گواہاٹی: (پریا شرما)

بوڈولینڈ پیپلز فرنٹ (بی پی ایف) کے سربراہ ہگرامہ موہیلالی کی قیادت میں تشکیل پانے والی نئی بوڈولینڈ ٹیریٹوریل کونسل (بی ٹی سی) اس بار ایک تاریخی پہلو رکھتی ہے، کیونکہ پہلی بار کسی مسلم خاتون کو اس کونسل کی ایگزیکٹو ممبر کے طور پر منتخب کیا گیا ہے۔ بوڈولینڈ ٹیریٹوریل آٹانومس ڈسٹرکٹس (بی ٹی اے ڈی) ایک ایسا علاقہ ہے جہاں مسلمانوں کو طویل عرصے سے حاشیے پر رکھا گیا اور انہیں دوسرے درجے کے شہریوں کی طرح زندگی گزارنی پڑی۔ ایسے ماحول میں کسی مسلم خاتون کا اس عہدے تک پہنچنا نہ صرف اہم بلکہ تاریخی پیش رفت ہے۔

بی ٹی سی آسام کے پانچ اضلاع , کوکراجھار، چرنگ، بکسا، اُدالگوری اور تاملپور , پر مشتمل ایک خود مختار کونسل ہے، جو 2003 میں بوڈولینڈ لبریشن فرنٹ کے ساتھ امن معاہدے کے بعد قائم ہوئی۔ بعد ازاں 2020 میں نیشنل ڈیموکریٹک فرنٹ آف بوڈولینڈ (این ڈی ایف بی) کے ساتھ نئے امن معاہدے کے بعد اس کا دائرۂ کار مزید بڑھا دیا گیا اور اسے بی ٹی آر (بوڈولینڈ ٹیریٹوریل ریجن) کا نام دیا گیا، تاہم بی پی ایف اب بھی بی ٹی اے ڈی اور بی ٹی سی کے پرانے نام ہی استعمال کرتی ہے۔

بیگم اخترہ احمد، جو بی ٹی سی کے ماتھانگُری حلقے سے منتخب ہو کر آئی ہیں، کو پبلک ہیلتھ انجینئرنگ (پی ایچ ای) محکمے کی ذمہ داری دی گئی ہے۔ بی پی ایف نے حالیہ انتخابات میں 40 میں سے 28 نشستیں حاصل کر کے سب سے بڑی جماعت کے طور پر کامیابی حاصل کی، جب کہ یو پی پی ایل کو سات اور بی جے پی کو پانچ نشستیں ملیں۔

دلچسپ بات یہ ہے کہ بیگم اخترہ احمد نے کبھی سیاست میں آنے کا خواب نہیں دیکھا تھا۔ وہ دراصل ادیبہ بننا چاہتی تھیں، مگر قسمت نے ان کے لیے کچھ اور ہی طے کر رکھا تھا۔

بیگم اخترہ احمد کا تعلق آسام کے ضلع برپیٹا کے کلگاچیا علاقے سے ہے، جہاں سے انہوں نے اپنی ابتدائی تعلیم حاصل کی۔ ان کی زندگی مشکلات سے بھری ہوئی رہی۔ وہ صرف ساتویں جماعت میں تھیں جب ان کے والد نے ان کی شادی کر دی۔ لیکن ان کے شوہر، ابراہیم علی مُلا (جو حال ہی میں ایک ہائر سیکنڈری اسکول کے استاد کی حیثیت سے ریٹائر ہوئے)، نے ان کی تعلیم میں رکاوٹ نہیں بننے دی۔ ان کا پہلا بچہ میٹرک کے امتحان کے دوران پیدا ہوا، لیکن انہوں نے ہمت نہیں ہاری اور امتحان میں کامیاب ہوئیں۔ دوسرا بچہ بارہویں جماعت میں تھا جب پیدا ہوا، مگر اخترہ احمد نے پڑھائی جاری رکھی اور آخرکار 2003 میں گوہاٹی یونیورسٹی سے پوسٹ گریجویشن مکمل کیا۔

انہوں نے بانگائیگاؤں کے لنگلا کالج میں جز وقتی لیکچرر کے طور پر تدریسی خدمات انجام دیں، مگر جلد ہی سیاست میں قدم رکھا۔ انہوں نے پہلے کانگریس میں شمولیت اختیار کی اور برپیٹا ڈسٹرکٹ ویمنز کانگریس کی تنظیمی سکریٹری بنیں۔ بعد میں اپنے شوہر کے آبائی علاقے، ضلع بکسا کے ماتھانگُری حلقے میں منتقل ہونے کے بعد وہ بکسا ڈسٹرکٹ ویمنز کانگریس کی صدر بنیں۔ 2004 میں وہ بی پی ایف میں شامل ہو گئیں۔

بی پی ایف کے سربراہ ہگرامہ موہیلالی نے ان کی قیادت میں خواتین ونگ قائم کیا، جس کی بیگم اخترہ احمد بانی صدر بنیں۔ 2005 کے بی ٹی سی انتخابات میں انہوں نے پارٹی کے لیے بھرپور کام کیا اور تین سال بعد انہیں تنظیمی سکریٹری بنا دیا گیا۔

انہوں نے پہلی بار 2020 میں بی ٹی سی کے انتخابات میں حصہ لیا مگر بی جے پی کے امیدوار گوتم داس سے 4 ہزار ووٹوں کے فرق سے ہار گئیں۔ اس بار انہوں نے اسی حلقے سے دوبارہ الیکشن لڑا، اپنے حریف کو 4 ہزار سے زائد ووٹوں سے شکست دی، اور پہلی بار ایگزیکٹو ممبر کے طور پر منتخب ہوئیں۔

ان کی سیاسی زندگی آسان نہیں تھی۔ 2012 میں جب بی ٹی سی کے کئی علاقوں میں مسلمانوں پر حملے ہوئے، ان کی تین گاڑیاں جلادی گئیں۔ ایک سیاسی اجلاس کے دوران ان کی کار کو آگ لگا دی گئی، لیکن وہ بال بال بچ گئیں۔ 2016 میں ان کے گھر پر بھی حملہ ہوا اور اسے آگ لگا دی گئی۔ مگر وہ کبھی پیچھے نہیں ہٹیں۔ انہی مشکلات کو جھیلتے ہوئے وہ آج اس مقام تک پہنچی ہیں۔

بیگم اخترہ احمد کا کہنا ہے کہ ہگرامہ موہیلالی کی قیادت میں سبھی قومیتوں کو ساتھ لے کر چلنے کا جذبہ ہے، اور وہ خوش ہیں کہ ان کے ساتھ کام کر رہی ہیں۔ ان کے مطابق بی ٹی سی ایک چھوٹا علاقہ ہے، اس لیے مرکزی اور ریاستی حکومتوں کے ساتھ تعاون کے بغیر ترقی ممکن نہیں۔ انہوں نے کہا، “ہمیں یہ نہیں دیکھنا چاہیے کہ مرکز یا ریاست میں کون سی پارٹی برسرِ اقتدار ہے، بلکہ سب کے ساتھ مل کر ترقی کے لیے کام کرنا چاہیے۔”