عریف الاسلام۔ گوہاٹی۔

مصنوعی ذہانت اور مشینی زندگی کے اس دور میں لوگ ذہنی سکون کے لیے مختلف راستے اختیار کرتے نظر آتے ہیں۔ ایسے وقت میں گوہاٹی کی ایک نوجوان خاتون نے قرآن اور گیتا کا مطالعہ کرکے ذہنی سکون حاصل کیا اور بڑی کامیابی حاصل کی۔ گوہاٹی کی رہنے والی Jasmine Sultana نے حال ہی میں اعلان ہونے والے Assam Public Service Commission کے کمبائنڈ کمپیٹیٹو امتحان میں نمایاں کامیابی حاصل کی ہے۔ وہ ذہنی سکون کے لیے اکثر قرآن مجید اور گیتا کا مطالعہ کرتی ہیں۔

جاسمین سلطانہ نے اس امتحان میں Assam Police Service میں چھٹا مقام حاصل کیا۔ ان کی کامیابی صرف ایک طالبہ کی کامیابی نہیں بلکہ زبان پر فخر۔ خواتین کی بااختیاری اور مسلسل محنت کی ایک روشن مثال بھی ہے۔

جاسمین سلطانہ نے اپنی تعلیمی زندگی کا آغاز آسامیہ میڈیم سے کیا۔ انہوں نے 2016 تک گوہاٹی کے Tarini Choudhury Government Girls’ Higher Secondary School میں تعلیم حاصل کی اور بعد میں Cotton University سے پولیٹیکل سائنس میں بیچلر اور ماسٹر کی ڈگری حاصل کی۔ آٹھویں جماعت میں ایک دوست کے مشورے نے ان کی زندگی کا رخ بدل دیا۔ اس دوست نے کہا کہ اگر سماج کو بدلنا ہے تو نظام کے اندر جانا ہوگا۔ اسی دن جاسمین نے سول سروس میں جانے کا فیصلہ کر لیا۔

جاسمین بتاتی ہیں کہ آٹھویں جماعت میں انہیں سول سروس کے بارے میں معلوم ہوا۔ وہ اور ان کی دوست سسمیتا اکثر لائبریری کے سامنے بیٹھ کر سماج اور نظام کے بارے میں بات کرتے تھے۔ سسمیتا نے انہیں بتایا کہ جو لوگ سول سروس کا امتحان پاس کرتے ہیں وہ پالیسیاں بنانے میں کردار ادا کرتے ہیں۔ اسی دن انہوں نے فیصلہ کر لیا کہ مستقبل میں وہ سول سروس کا امتحان دیں گی۔

جاسمین کی کامیابی کا ایک اہم پہلو آسامیہ میڈیم پر ان کا اعتماد ہے۔ موجودہ دور میں جب انگریزی کو ذہانت کا معیار سمجھا جاتا ہے انہوں نے آسامیہ زبان کو اپنا ذریعہ تعلیم بنایا۔ ان کا کہنا ہے کہ زبان کبھی بھی صلاحیت کے راستے میں رکاوٹ نہیں بن سکتی۔ آسامیہ میں مناسب تعلیمی مواد نہ ہونے کے باوجود انہوں نے انگریزی کتابوں کا مطالعہ کیا اور خود انہیں آسامیہ میں ترجمہ کرکے نوٹس تیار کیے۔

جاسمین کے مطابق انہوں نے امتحان آسامیہ میڈیم میں دیا اور سب سے بڑا مسئلہ یہ تھا کہ آسامیہ میں مطالعے کا مواد دستیاب نہیں تھا۔ اس لیے انہوں نے انگریزی کتابیں پڑھ کر آسامیہ میں اپنے نوٹس بنائے۔ پہلی مرتبہ امتحان دینے کے وقت ان کے جوابی پرچوں کو جانچنے والا بھی کوئی نہیں تھا۔ بعد میں اپنی کارکردگی بہتر بنانے کے لیے انہوں نے رہنمائی حاصل کی اور پرتھا سر نے ان کے جوابی پرچوں کا جائزہ لیا جس سے انہیں کافی فائدہ ہوا۔

جاسمین سلطانہ نے کووڈ لاک ڈاؤن کے بعد پبلک سروس کمیشن کے امتحان کی تیاری شروع کی۔ 2023 میں انہوں نے پہلی بار امتحان دیا مگر مین امتحان میں کامیاب نہ ہو سکیں۔ 2024 میں وہ ابتدائی امتحان بھی پاس نہ کر سکیں۔ دو مرتبہ ناکامی کے باوجود انہوں نے ہمت نہیں ہاری۔ دن رات محنت جاری رکھی اور 2025 کے امتحان میں بہترین کارکردگی دکھاتے ہوئے آسام پولیس سروس میں چھٹا مقام حاصل کیا۔

جاسمین صرف ذہین طالبہ ہی نہیں بلکہ بے حد محنتی بھی ہیں۔ اے پی ایس سی کی تیاری کے ساتھ ساتھ وہ Akashvani سے بھی وابستہ رہیں اور SPM IAS Academy میں بھی کام کیا۔ دن میں دفتر کا کام اور رات میں مسلسل مطالعہ۔ اسی محنت نے انہیں کامیابی کی بلندیوں تک پہنچایا۔

درمیانے طبقے سے تعلق رکھنے والی جاسمین کو سماجی دباؤ کا بھی سامنا کرنا پڑا۔ رشتہ داروں کی جانب سے شادی کی باتیں بھی ہوتی رہیں اور سول سروس کے طویل انتظار کا مرحلہ بھی تھا مگر اس پورے سفر میں ان کے خاندان نے ان کا بھرپور ساتھ دیا۔ ان کے والدین نے ان کے خواب کو زندہ رکھنے میں اہم کردار ادا کیا۔

جاسمین سلطانہ کے مطابق ذہنی سکون کے لیے دو اہم کتابیں قرآن اور گیتا ہیں۔ ان کا کہنا ہے کہ ہم ایک سیکولر جمہوری ملک میں رہتے ہیں اس لیے ہر مذہبی کتاب کو پڑھا جا سکتا ہے۔ اگر کوئی قرآن پڑھتا ہے تو اس کا یہ مطلب نہیں کہ وہ گیتا نہیں پڑھ سکتا۔ دونوں مقدس کتابیں انسان کو زندگی کا درست راستہ دکھاتی ہیں۔ طویل تیاری کے دوران ذہنی طور پر مضبوط رہنا بہت ضروری ہوتا ہے اور قرآن اور گیتا انہیں خوشی اور سکون فراہم کرتے ہیں۔ ان کے مطابق تمام مذہبی کتابیں انسانیت کا درس دیتی ہیں اور ایک سول سروس افسر کے لیے برداشت اور رواداری ضروری ہے جو ان کتابوں سے سیکھنے کو ملتی ہے۔

جاسمین سلطانہ نے ابتدائی تعلیم پن بازار آدرش پرائمری اسکول سے حاصل کی۔ اس کے بعد انہوں نے ہائی اسکول اور ہائر سیکنڈری تعلیم ٹی سی گورنمنٹ گرلز ہائر سیکنڈری اسکول سے مکمل کی اور پھر Cotton University سے اعلیٰ تعلیم حاصل کی۔

ان کے مطابق کامیابی کی اصل کنجی نظم و ضبط اور تسلسل ہے۔ انہوں نے آسامیہ میڈیم کے طلبہ سے اپیل کی کہ وہ احساس کمتری کا شکار نہ ہوں۔ ان کا کہنا ہے کہ یہ اہم نہیں کہ آپ نے کتنے گھنٹے پڑھائی کی بلکہ یہ اہم ہے کہ آپ نے کتنی توجہ اور سمجھ کے ساتھ مطالعہ کیا۔

 

 

 

 

View this post on Instagram

 

 

 

 

 

 

 

 

 

 

 

A post shared by The Edge (@theedge.india)

آج جاسمین سلطانہ آسامیہ میڈیم کے ہزاروں طلبہ کے لیے امید کی کرن بن چکی ہیں۔ انہوں نے ثابت کر دیا کہ اگر انسان اپنے مقصد پر مرکوز رہے اور محنت کرنے کا حوصلہ رکھتا ہو تو کوئی رکاوٹ اس کی کامیابی کے راستے میں حائل نہیں ہو سکتی۔ بطور پولیس افسر سماج میں تبدیلی لانے کا ان کا خواب اب حقیقت بنتا جا رہا ہے۔