اونیکا ماہیشوری

تیزی سے بدلتی طرزِ زندگی، بڑھتی آلودگی، ذہنی دباؤ اور غیر متوازن غذا نہ صرف ہماری عمومی صحت کو متاثر کر رہی ہے بلکہ تولیدی صلاحیت بھی اس سے بری طرح متاثر ہو رہی ہے۔ بانجھ پن کے کیسز میں مسلسل اضافہ ہو رہا ہے اور اب کم عمر شادی شدہ جوڑے بھی اس مسئلے کا سامنا کر رہے ہیں۔ایسے حالات میں بانجھ پن سے متعلق غلط فہمیوں، درست علاج اور احتیاطی تدابیر سے آگاہی بے حد ضروری ہو گئی ہے۔ انہی موضوعات پر آواز دی وائس نے ماہر امراضِ نسواں، زچگی اور آئی وی ایف اسپیشلسٹ ڈاکٹر شاہدہ نغمہ سے خصوصی گفتگو کی۔

اس انٹرویو میں ڈاکٹر شاہدہ نغمہ نے بانجھ پن میں اضافے کی وجوہات، آئی وی ایف سے متعلق عام غلط فہمیوں، علاج کے مختلف مراحل، خواتین کی تولیدی صحت کو محفوظ رکھنے کے طریقوں اور اپنے پیشہ ورانہ سفر پر تفصیل سے روشنی ڈالی۔ڈاکٹر شاہدہ نغمہ گزشتہ 10 برس سے زائد عرصے سے بانجھ پن اور آئی وی ایف کے شعبے میں خدمات انجام دے رہی ہیں۔ انہوں نے ہندوستان کے ممتاز میڈیکل کالجوں اور اسپتالوں سے اعلیٰ تربیت حاصل کی ہے۔ ان کا کہنا ہے کہ ہر مریض کی جسمانی کیفیت اور طبی ضرورت مختلف ہوتی ہے، اس لیے ہر فرد کو اس کی ضرورت کے مطابق علاج فراہم کیا جانا چاہیے۔

 سوال: سب سے پہلے اپنے بارے میں اور اپنے سینٹر کے بارے میں بتائیے۔

سوال: آج کل بانجھ پن کے کیسز میں تیزی سے اضافہ کیوں ہو رہا ہے؟

ڈاکٹر شاہدہ نغمہ:آج بانجھ پن تیزی سے بڑھ رہا ہے اور سب سے زیادہ تشویش کی بات یہ ہے کہ اب 21 اور 22 سال کی نوجوان خواتین میں بھی یہ مسئلہ سامنے آ رہا ہے۔اس کی کئی وجوہات ہیں۔ شہروں میں آلودہ ہوا، آلودہ پانی اور کیمیکل ملا خوراک کا استعمال خواتین کے بیضوں اور مردوں کے اسپرم کی تعداد اور معیار دونوں کو متاثر کر رہا ہے۔اس کے علاوہ مصروف طرزِ زندگی، ورزش کی کمی، غیر متوازن غذا، پروٹین، وٹامنز اور منرلز کی کمی بھی تولیدی صلاحیت کو کمزور کر رہی ہے۔

پروسیسڈ فوڈ کا بڑھتا استعمال، ذہنی دباؤ، طویل سفر، بے قاعدہ معمولات، ناکافی نیند، زیادہ اسکرین ٹائم، لیپ ٹاپ کا مسلسل استعمال، تمباکو نوشی اور شراب نوشی بھی بانجھ پن کے بڑھتے ہوئے اسباب میں شامل ہیں۔ پہلے یہ عادتیں زیادہ تر مردوں میں دیکھی جاتی تھیں، لیکن اب خواتین میں بھی ان کا رجحان بڑھ رہا ہے۔

سوال: اگر کوئی جوڑا آپ کے پاس آتا ہے تو آپ سب سے پہلے کیا مشورہ دیتی ہیں؟

ڈاکٹر شاہدہ نغمہ:آج کل بہت سے نوجوان شادی سے پہلے ہی مشورہ لینے آتے ہیں۔ وہ جاننا چاہتے ہیں کہ مستقبل میں کسی مشکل سے بچنے کے لیے کون کون سے طبی ٹیسٹ پہلے ہی کروا لینے چاہییں۔ایسے افراد کے لیے ہم سب سے پہلے چند بنیادی طبی جانچ کراتے ہیں جن میں ہیموگلوبن، وٹامن B12، وٹامن D3، تھائرائیڈ ٹیسٹ، پرولیکٹن، ہارمون پروفائل اور وائرل مارکر ٹیسٹ شامل ہوتے ہیں۔

خواتین میں یہ بھی جانچا جاتا ہے کہ بیضہ دانی میں بیضوں کی تعداد مناسب ہے یا نہیں۔ اس مقصد کے لیے ماہواری کے دوسرے یا تیسرے دن الٹراساؤنڈ کے ذریعے اینٹرل فولیکل کاؤنٹ کیا جاتا ہے یا پھر اے ایم ایچ ٹیسٹ کرایا جاتا ہے۔ اس ٹیسٹ سے معلوم ہوتا ہے کہ مستقبل میں حمل کے لیے خاتون کے پاس مناسب تعداد میں بیضے موجود ہیں یا نہیں۔اسی طرح مردوں کا سیمن اینالیسس کیا جاتا ہے جس میں اسپرم کی تعداد، رفتار اور ساخت کا جائزہ لیا جاتا ہے۔

سوال: آئی وی ایف کیا ہے؟ اسے آسان زبان میں سمجھائیے۔

ڈاکٹر شاہدہ نغمہ:آئی وی ایف یعنی ان وٹرو فرٹیلائزیشن ایک ایسا طریقۂ علاج ہے جس میں خاتون کے بیضے اور مرد کے اسپرم کو جسم سے باہر لیبارٹری میں ملا کر ایمبریو تیار کیا جاتا ہے۔یہ ایمبریو تقریباً 5 دن تک لیبارٹری میں نشوونما پاتا ہے اور اس مرحلے کو بلاسٹوسسٹ کہا جاتا ہے۔ اس کے بعد اسے خاتون کے رحم میں منتقل کر دیا جاتا ہے تاکہ قدرتی انداز میں حمل قائم ہو سکے۔ابتدا میں آئی وی ایف صرف ان خواتین کے لیے متعارف کرایا گیا تھا جن کی دونوں فیلوپین ٹیوبیں بند ہوتی تھیں اور جن میں بیضہ اور اسپرم قدرتی طور پر آپس میں نہیں مل سکتے تھے۔

لیکن اب یہ طریقۂ علاج کئی دوسری صورتوں میں بھی استعمال کیا جاتا ہے۔ مثلاً مردوں میں اسپرم کی تعداد یا معیار کم ہونا، جنسی کمزوری، ایک یا دونوں فیلوپین ٹیوبوں کا بند ہونا، پی سی او ایس یا بیضہ بننے کے مسائل اور بیضوں کی نشوونما میں خرابی۔ان تمام صورتوں میں بیضے حاصل کرکے انہیں لیبارٹری میں اسپرم کے ساتھ بارآور کیا جاتا ہے اور ایمبریو تیار ہونے کے بعد اسے رحم میں منتقل کیا جاتا ہے۔

سوال: کیا ہر بانجھ پن میں آئی وی ایف ضروری ہوتا ہے؟

ڈاکٹر شاہدہ نغمہ:ہرگز نہیں۔اگر معالج مکمل طبی تاریخ لینے کے بعد درست جانچ کرے تو ہر مریض کو آئی وی ایف کی ضرورت نہیں پڑتی۔تقریباً 80 فیصد جوڑے شادی کے پہلے سال کے دوران قدرتی طور پر والدین بن جاتے ہیں جبکہ زیادہ تر باقی جوڑے دوسرے سال میں حمل حاصل کر لیتے ہیں۔صرف تقریباً 10 فیصد مریضوں کو آئی یو آئی یا آئی وی ایف جیسے جدید علاج کی ضرورت پیش آتی ہے۔اگر جوڑے کو حمل ٹھہرنے کے موزوں دنوں، بیضہ خارج ہونے کے وقت اور حمل کے قدرتی عمل کے بارے میں درست رہنمائی دی جائے تو اکثر لوگ کسی جدید علاج کے بغیر ہی والدین بن سکتے ہیں۔البتہ اگر مسئلہ سنگین ہو، مثلاً فیلوپین ٹیوبیں بند ہوں، تو پھر آئی وی ایف بہترین علاج ثابت ہوتا ہے۔

سوال: آئی وی ایف سے پہلے کون سے علاج کیے جاتے ہیں؟

ڈاکٹر شاہدہ نغمہ:ہماری پہلی کوشش ہمیشہ قدرتی حمل کی ہوتی ہے۔اگر اس میں کامیابی نہ ملے تو ادویات کے ذریعے بیضہ بننے کے عمل کو بہتر بنایا جاتا ہے اور فولیکل مانیٹرنگ کی جاتی ہے۔ضرورت پڑنے پر آئی یو آئی کیا جاتا ہے، جس میں شوہر کے اسپرم کو لیبارٹری میں صاف اور تیار کرنے کے بعد براہ راست رحم میں داخل کیا جاتا ہے تاکہ حمل کے امکانات بڑھ جائیں۔اگر ان تمام طریقوں سے بھی کامیابی نہ ملے تو پھر آئی وی ایف کی سفارش کی جاتی ہے۔

 سوال: آئی وی ایف کے بارے میں لوگوں میں کون کون سی غلط فہمیاں پائی جاتی ہیں؟

ڈاکٹر شاہدہ نغمہ:آئی وی ایف سے متعلق معاشرے میں کئی غلط تصورات موجود ہیں۔ سب سے عام غلط فہمی یہ ہے کہ اس علاج میں استعمال ہونے والے بیضے یا اسپرم کسی دوسرے شخص کے ہوتے ہیں، جبکہ حقیقت یہ ہے کہ زیادہ تر معاملات میں میاں بیوی کے اپنے ہی بیضے اور اسپرم استعمال کیے جاتے ہیں۔

ایک اور غلط تصور یہ ہے کہ آئی وی ایف کے ذریعے ہمیشہ لڑکا پیدا ہوتا ہے۔ اسی طرح بہت سے لوگ سمجھتے ہیں کہ اس طریقۂ علاج سے لازماً جڑواں، تین یا چار بچے پیدا ہوتے ہیں، حالانکہ یہ تمام باتیں حقیقت پر مبنی نہیں ہیں۔ڈاکٹر شاہدہ کے مطابق علاج شروع کرنے سے پہلے مریض اور اس کے اہل خانہ کی مکمل رہنمائی کی جاتی ہے تاکہ ان کے ذہن میں موجود تمام خدشات اور غلط فہمیاں دور ہو جائیں اور وہ اعتماد کے ساتھ علاج کا آغاز کر سکیں۔

سوال: آئی وی ایف کی کامیابی کی شرح کتنی ہوتی ہے؟

ڈاکٹر شاہدہ نغمہ:آئی وی ایف کی کامیابی کا انحصار مریض کی عمر، طبی کیفیت، بیضوں اور اسپرم کے معیار اور لیبارٹری کی سہولیات پر ہوتا ہے۔بہترین اور جدید مراکز میں بھی کامیابی کی شرح عموماً 45 سے 55یصد کے درمیان ہوتی ہے۔اگر کوئی ادارہ 100 فیصد کامیابی کی ضمانت دے تو مریضوں کو محتاط رہنا چاہیے، کیونکہ طب میں ایسی ضمانت دینا درست نہیں۔مریضوں کو علاج سے پہلے یہ ضرور معلوم کرنا چاہیے کہ متعلقہ سینٹر کی گزشتہ ایک سال کی حقیقی کامیابی کی شرح کیا رہی ہے۔

سوال: آئی وی ایف کے دوران مریضوں کو کن باتوں کا خیال رکھنا چاہیے؟

ڈاکٹر شاہدہ نغمہ:آئی وی ایف کے دوران میاں بیوی کا ایک دوسرے کی جذباتی اور ذہنی طور پر حوصلہ بڑھانا بے حد ضروری ہے۔اس کے علاوہ چند اہم احتیاطی تدابیر پر عمل کرنا چاہیے۔تمام ادویات اور انجیکشن مقررہ وقت پر استعمال کیے جائیں۔کسی بھی انجیکشن کا وقت ضائع نہ ہونے دیا جائے۔ڈاکٹر کی ہدایات کے مطابق متوازن غذا اختیار کی جائے۔روزانہ مناسب مقدار میں پانی پیا جائے۔جسمانی صحت اور ذہنی سکون برقرار رکھا جائے تاکہ علاج کے کامیاب ہونے کے امکانات زیادہ ہوں۔

سوال: خواتین اپنی تولیدی صحت کیسے محفوظ رکھ سکتی ہیں؟

ڈاکٹر شاہدہ نغمہ:خواتین کو صحت مند طرزِ زندگی اپنانا چاہیے کیونکہ یہی اچھی تولیدی صحت کی بنیاد ہے۔روزانہ کم از کم 7 سے 8 گھنٹے کی نیند لیں۔ذہنی دباؤ کو کم رکھنے کی کوشش کریں۔اپنے وزن کو متوازن رکھیں۔روزانہ ورزش یا جسمانی سرگرمی کو معمول بنائیں۔پروٹین سے بھرپور متوازن غذا استعمال کریں۔خشک میوہ جات، اخروٹ اور صحت بخش چکنائی والی غذاؤں کو خوراک کا حصہ بنائیں۔خصوصاً اگر حمل کا ارادہ ہو تو تمباکو نوشی اور شراب نوشی سے مکمل پرہیز کریں۔

سوال: آپ نے ڈاکٹر بننے کا فیصلہ کیوں کیا؟

ڈاکٹر شاہدہ نغمہ:ڈاکٹر بننے کی ترغیب مجھے اپنے نانا سے ملی، جو برطانیہ میں بچوں کے امراض کے ماہر ڈاکٹر تھے۔جب بھی وہ ہندوستان آتے تھے تو میں ان کے ساتھ بیٹھ کر ان کے طبی تجربات اور ڈاکٹر بننے کے سفر کے بارے میں گھنٹوں سوالات کیا کرتی تھی۔ان کی شخصیت اور خدمات نے مجھے بے حد متاثر کیا اور اسی وقت میں نے فیصلہ کر لیا تھا کہ میں بھی ڈاکٹر بنوں گی۔

سوال: آپ کی تعلیم کہاں سے ہوئی؟

ڈاکٹر شاہدہ نغمہ:میری ابتدائی تعلیم دھنباد کے کمل کانونٹ اسکول سے ہوئی، جبکہ بعد کی تعلیم دہلی کے آرمی پبلک اسکول، دھولا کنواں سے مکمل کی۔اس کے بعد میں نے آرمی کالج آف میڈیکل سائنسز سے ایم بی بی ایس کیا اور وی ایم ایم سی و صفدر جنگ اسپتال، نئی دہلی سے اپنی طبی تربیت اور انٹرن شپ مکمل کی۔سال 2015 میں وی ایم ایم سی اور سچیٹا کرپلانی اسپتال، نئی دہلی سے ایم ایس (امراضِ نسواں و زچگی) میں داخلہ لیا اور تین سالہ تعلیم مکمل کی۔سال 2018 سے 2021 تک اسی ادارے میں سینئر ریزیڈنسی کی۔بعد ازاں سر گنگا رام اسپتال میں ڈاکٹر آبھا کی نگرانی میں ایک سالہ آئی وی ایف فیلوشپ مکمل کی۔فی الحال میں اپنے نجی کلینک میں خدمات انجام دے رہی ہوں۔

سوال: کیا اس پیشے میں کبھی سماجی تعصب یا رکاوٹوں کا سامنا کرنا پڑا؟

ڈاکٹر شاہدہ نغمہ:ذاتی طور پر مجھے کسی سماجی تعصب کا سامنا نہیں کرنا پڑا۔البتہ سرکاری اسپتالوں میں کام کے دوران سب سے بڑا چیلنج مریضوں کی غیر معمولی تعداد اور ڈاکٹروں کی کمی تھی۔ایسے ماحول میں ڈاکٹر مسلسل ذہنی دباؤ اور شدید مصروفیت کا شکار رہتے ہیں۔میرا ماننا ہے کہ اس پیشے میں کامیابی کے لیے مضبوط ارادہ، صبر، خدمت کا جذبہ اور مستقل مزاجی سب سے زیادہ اہم ہیں۔ بہت سے ڈاکٹر شدید دباؤ کی وجہ سے ہمت ہار جاتے ہیں، لیکن اگر انسان اپنے مقصد پر قائم رہے تو وہ نہ صرف ایک کامیاب ڈاکٹر بلکہ ایک بہتر انسان بھی بن سکتا ہے۔