئی۔بانو مشتاق نے لکھنے کی ابتدا اپنے طالب علمی کے زمانے میں ہی کر دی تھی۔ جب ان کے ارد گرد کی ہم عمر لڑکیاں شادی کے بندھن میں بندھ کر گھریلو زندگی میں مصروف تھیں، تب بانو نے اس روایت سے انحراف کرتے ہوئے اعلیٰ تعلیم حاصل کرنے کا عزم کیا۔ یہی فیصلہ ان کے ادبی سفر اور سماجی شعور کی بنیاد بنا۔

بانو مشتاق نے اپنی زندگی میں روایتی راستے کو چھوڑ کر ایک متبادل راستہ اختیار کیا، اور سماجی پابندیوں اور قدامت پسند سوچ کے خلاف بغاوت کی۔ایک نوجوان لڑکی کی حیثیت سے وہ محض شادی کے امکانات بہتر بنانے کے لیے لکھنے لگیں۔1948 میں ایک مسلم خاندان میں پیدا ہونے والی بانو نے اردو کے بجائے کنڑ زبان میں تعلیم حاصل کی، جب کہ زیادہ تر مسلم لڑکیاں اردو سیکھتی تھیں۔انہوں نے کالج میں تعلیم حاصل کی، صحافت کا پیشہ اپنایا اور ہائی اسکول میں تدریس بھی کی۔

بانو مشتاق نے ایک طویل عرصے تک صحافت بھی کی

گھریلو زندگی کا جمود

محبت کی شادی کے بعد بانو مشتاق کی زندگی محدود ہو کر رہ گئی۔
’مجھے علمی سرگرمیوں کی اجازت نہیں تھی۔ مجھے لکھنے کی اجازت نہیں تھی۔ میں ایک خلا میں تھی، اور اس نے مجھے نقصان پہنچایا۔

ایک واقعہ یاد کرتے ہوئے انہوں نے بتایا کہ 27 برس کی عمر میں، ایک نوجوان ماں کی حیثیت سے انہوں نے خود پر پٹرول چھڑک کر خودکشی کی کوشش کی۔ان کے شوہر نے تین ماہ کی بیٹی کو ان کے قدموں پر رکھ دیا اور گلے لگا کر اس اقدام سے باز رکھا۔یہ واقعہ ان کی کتاب کی ایک کہانی میں بھی موجود ہے، جہاں ایک بیٹی اپنی ماں کو خودکشی سے بچاتی ہے۔بانو کہتی ہیں کہ لوگ سمجھتے ہیں کہ یہ ان کی ذاتی کہانی ہے

’اگرچہ یہ عین میری کہانی نہیں ہے، لیکن شعوری یا لاشعوری طور پر، کچھ نہ کچھ مصنف کی زندگی اس کی تحریر میں جھلکتی ہے۔‘

ادبی شناخت اور شہرت

بانو مشتاق کا گھر، جو جنوبی بھارت کے چھوٹے سے شہر حسن میں واقع ہے، کتابوں سے بھرا ہوا ہے۔دیواروں پر انعامات، اسناد، اور بکر پرائز کی نقل آویزاں ہے۔وہ ہنستے ہوئے کہتی ہیں

میرا لکھنے کے لیے پیدا ہونا میرے جنم کنڈلی میں بھی لکھا تھا۔

ان کا کہنا ہے کہ اس انعام نے ان کی زندگی میں مثبت تبدیلی لائی ہے، اگرچہ شہرت کبھی کبھار بوجھ بن جاتی ہے۔’لوگوں سے مجھے کوئی مسئلہ نہیں، میں ان سے محبت کرتی ہوں۔ لیکن اس توجہ کی وجہ سے میرے پاس اب لکھنے کا وقت نہیں بچا۔ مجھے عجیب سا لگتا ہے... لکھنا میرے لیے راحت اور خوشی کا ذریعہ ہے۔ان کے مطابق لکھنے والا ہمیشہ عوام کے ساتھ ہوتا ہے۔

ادب، حقیقت اور عورت

بانو مشتاق کی تصانیف میں چھ مختصر کہانیوں کے مجموعے، ایک مضمون اور ایک نظموں کا مجموعہ شامل ہے۔ہارٹ لیمپ کی کہانیاں ان کے 1990 سے اب تک کے مجموعوں سے چنی گئی ہیں۔بکر جیوری نے ان کی کردار نگاری کی تعریف کرتے ہوئے کہا کہ ان کی کہانیوں میں پرجوش دادیاں ہوں یا مذہبی رہنما، سب ہی “بقاء اور حوصلے کی حیران کن تصاویر” پیش کرتے ہیں۔ان کی کہانیاں مسلم خواتین کے تجربات کو بیان کرتی ہیں، جن میں گھریلو تشدد، بچوں کی موت، اور ناجائز تعلقات جیسے موضوعات شامل ہیں۔بانو کہتی ہیں کہ اگرچہ ان کی مرکزی کردار مسلم خواتین ہیں، لیکن ان کے مسائل عالمی نوعیت کے ہیں:

بانو مشتاق کی ایک یادگار تصویر

’یہ (خواتین) ہر جگہ اسی قسم کے دباؤ، استحصال اور پدرشاہی کا شکار ہوتی ہیں۔ عورت، عورت ہی ہوتی ہے، چاہے دنیا کے کسی بھی کونے میں ہو۔‘

اگرچہ وہ تسلیم کرتی ہیں کہ بعض اوقات وہ لوگ بھی ان کی تحریر کو پسند نہیں کرتے جن کے لیے وہ لکھتی ہیں، لیکن وہ سچ بولنے میں مخلص ہیں:’مجھے وہ کہنا ہے جو معاشرے کے لیے ضروری ہے۔ مصنف ہمیشہ عوام کے ساتھ ہوتا ہے، عوام کے لیے، اور عوام کی خاطر۔‘

 بانو مشتاق کے اس طویل سفر میں  کئی مشکلات کا سامنا کیا مگر وہ ہمت نہیں ہاریں۔انہوں نے ادب ہی تخلیق نہیں کیا بلکہ حقوق کی جدوجہد میں بھی سرگرم رہیں۔ بانو مشتاق محض ایک مصنفہ نہیں، بلکہ وہ خواتین کے ساتھ ہونے والی ناانصافیوں کے خلاف جدوجہد اور مذہبی کشیدگی کو ختم کرنے کی کوششوں کےلیے بھی جانی جاتی ہیں

 ایک وقت ایسا بھی آیا جب اُن کے خلاف علما کی جانب سے فتویٰ جاری کیا گیا مگر بانو مشتاق نے پیچھے ہٹنے کی بجائے مزاحمت کی۔بانو مشتاق 1980 کی دہائی میں کنڑ ادب کی معروف "بندایا تحریک" سے وابستہ رہیں، جو ایک طاقتور ادبی اور سماجی تحریک تھی۔ یہ تحریک محض مزاحمت کا اظہار نہیں تھی بلکہ سماجی اور معاشی انصاف کی داعی بھی تھی۔بندایا تحریک نے معاشرے کے ان طبقات کو آواز دی جنہیں طویل عرصے سے خاموش یا نظرانداز کیا جا رہا تھا — خصوصاً مسلمان، دلت، اور دیگر پسماندہ طبقات۔ بانو مشتاق نے اس تحریک میں اپنی تحریروں اور فکری وابستگی کے ذریعے نہ صرف خواتین کے مسائل کو نمایاں کیا بلکہ طبقاتی اور صنفی ناانصافی کے خلاف ایک ادبی بغاوت کو بھی جلا بخشی۔