میں کہاں رکتا ہوں عرش وفرش کی آواز سے 

مجھ کو جانا ہے بہت آگے حد پرواز سے

مسلم لڑکیاں بھی پڑھ رہی ہیں اور ترقی کی راہ پر تیزی سے آگے بڑھ رہی ہیں. ایمن جمال ایسی ہی ہیں جنہیں یوپی کے وزیراعلی مسلم لڑکیوں کے لئے رول ماڈل مانتے ہیں

اترپردیش کے گورکھپور شہر کی بیٹی ایمن جمال نے پہلی خاتون مسلم آئی پی ایس بن کر ضلع اور پورانچل کا سر بلند کردیا ہے۔ وہ حیدرآباد میں تربیت حاصل کررہی ہیں اور امید ہے کہ جلد ہی انھیں پوسٹنگ مل جائے گی۔

گورکھ پور شہر کے خونی پور کی ایمن جمال نے کارمیل گرلز انٹر کالج میں پرائمری سے بارہویں جماعت تک تعلیم حاصل کی۔ سال 2004 میں 63٪ نمبر کے ساتھ ہائی اسکول اور 2006 میں انٹرمیڈیٹ کے امتحان میں 69٪ نمبر لے کر پاس ہوئیں۔ زولوجی کے مضمون میں سینٹ اینڈریوز کالج سے 2010 میں گریجویشن مکمل کیا۔

سال 2016 میں ، انہوں نے اناملائی یونیورسٹی سے فاصلاتی کورس کے ذریعہ ہیومن ریسورسیز میں ڈپلوما کیا۔ مسابقتی امتحانات کے لئے دہلی میں واقع رہائشی کوچنگ اکیڈمی  جامعہ ہمدرد میں داخل لیا۔ سال 2017 میں ، ان کا انتخاب مرکزی محکمہ محنت میں ہوا۔ سال 2018 میں ، وہ آرڈیننس کلودنگ فیکٹری شاہجہاں پور میں اسسٹنٹ لیبر کمشنر کے عہدے پر فائز ہوگئیں۔

بزنس مین حسن جمال اور پرائمری اسکول ٹیچر افروز بانو کی صاحبزادی ایمن جمال نے بتایا کہ آئی پی ایس کے عہدے کے لئے منتخب ہونے سے قبل وہ مرکزی لیبر ڈیپارٹمنٹ میں اسسٹنٹ لیبر کمشنر کے عہدے پر تعینات تھیں ۔ 2017 سے ، وہ آرڈیننس فیکٹری میں اسسٹنٹ لیبر کمشنر کے عہدے پر کام کرتے ہوئے ہندوستانی انتظامی خدمات کے لئے تیاری کرتی رہیں۔

ایمن نے کہا کہ ابتدائی امتحان 2019 میں انہوں نے سوشل سائنس کا مضمون لیا تھا۔ انٹرویو کے بعد 499 واں درجہ حاصل کیا اور انڈین پولیس سروس میں منتخب ہوئیں.انہوں نے کہا کہ  ابھی میں آئی پی ایس کی تربیت لے رہی  ہوں۔

 ایمن کی چار بہنیں اور ایک بھائی ہیں . دو بہنیں اور بھائی ڈاکٹر ہیں۔ ایک بہن ایم بی اے ہے جبکہ چھوٹی بہن ہائی اسکول میں زیر تعلیم ہے۔ ایمن کا کہنا ہے کہ ان کے خاندان نے ہمیشہ تعلیم کے لئے ان کا تعاون کیا. خاص کر والدہ نے بہت توجہ دی۔ اس سے انتظامی خدمات کی تیاری

آسان ہوگئی۔

واضح ہو کہ وزیر اعلی یوگی آدتیہ ناتھ نے ایمن جمال کو ہندوستانی پولیس سروس (آئی پی ایس) میں منتخب ہونے پر مبارکباد دی اور کہا ہے کہ ایمن  معاشرے خصوصا مسلمان لڑکیوں کے لئے ایک ماڈل ہیں۔اترپردیش کے وزیر اعلی یوگی آدتیہ ناتھ نے گورکھ ناتھ  مندر میں ان سے

ملاقات کی اور مبارکباد دی۔ انہوں نے کہا کہ عام لڑکیوں کے ساتھ ساتھ مسلمان لڑکیوں کو بھی ایمن سے ترغیب لینا چاہئے۔ انہوں نے ایمن سے بھی کہا کہ وہ سماج کی بہتری کے لئے فعال کردار ادا کریں۔

ایمن جمال کا ماننا ہے کہ کامیابی صرف صبر اور صحیح رہنمائی کے ذریعہ حاصل ہوتی ہے۔

ایمن نے کہا کہ وقت کادرست استعمال اور صحیح حکمت عملی کامیابی کی راہ آسان بناتی ہے۔ انہوں نے یو پی ایس سی کے امتحان کے لئے ڈھائی سال سخت محنت کی۔