فرحان اسرائیلی : جے پور 

کہا جاتا ہے کہ ہنر کسی سرحد یا چار دیواری کا محتاج نہیں ہوتا لیکن جب ہنر کو خاندان کا ساتھ اور سوشل میڈیا کے پر مل جائیں تو وہ آسمان کی بلندیوں کو چھونے لگتا ہے۔ گلابی شہر جے پور کے ایک سادہ سے گھر سے شروع ہونے والی یہ کہانی آج ڈیجیٹل دنیا میں ایک سنہری باب رقم کر رہی ہے۔ یہ کہانی دو سگی بہنوں فرحین خانم اور تہرین خانم کی ہے جنہوں نے اپنی قینچی گوند رنگین کاغذوں اور موتیوں کے جادو سے نہ صرف کروڑوں دل جیتے بلکہ گھر بیٹھے کامیابی کی ایک ایسی سلطنت قائم کی جس کی گونج آج سات سمندر پار تک سنائی دے رہی ہے۔

 حجاب کی پابند اور دینی تعلیم سے آراستہ یہ دونوں بہنیں آج اس نسل کے لئے مثال بن گئی ہیں جو اپنی شناخت اور روایات کے ساتھ جدید دنیا میں آگے بڑھنا چاہتی ہے۔ فرحین اور تہرین کے اس سفر کی جڑیں ان کے بچپن اور ان کی امی نویدہ خانم کی محبت بھری تربیت میں پوشیدہ ہیں۔ امی کو اکثر گھر کے بے کار سامان سے خوبصورت آرٹ اور کرافٹ بناتے دیکھ کر دونوں بہنوں کے دل میں اس فن کے لئے دلچسپی پیدا ہوئی۔

 فرحین یاد کرتے ہوئے بتاتی ہیں کہ انہوں نے اس کے لئے کوئی پیشہ ورانہ تربیت حاصل نہیں کی بلکہ امی کو کام کرتے دیکھتے دیکھتے ہی ان کے ہاتھوں کی صفائی ان کے ہنر میں شامل ہوتی گئی۔ تہرین بتاتی ہیں کہ امی کا یہ فن پہلے صرف گھر کی چار دیواری تک محدود تھا کیونکہ اس وقت سوشل میڈیا کا پلیٹ فارم دستیاب نہیں تھا۔ لیکن جب ان بہنوں نے ٹیکنالوجی کی طاقت کو سمجھا تو انہوں نے طے کیا کہ وہ امی سے ملی اس وراثت کو دنیا کے کونے کونے تک پہنچائیں گی۔

تقریباً 3 سال پہلے شروع ہونے والی یہ چھوٹی سی کوشش آج ایک بڑی ڈیجیٹل داستان بن چکی ہے۔ شروعات بہت چیلنجنگ تھی۔ تہرین مسکراتے ہوئے یاد کرتی ہیں کہ پہلی ویڈیو اپلوڈ کرنے کے بعد کئی دنوں تک کوئی ویوز نہیں آئے لیکن امی ہمیشہ کہتی تھیں کہ محنت کبھی ضائع نہیں جاتی۔ اسی حوصلے کا نتیجہ ہے کہ آج چھوٹی بہن تہرین خانم کے یوٹیوب چینل پر 13.4 ملین سے زیادہ سبسکرائبرز ہیں جبکہ فرحین خانم کے چینل کو بھی 1.1 ملین سے زیادہ لوگ فالو کرتے ہیں۔

انسٹاگرام فیس بک اور اسنیپ چیٹ کو ملا کر ان کے مداحوں کی تعداد کروڑوں تک پہنچ چکی ہے۔ تہرین کے چینل پر اب ڈائمنڈ پلے بٹن کی آمد کی آہٹ سنائی دے رہی ہے جبکہ دونوں بہنوں کے پاس پہلے سے سلور اور گولڈ پلے بٹن موجود ہیں۔ ہندوستان بک آف ریکارڈس سے لے کر آئیکونک آرٹ اینڈ کرافٹ کریئیٹر آف دی ایئر جیسے متعدد اعزازات ان کی کامیابی کی گواہی دیتے ہیں۔

 اس کامیابی کے پیچھے پس پردہ محنت بھی کم نہیں ہے۔ والد رئیس خان اور بھائی جنید و شعیب خان اس سفر میں ان کے سب سے مضبوط ستون رہے ہیں۔ تکنیکی معاملات سنبھالنے والے بڑے بھائی جنید بتاتے ہیں کہ اسکرین پر نظر آنے والی ایک منٹ کی ویڈیو کے پیچھے گھنٹوں کی محنت ہوتی ہے۔ پہلے کرافٹ تیار کیا جاتا ہے پھر ریکارڈنگ ایڈیٹنگ اور آخر میں وائس اوور شامل کیا جاتا ہے تاکہ بچے ہر مرحلہ آسانی سے سمجھ سکیں۔ دونوں بہنیں مل کر روزانہ 4 سے 5 ویڈیوز اپلوڈ کرتی ہیں اور اب تک وہ تقریباً 5500 سے زیادہ ویڈیوز دنیا کے ساتھ شیئر کر چکی ہیں۔

 فرحین اور تہرین کی کہانی کا سب سے متاثر کن پہلو ان کی سادگی اور مذہبی جڑوں سے وابستگی ہے۔ دونوں بہنوں نے ایم اے تک عصری تعلیم حاصل کرنے کے ساتھ ساتھ 5 سال کا عالمہ کورس بھی مکمل کیا ہے۔ وہ ہر ویڈیو میں حجاب کی پابندی کے ساتھ نظر آتی ہیں۔ فرحین کا ماننا ہے کہ دینی اور عصری تعلیم کا امتزاج انسان کی سوچ کو متوازن بنا دیتا ہے جس کا اثر ان کے کام میں سادگی اور مثبت فکر کی صورت میں ظاہر ہوتا ہے۔ وہ کہتی ہیں کہ آگے بڑھنے کے لئے انہوں نے کبھی خود کو بدلنے کی ضرورت محسوس نہیں کی بلکہ جیسے ہیں ویسے ہی خود کو لوگوں کے سامنے پیش کیا۔ اسی وجہ سے آج کئی لڑکیاں انہیں پیغام بھیج کر کہتی ہیں کہ اگر آپ گھر سے اتنا کچھ کر سکتی ہیں تو ہم بھی کر سکتے ہیں ۔

شادی کے بعد بھی فرحین کا یہ سفر رکا نہیں بلکہ ان کے شوہر محمد عارف اور سسرال والوں نے انہیں الگ اسٹوڈیو فراہم کر کے ان کے خوابوں کو نئی پرواز دی۔ کروڑوں کی آمدنی اور شہرت حاصل کرنے کے باوجود ان بہنوں کے قدم آج بھی زمین پر قائم ہیں۔ وہ اپنی ویڈیوز میں بنائے گئے زیادہ تر کرافٹس فروخت نہیں کرتیں بلکہ آس پاس کے بچوں میں تقسیم کر دیتی ہیں۔

ان کا ماننا ہے کہ بچوں کے چہروں کی خوشی ہی ان کی اصل کمائی ہے۔ اب ان کا اگلا ہدف اسکولوں میں کرافٹ مقابلوں کا انعقاد کرنا ہے جہاں بہترین کام کرنے والے بچوں کو سائیکل اور موبائل جیسے انعامات دیے جائیں گے

  جے پور کی ان دو بیٹیوں کی کہانی یہ ثابت کرتی ہے کہ کامیابی ہمیشہ بڑے اسٹوڈیو سے نہیں آتی بلکہ کبھی کبھی وہ گھر کی ایک چھوٹی سی میز سے شروع ہوتی ہے جہاں ایک ماں کی تربیت اور بیٹیوں کا جذبہ مل کر تاریخ رقم کر دیتا ہے۔