آواز دی وائس : نئی دہلی 

جوان دلوں پر آج بھی جون ایلیا کی شاعری کی حکمرانی  ہے،لوگ سمجھتے ہیں کہ وہ ایک انتہائی رومانوی شخصیت کے مالک ہوں گے، لیکن حقیقت میں وہ ایک نہایت سنجیدہ انسان تھے۔ ہاں، یہ بات الگ ہے کہ میرے کہنے پر کھیل کھیل میں وہ گھوڑا بھی بن جایا کرتے تھے۔

 جی ہاں ! جون ایلیا کے بارے میں یہ انکشاف کیا ہے ان کی سگی بھانجی ہما رضوی سے "آواز دی وائس" کے لیے امینہ ماجد نے  خاص گفتگو کی، جانا کہ وہ اپنے سب سے چھوٹے ماموں کے کتنی قریب تھیں اور کس طرح جون ایلیا کے سبب انہیں اردو زبان سے گہرا لگاؤ پیدا ہوا۔ ہما رضوی، جون ایلیا کی سگی بھانجی ہیں جو گزشتہ 12 برس سے ملک کی  راجدھانی کی رہائشی ہیں۔ بقول ہما رضویان کے ماموں کا ایک مقام تھا اور ایک انداز تھا جس کا اندازہ آپ اس شعر سے لگا سکتے ہیں کہ 

میں جو ہوں 'جون ایلیا' ہوں جناب

اس کا بےحد لحاظ کیجیے گا

ہما رضوی ایک سینئر صحافی ہیں، جنہوں نے علی گڑھ مسلم یونیورسٹی سے اردو زبان میں ایم اے کیا۔ بعد میں اپنے صحافتی سفر کے دوران وہ دوردرشن لکھنؤ سے وابستہ ہو گئیں، جہاں انہوں نے رپورٹنگ اور اینکرنگ کے ذریعے لوگوں کو معلومات فراہم کیں۔ ان کے کچھ معروف پروگرامز کے نام "اودھ پنچ"، "اردو پروگرام" وغیرہ ہیں۔ اس کے علاوہ ہما رضوی نے آکاش وانی لکھنؤ پر بھی کئی ثقافتی پروگرامز کی میزبانی کی جو اردو زبان میں ہوتے تھے۔

ماموں جون ایلیا سے متاثر ہما رضوی

ہما رضوی نے "آواز دی وائس" کو بتایا کہ انہیں بچپن سے ہی ادیبوں اور شاعروں کی محفلیں اپنے گھر میں دیکھنے کو ملتیں، جس کی وجہ سے ان کا اردو زبان سے خاصا لگاؤ ہو گیا۔ وہ بچپن میں اپنے ماموں کو اردو میں خطوط لکھا کرتی تھیں۔

جون ایلیا نے ہما رضوی کے لیے پانچ گانے لکھے

ہما رضوی نے بتایا کہ جون ایلیا کو بچوں سے بے حد لگاؤ تھا۔ جب بھی لکھنؤ آتے، ہمارے ساتھ چھوٹے بچے بن جاتے۔ ہم انہیں کھیل میں گھوڑا بھی بنا دیتے اور وہ ہم سے بہت پیار کرتے تھے۔ انہوں نے میرے لیے پانچ گانے بھی لکھے تھے۔

پاکستان میں رہ کر بھی ہندوستان میں بسے رہے جون ایلیا

ہما رضوی نے بتایا کہ دنیا کے مشہور شاعروں میں شمار ہونے والے جون ایلیا کراچی میں رہ کر بھی ہندوستان کے باسی رہے۔ ان کی شاعری میں بھی امروہہ سے بچھڑنے کا درد جھلکتا ہے۔ امروہہ کی لکڑہ گلیاں جون ایلیا کی ان گنت یادیں سمیٹے ہوئے ہیں۔ 14 دسمبر 1931 کو امروہہ میں پیدا ہونے والے جون ایلیا، امروہہ پہنچتے ہی سب سے پہلے یہاں کی مٹی کو ماتھے سے لگاتے تھے۔ ان کی بھانجی ہما بتاتی ہیں کہ بھارتی تہذیب سے متاثر ہو کر انہوں نے رشی منیوں کی طرح اپنے بال بڑھا لیے تھے۔

ہم تو جیسے یہاں کے تھے ہی نہیں
دھوپ کے تھے، سائباں کے تھے ہی نہیں۔
اب ہمارا مکان کس کا ہے
ہم تو اپنے مکان کے تھے ہی نہیں۔
اس گلی نے سن کے یہ صبر کیا
جانے والے اس گلی کے تھے ہی نہیں۔

ہما نے بتایا کہ ان کے چار ماموں میں جون ایلیا سب سے چھوٹے تھے۔ بڑے ماموں رئیس امروہوی اور سید محمد تقی دہلی میں "جنگ" اخبار میں کام کرتے تھے۔ تقسیم کے بعد یہ اخبار کراچی منتقل ہو گیا، جس کے نتیجے میں جون ایلیا کے سوا باقی تینوں ماموں کراچی چلے گئے۔ والد سید شفیق حسن ایلیا کی وفات اور بہن صاحب زادی نجبی کی شادی کے بعد جون اکیلے رہ گئے۔اسی دوران ان کی طبیعت کافی خراب ہو گئی۔ علاج کے لیے بھائیوں نے انہیں کراچی بلا لیا۔ اس کے بعد نہ چاہتے ہوئے بھی جون ایلیا وہیں بس گئے۔ وہ ہر سال امروہہ آتے تھے، اسٹیشن پر اترتے ہی مٹی چوم کر ماتھے سے لگاتے تھے۔ امروہہ میں ان کے استقبال سے وہ خفا ہوتے تھے، کہتے تھے استقبال تو مہمان کا ہوتا ہے، میں تو یہیں کا ہوں۔ اسی حوالے سے انہوں نے یہ شعر کہا:

مل کر تپاک سے ہمیں نہ کیجیے اداس،
خاطر نہ کیجیے کبھی، ہم بھی یہاں کے تھے۔

ہما نے بتایا کہ جون ماموں سرحد کے پار بیٹھ کر امروہہ کا عشق بھرا گیت گاتے تھے۔ انہیں مسلسل گنگا اور جمنا کی ندیاں آواز دیتی تھیں، وہ ان کی صداؤں کو اپنی مجبوری کے ساز پر گنگنا لیتے تھے۔ ان کی گنگناہٹ ایک گنگنی آہٹ کی صورت ہمارے در پر دستک دیتی ہے اور ہم اس بچھڑے ہوئے یار، محبوب شاعر جون ایلیا کی صداؤں میں ڈوب جاتے ہیں۔ ایلیا گنگا جمنا سے اپنا درد بھی غزل میں کہتے تھے:

مت پوچھو کتنا غمگین ہوں، گنگا جی اور جمنا جی
زیادہ تم کو یاد نہیں ہوں، گنگا جی اور جمنا جی
اپنے کناروں سے کہ دیجو آنسو تم کو روتے ہیں
اب میں اپنا سوگ نشین ہوں، گنگا جی اور جمنا جی
اب تو یہاں کے موسم مجھ سے ایسی امیدیں رکھتے ہیں
جیسے ہمیشہ سے میں تو یہیں ہوں، گنگا جی اور جمنا جی۔
امروہہ میں بان ندی کے پاس جو لڑکا رہتا تھا
اب وہ کہاں ہے؟ میں تو وہی ہوں، گنگا جی اور جمنا جی۔

جون ایلیا کے کمرے کی حالت اور ہما کی صفائی

ہما نے بتایا کہ جب وہ 12 سال کی تھیں تب کراچی اپنے ماموں سے ملنے گئی تھیں۔ ماموں کا کمرہ بکھرا پڑا تھا، میز پر دھول، کاپیاں، کتابیں اور صفحات بکھرے ہوئے تھے۔ انہوں نے کمرہ صاف کیا اور کتابوں کو ترتیب دے دیا۔ ہما خوش تھیں کہ ماموں کمرہ دیکھ کر خوش ہوں گے۔وہ بتاتی ہیں کہ رات کو جب ماموں کمرے میں داخل ہوئے تو چیخ پڑے، اپنی بہن سے بولے – نجبی، تمہاری بچی نے ہمیں تباہ کر دیا۔ ہما نے بتایا کہ جس دھول کو انہوں نے صاف کیا تھا، اسی پر ماموں نے کئی ضروری فون نمبرز اور اشعار لکھے تھے۔

بان ندی پر گزارتے تھے گھنٹوں وقت

ہما نے بتایا کہ جب جون امروہہ آتے تو بان ندی پر گھنٹوں بیٹھتے۔ کراچی میں سمندر کنارے بیٹھ کر انہوں نے شاعری کی تھی
اس سمندر پہ تِرشناکام ہوں میں، بان تم اب بھی بہہ رہی ہو کیا؟
اسی طرح امروہہ پہنچنے پر کہا
اس گلی نے یہ کہہ کر صبر کیا
جانے والے یہاں کے تھے ہی نہیں

لکھنؤ سے بھی گہرا رشتہ

ہما نے بتایا کہ وہ لکھنؤ کے اندرا نگر میں اپنے شوہر سید اختر جمال رضوی کے ساتھ رہتی تھیں۔ شوہر نیشنل ہینڈلوم کارپوریشن میں مالیاتی ڈائریکٹر تھے۔ جون ایلیا ان سے ملنے لکھنؤ آتے تو کئی کئی دن قیام کرتے۔

شاعر نے رشی منیوں کی طرح اپنے بال بڑھا لیے تھے

ہما نے بتایا کہ ایک بار ماموں کے بکھرے ہوئے لمبے بالوں میں کنگھی کرنی چاہی تو انہوں نے کہا: ان جٹاؤں کو مت سلجھاؤ، یہ ہمارے ہندوستان کے رشیوں کی ویش بھوشا کا پرتیَک (علامت) ہیں۔ ہما بتاتی ہیں کہ لوگوں کے اصرار پر انہوں نے پہلا شعری مجموعہ "شاید" شائع کرایا۔ بعد میں ان کے کئی مجموعے: "گویا"، "لیکن"، "یعنی" اور "گمان" شائع ہوئے۔

جو گزاری نہ جا سکی ہم سے
ہم نے وہ زندگی گزاری ہے۔

مذہبی سے رومانوی شاعری تک کا سفر

ہما نے بتایا کہ جون ایلیا جتنے عجیب تھے، ان کی خواہشیں اس سے بھی زیادہ عجیب تھیں۔ وہ بچپن میں ابا سے کہتے ۔۔۔ ابا، میں کبھی بڑا نہیں ہونا چاہتا۔ لیکن اپنے جیتے جی اور مرنے کے بعد بھی وہ مسلسل بڑے اور بڑے ہوتے جا رہے ہیں۔ یہی وجہ ہے کہ آج کے نوجوانوں کو جون ایلیا کی شاعری بے حد پسند ہے۔

شاید مجھے کسی سے محبت نہیں ہوئی
لیکن یقین سب کو دلاتا رہا ہوں میں۔

جون ایلیا کی نظمیں آج کے نوجوانوں کو درپیش کئی چیلنجز اور جذبات کو بیان کرتی ہیں۔ اداسی، یکطرفہ محبت اور زندگی پر گہرے خیالات سے بھری ان کی تخلیقات ہمارے وقت کے پیچیدہ جذبات کا آئینہ ہیں۔جون ایلیا کی نظمیں اپنی گہری اداسی کے لیے جانی جاتی ہیں۔ آج کی دنیا میں، جہاں ذہنی صحت پر بات عام ہوتی جا رہی ہے، تنہائی اور مایوسی پر ان کی سچی عکاسی کئی نوجوانوں کو متاثر کرتی ہے۔ ان جذبات کو الفاظ میں ڈھالنے کی ان کی صلاحیت قارئین کو سمجھا ہوا اور کم تنہا محسوس کراتی ہے۔

 اسکرپٹ: اونیکا مہیشوری