نئی دہلی: کنڑ زبان کی معروف ادیبہ بانو مشتاق کو اُن کے افسانوی مجموعے ہارٹ لیمپ(Heart Lamp) پر بین الاقوامی بُکر انعام سے نوازا گیا ہے۔ بُکر پرائز تنظیم کے مطابق۔۔۔ بانو مشتاق نے جنوبی ہند کی مسلم برادریوں میں خواتین اور بچیوں کی روزمرہ زندگی کو نہایت خوبصورت انداز میں پیش کیا ہے۔

یہ گزشتہ تین برسوں میں دوسرا موقع ہے کہ کسی ہندوستانی کتاب کو بین الاقوامی بُکر انعام سے نوازا گیا ہو۔ اس سے قبل 2022 میں گیتانجلی شری اور مترجم ڈیزی راک ویل کوٹوم آف سینڈ (Tomb of Sand) پر یہ اعزاز ملا تھا۔ بانو مشتاق نے اپنا پہلا افسانہ 1950 کی دہائی میں کرناٹک کے شہر حسن میں اس وقت لکھا جب وہ مڈل اسکول کی طالبہ تھیں۔بدھ کے روز جب 77 سالہ مصنفہ، وکیل اور کارکن بانو مشتاق نے اپنی مترجم دیپا بھسٹی کے ہمراہ یہ عالمی اعزاز حاصل کیا، تو ان کا ادبی سفر گویا ایک مکمل دائرے میں آ گیا۔ وہ بین الاقوامی بُکر انعام حاصل کرنے والی پہلی کنڑ مصنفہ بن گئیں۔

ہارٹ لیمپ  بارہ افسانوں کا ایک مجموعہ ہے جو تیس برسوں پر محیط تحریروں پر مشتمل ہے۔ ان کہانیوں میں کرناٹک کی مسلم خواتین کی زندگی کو برجستگی، لطافت اور گہرائی سے بیان کیا گیا ہے۔ یہ کتاب دنیا بھر سے منتخب چھ دیگر کتابوں کو پیچھے چھوڑ کر فاتح قرار پائی۔یہ پہلا افسانوی مجموعہ ہے جسے اس سالانہ انعام کے لیے منتخب کیا گیا، جو انگریزی میں ترجمہ شدہ بہترین افسانوی ادب کو دیا جاتا ہے۔ تقریبِ تقسیمِ انعامات لندن کی ٹَیٹ ماڈرن گیلری میں منعقد ہوئی جہاں بانو مشتاق نے کہا:"یہ لمحہ ایسے ہے جیسے ہزاروں جگنو ایک ہی آسمان کو روشن کر رہے ہوں ۔ مختصر، درخشاں اور مکمل طور پر اجتماعی۔میں یہ اعزاز ایک فرد کے طور پر نہیں بلکہ ان تمام آوازوں کی نمائندہ بن کر قبول کرتی ہوں جو یکجا ہوکر گونجتی ہیں۔

دیپا بھسٹی نے کہاکہیہ میری خوبصورت زبان کے لیے ایک خوبصورت جیت ہے۔ وہ بین الاقوامی بُکر انعام جیتنے والی پہلی ہندوستانی  مترجم بن گئیں۔بُکر جیوری کے صدر میکس پورٹر نے کتاب کی تعریف کرتے ہوئے کہا کہ ہارٹ لیمپ ‘ انگریزی قارئین کے لیے واقعی ایک نیا تجربہ ہے۔ یہ ایک انقلابی ترجمہ ہے جو زبان میں ایک نئی رنگت اور ساخت پیدا کرتا ہے۔یہ خوبصورت، بھرپور اور زندگی سے بھرپور کہانیاں کنڑ زبان سے ابھرتی ہیں اور ان میں دیگر زبانوں اور بولیوں کی سماجی و سیاسی گہرائیاں شامل ہیں۔یہ کہانیاں خواتین کی زندگی، تولیدی حقوق، عقیدہ، ذات پات، طاقت اور جبر پر روشنی ڈالتی ہیں۔"

بانو مشتاق کرناٹک میں ایک معروف نام ہیں۔ انہوں نے 1970 کی دہائی میں لکھنا شروع کیا اور خواتین کے حقوق و آزادی کے بے باک دفاع کے لیے جانی جاتی ہیں۔ اپنے خیالات کی پاداش میں انہیں متعدد دھمکیاں، سماجی بائیکاٹ اور حتیٰ کہ ایک چاقو حملہ بھی جھیلنا پڑا۔ان کی اندرونی کشمکش اکثر ان کے افسانوی کرداروں میں نظر آتی ہے۔ ایک موقع پر، جب وہ ایک نوجوان ماں تھیں، اپنی زندگی ختم کرنے کے دہانے تک پہنچ گئیں، مگر وہ اس بحرانی کیفیت سے نکل آئیں اور پھر پیچھے مڑ کر نہیں دیکھا۔