ساجد رسول ۔ سری نگر

کشمیر تاریخی طور پر صوفیانہ تہذیب و ثقافت کامرکز رہا ہے۔اسے صوفیوں اور ریشیوں کا مرکز تصور کیا جاتا ہے کیونکہ یہاں کی دہائیوں پرانی صوفی اور ریشی روایات کی ایک مثال قائم ہیں - اسی صوفیانہ تہذیب و ثقافت کی روایات کا ایک حصہ صوفی موسیقی ہے جو  کشمیر میں معدوم ہوتی نظر آرہی ہے کیونکہ نوجوان نسل کا صوفی موسیقی کی طرف رحجان کم ہوتا جارہا ہے- اسی فن کے تحفظ اور بقاء کی خاطر کچھ کشمیری نوجوان لڑکیوں نے ایک گروپ تشکیل دیا ہے جسے کشمیر میں صوفیانہ گروپ کے نام سے جانا جاتا ہے - ان دنوں کشمیر اور کشمیر سے باہر بھی صوفیانہ گروپ کے چرچے ہیں اور خاص کر سماجی رابطے کی ویب سائٹس فیس بُک اور ٹویٹر پر صوفیانہ گروپ کو داد و تحسین دی جارہی ہے۔

صوفیانہ گروپ کی تاریخ

پانچ سال شمالی کشمیر کے ضلع بانڈی پورہ کے ایک دور افتادہ گاؤں گنستان میں ایک دوشیزہ عرفانہ نے اس گروپ کی بنیاد ڈالی اور انہوں نے اپنے گھر میں اپنے والد سے کہا کہ وہ انہیں صوفی موسیقی کا ہنر سکھائیں - عرفانہ کے والد چونکہ ایک سنتور ماسٹر ہیں اور سالوں سے سنتور بجاتے آئے ہیں تو انہوں نے عرفانہ کو صوفیانہ موسیقی سکھانا شروع کیا-

عرفانہ نے دھیرے دھیرے اپنے چھوٹی بہنوں کے ساتھ اپنے گھر کے اندر جب صوفی کلام کو روائتی دھنوں کے ساتھ گانا شروع کیا تو ان کے آس پاس رہنے والی لڑکیاں بھی اس کی طرف مائل ہوگئی اور دو مزید لڑکیوں نے یہ گروپ جوائن کرلیا- پانچ لڑکیوں پر مشتمل اس گروپ میں عرفانہ کی دو بہنیں بھی شامل ہے اور عرفانہ نے ہی اس گروپ کو صوفی گروپ کا نام دیا اور وہیں اس کی سربراہی کررہی ہیں –

جدوجہد کی کہانی

صوفیانہ گروپ سے تعلق رکھنے والی پانچوں لڑکیاں ایک غریب اور عام گھرانے سے تعلق رکھنے والی ہیں اور ان کے مطابق انہوں کچھ پروگرامز کرکے جو پیسے اکٹھے کئے اسے سے صوفیانہ موسیقی کو درکار موسیقی کےآلات خرید کر لائے - اس پہل میں ان کو کسی بھی سرکاری یا غیر سرکاری ادارے کا تعاون حاصل نہیں ہے بلکہ وہ یہ اپنے بل پر کررہی ہے-

اس گروپ کی سربراہ عرفانہ ہیں جو اس وقت کشمیر یونیورسٹی کے شعبہ موسیقی میں زیر تعلیم ہیں - آواز دی وائس کے ساتھ بات کرتے ہوئے انہوں نے بتایا کہ انہوں اس طرح کے موضوع کو اس لئے اختیار کیا کیونکہ کشمیر میں نئ نسل کا اس کی جانب رحجان بہت کم پایا جاتا ہے۔

وہ چاہتی ہیں کہ جدید موسیقی کی روایات سے ہٹ کر وہ روائتی موسیقی کے لئے کام کریں اس کا تحفظ کریں اور اس کی بقا کے لئے کوشش کریں - عرفانہ نے بتایا "اگرچہ اس پہل کو شروع کرنے میں ہمیں کافی دشواریوں کا سامنا کرنا پڑا - ۔۔مالی مشکلات اور مسائل کے علاوہ اگرچہ کئ حلقوں کی جانب سے سوشل میڈیا پر نفرت کا اظہار بھی دیکھنے کو ملا تاہم مجموعی طور پر ہماری اس پہل کو سراہا گیا اور بہت سارے لوگوں نے ہمیں بہت زیادہ پیار و محبت سے نوازا"

والد ہیں استاد

صوفیانہ گروپ میں شامل تمام لڑکیوں کو عرفانہ کے والد محمد یوسف تربیت دے رہے ہیں - انہوں نے ہی اس گروپ کو صوفیانہ موسیقی کے مختلف پہلوؤں سے روشناس کرایا اور انہیں اس کے اصول و ضوابط سے آگاہ کیا- محمد یوسف نے آواز دی وائس کو بتایا" صوفیفی شاعری اور موسیقی کشمیر کی اصل پہچان ہیں اس روایت کو یہاں کے اولیاء اور بزرگوں نے آگے بڑھایا ہے جس کو ہمیں تادیر باقی رکھنا چاہیے - میرا دل مجروح ہوتا ہے جب میں دیکھتا ہوں کہ یہ فن دھیرے دھیرے دم توڑ رہا ہے اور اس کی بقا کے لئے کوئی ٹھوس اقدامات نہیں کئے جارہے ہیں " ان کا ماننا ہے کہ صوفیانہ گروپ میں شامل ان کی بیٹیوں اور دیگر لڑکیوں کی کوشش ایک دن ضرور رنگ لائے گی اگر اس کوشش میں انہیں فن و موسیقی پر کام کرنے والے سرکاری و غیر سرکاری ادارے انہیں تعاون فراہم کریں۔

کشمیر سے پھیلی آواز

پانچ سال قبل شروع کئے گئے صوفیانہ گروپ نے  اب کشمیر کے علاوہ ملک کی دوسری ریاستوں میں بھی کئ اہم پروگراموں میں اپنے فن کا مظاہرہ کیا ہے اور اس گروپ میں شامل لڑکیوں کو کئ اعزازات سے بھی نوازا گیا ہے- اب انہیں کشمیر میں منعقد کئے جانے والے اکثر پروگراموں میں بھی مدعو کیا جاتا ہیں اور ان کی سراہنا کی جاتی ہے –

 اس گروپ میں شامل ایک اور لڑکی ریحانہ کا ماننا ہے کہ اگر فن و موسیقی پر کام کرنے والے سرکاری و غیر سرکاری ادارے ان کی اس کوشش میں انہیں مدد کریں تو ان کی یہ کوشش مزید کامیابی سے ہمکنار ہوسکتی ہے اور وہ صوفی موسیقی کے شعبے میں مزید بہتر طریقے سے اپنا رول. نبھا سکتے ہیں - انہوں نے بتایا کہ وہ پرعزم اور پر امید ہے کہ صوفی موسیقی کو دوبارہ زندہ کرنے اور اس کے تحفظ کے لئے ان کی یہ کوشش صد فیصد کامیابی سے ہمکنار ہوگی