گوہاٹی:منی بیگم

آسام حالیہ تباہ کن سیلاب سے نکلنے کی کوشش کر رہا ہے جس نے ہزاروں خاندانوں کی زندگی بدل کر رکھ دی ہے۔ اب جدوجہد بچاؤ اور امداد سے آگے بڑھ کر بحالی کے اس کہیں زیادہ مشکل مرحلے میں داخل ہو چکی ہے۔ بے شمار لوگ اپنے گھر۔ کھیتی باڑی۔ مویشی اور روزگار کے ذرائع کھو چکے ہیں اور اب بھی غیر یقینی حالات میں زندگی گزار رہے ہیں۔

ایسے وقت میں جب حکومت۔ انتظامیہ۔ رضاکار تنظیمیں۔ انفرادی طور پر مدد کرنے والے لوگ۔ سوشل میڈیا انفلوئنسرز اور عام شہری سیلاب متاثرین کی مدد کے لیے آگے آ رہے ہیں۔ معروف اسلامی عالم مولانا نور الامین قاسمی نے ایک منفرد اور بروقت اپیل کی ہے۔ انہوں نے معاشرے سے کہا ہے کہ صرف امدادی سامان تقسیم کرنے تک خود کو محدود نہ رکھا جائے بلکہ طویل مدتی بحالی پر توجہ دی جائے۔

سیلابی بحران کے دوران مسلسل متاثرین کے ساتھ کھڑے رہنے والے مولانا قاسمی نے حال ہی میں ضلع شیوساگر کے کئی سیلاب زدہ علاقوں کا دورہ کیا۔ دورہ مکمل کرنے کے بعد انہوں نے سوشل میڈیا کے ذریعے ایک اہم پیغام جاری کیا۔ اس موقع پر معروف یوٹیوبر اور ویڈیو تخلیق کار بھاسکر۔ کئی صحافی اور مقامی باشندے بھی ان کے ساتھ تھے۔جائزہ لینے کے بعد انہوں نے مشاہدہ کیا کہ کئی متاثرہ علاقوں میں افراد اور تنظیموں کی مشترکہ کوششوں سے خوراک۔ پینے کے پانی۔ کپڑوں اور دیگر ضروری امدادی اشیا کی فوری ضرورت بڑی حد تک پوری ہو چکی ہے۔ لیکن اب متاثرین کے سامنے سب سے بڑا چیلنج اپنی زندگیوں کو دوبارہ آباد کرنا ہے۔ مولانا قاسمی کے مطابق صرف امدادی سامان کی تقسیم مستقل حل فراہم نہیں کر سکتی۔

انہوں نے کہا کہ ہم اب اس مرحلے پر پہنچ چکے ہیں جہاں معاشرے کے ہر طبقے کو رضاکارانہ خدمت کے جذبے کے ساتھ آگے آنا چاہیے۔ بہت سے گھروں میں اب بھی کیچڑ اور ملبہ بھرا ہوا ہے۔ بے شمار مکانات یا تو گر چکے ہیں یا رہنے کے قابل نہیں رہے۔ متاثرہ خاندانوں کے گھروں کی صفائی۔ مرمت اور دوبارہ تعمیر میں ان کی مدد کرنا وقت کی سب سے بڑی ضرورت ہے۔انہوں نے مزید کہا کہ زرعی زمین۔ تالابوں اور روزگار کے دیگر ذرائع کی بحالی بھی اتنی ہی ضروری ہے۔

انہوں نے کہا کہ کھیتی کی بڑی بڑی زمینیں کیچڑ اور ریت تلے دب چکی ہیں جبکہ بہت سے تالاب تباہ ہو گئے ہیں۔ ہمیں صرف عارضی امداد تک خود کو محدود نہیں رکھنا چاہیے بلکہ لوگوں کو ان کے روزگار کے ذرائع واپس دلانے میں مدد کرنی چاہیے۔ صاحب استطاعت افراد اور تنظیموں کو چاہیے کہ وہ ان کی معاشی خود مختاری بحال کرنے کے لیے آگے آئیں۔

جذباتی سہارا بھی مالی امداد جتنا ضروری

سیلاب نے صرف املاک ہی تباہ نہیں کیں بلکہ بہت سے لوگوں کو اپنے عزیزوں سے بھی محروم کر دیا ہے جس کے باعث کئی خاندان شدید ذہنی صدمے سے گزر رہے ہیں۔مولانا قاسمی نے زور دے کر کہا کہ جذباتی سہارا بھی مالی امداد جتنا ہی اہم ہے۔انہوں نے کہا کہ سی بھی آفت کے بعد معاشرے کی ذمہ داری ہے کہ وہ لوگوں کو اعتماد کے ساتھ دوبارہ زندگی شروع کرنے کا حوصلہ دے۔ امید اور حوصلہ فراہم کرنا بھی اتنا ہی ضروری ہے جتنا مادی امداد دینا۔

یتیم بچوں کی کفالت کی اپیل

ان کی اپیل کا سب سے جذباتی حصہ ان بچوں سے متعلق تھا جنہوں نے سیلاب میں اپنے والدین یا سرپرستوں کو کھو دیا۔انہوں نے معاشرے کے صاحب حیثیت افراد سے اپیل کی کہ وہ یتیم اور بے سہارا بچوں کی ذمہ داری اپنے اوپر لیں۔انہوں نے کہا کہ ن بچوں کو تعلیم۔ رہائش۔ محبت اور محفوظ مستقبل فراہم کرنا صرف خیرات نہیں بلکہ پورے معاشرے کی اخلاقی ذمہ داری ہے۔ ایک بچے کی زندگی بدل دینا بے شمار امدادی پیکٹ تقسیم کرنے سے کہیں زیادہ قیمتی عمل ہو سکتا ہے۔

اجتماعی اقدام کی اپیل

مولانا قاسمی نے مخیر حضرات۔ رضاکار تنظیموں۔ سوشل میڈیا مواد تخلیق کرنے والوں۔ تاجروں۔ تعلیم یافتہ نوجوانوں اور ذمہ دار شہریوں سے مل کر کام کرنے کی اپیل کی۔انہوں نے کہا کہ یہ صرف ہمدردی ظاہر کرنے کا وقت نہیں ہے۔ سیلاب متاثرین کو حقیقی مدد اس وقت ملے گی جب لوگ میدان میں اتر کر ان کے ساتھ مل کر کام کریںگے۔انہوں نے ایک بار پھر کہا کہ آسام کے سیلاب متاثرین کے لیے اب بحالی سب سے بڑی ترجیح بن چکی ہے۔ امدادی سامان کی تقسیم کے ساتھ ساتھ انہوں نے معاشرے کے ہر طبقے سے اپیل کی کہ رضاکارانہ خدمت۔ مالی امداد۔ گھروں کی دوبارہ تعمیر۔ زرعی زمین کی بحالی۔ روزگار کے مواقع پیدا کرنے اور یتیم بچوں کے مستقبل کو محفوظ بنانے جیسے طویل مدتی اقدامات میں بھرپور تعاون کریں۔ان کے مطابق کسی آفت کے بعد کسی معاشرے کی اصل طاقت صرف حکومتی مشینری سے نہیں بلکہ عام لوگوں کی ہمدردی۔ یکجہتی اور باہمی تعاون سے ظاہر ہوتی ہے۔ ان کی یہ اپیل اتحاد اور انسانیت کے ذریعے زندگیوں کی دوبارہ تعمیر کا ایک مضبوط پیغام دیتی ہے۔

سیلاب سے ہلاکتوں کی تعداد 78 ہوگئی

سرکاری اعداد و شمار کے مطابق آسام میں سیلاب سے ہلاکتوں کی تعداد بڑھ کر 78 ہو گئی ہے جبکہ اب بھی 7 اضلاع اس آفت سے متاثر ہیں۔سب سے زیادہ متاثرہ اضلاع میں شیوساگر۔ چرائدیو۔ گولاگھاٹ۔ جورہاٹ۔ ناگاؤں اور بسواناتھ شامل ہیں۔اب تک 21 ریونیو سرکل اور 551 دیہات متاثر ہوئے ہیں جبکہ 300031 افراد اب بھی سیلاب سے متاثر ہیں۔اس آفت سے 21523.08 ہیکٹر زرعی زمین کو نقصان پہنچا ہے۔بدھ کی رات تک حکام نے مزید 3 افراد کی لاشیں برآمد کیں۔ جن میں 2 شیوساگر اور ایک گولاگھاٹ سے ملی۔ اس کے بعد مجموعی ہلاکتوں کی تعداد 78 ہو گئی۔

آسام نے مرکز سے خصوصی امدادی پیکیج مانگا

دوسری جانب آسام کے وزیر اعلیٰ ہمانتا بسوا شرما نے جمعرات کو کہا کہ ریاستی حکومت نے بے مثال سیلاب سے متاثرہ لوگوں کے لیے مرکز سے خصوصی امداد اور بحالی پیکیج کا مطالبہ کیا ہے۔یہ مطالبہ بین وزارتی مرکزی ٹیم کے سامنے رکھا گیا۔ایکس پر ایک پوسٹ میں وزیر اعلیٰ نے کہا کہ اس سال کا سیلاب غیر معمولی نوعیت کا تھا اور اس نے بڑے پیمانے پر تباہی مچائی ہے جس سے نمٹنے کے لیے ریاست کی ڈبل انجن حکومت پوری طرح پرعزم ہے۔

ریاستی حکومت نے مرکز سے درخواست کی ہے کہ بالائی آسام کے سیلاب کو ایک غیر معمولی۔ انتہائی شدید اور اچانک آنے والی آفت قرار دیا جائے تاکہ نقصانات کا زیادہ لچکدار انداز میں جائزہ لیا جا سکے اور امداد فراہم کرنے کے موجودہ اصولوں میں نرمی لائی جا سکے۔وزیر اعلیٰ نے یہ بھی کہا کہ آسام نے شیوساگر۔ چرائدیو۔ جورہاٹ اور گولاگھاٹ اضلاع کے لیے امداد۔ رہائش۔ بنیادی ڈھانچے کی بحالی اور روزگار کی بحالی پر مشتمل خصوصی مرکزی پیکیج کا مطالبہ کیا ہے۔انہوں نے مزید کہا کہ آسام نے شمال مشرقی آفات کے خطرات میں کمی کے لیے ایک علاقائی نظام قائم کرنے کی تجویز بھی پیش کی ہے تاکہ آسام اور اس کے سات پڑوسی شمال مشرقی ریاستوں میں آفات سے نمٹنے کے لیے بہتر رابطہ قائم ہو سکے۔

Catastrophic flooding in Assam (28/7/26) The death toll has risen to 78, while over 3 lakh people continue to be affected across the state.
Pray for Assam🙏
Our thoughts & prayers are with everyone affected by these devastating floods May those displaced find safety,strength… pic.twitter.com/XgLbp3vCfN

— Shahidarafi (@Shahidarafi51) July 30, 2026

اگرچہ ریاست کے کئی حصوں سے سیلابی پانی اتر چکا ہے لیکن جمعرات تک مجموعی صورتحال تشویشناک رہی۔ 300000 سے زیادہ افراد اب بھی متاثر ہیں جبکہ ہلاکتوں کی تعداد 78 تک پہنچ چکی ہے۔ریاست نے مرکز سے یہ بھی درخواست کی ہے کہ سڑکوں۔ پلوں۔ اسکولوں۔ صحت۔ پینے کے پانی اور بجلی کے بنیادی ڈھانچے کی ضلع وار تعمیر نو کے منصوبوں میں مدد فراہم کی جائے۔ اس کے ساتھ اگلے مانسون سے پہلے پہاڑی دریاؤں کے کنارے ٹوٹے ہوئے بندوں کو مضبوط بنانے اور مختلف اداروں کے ذریعے فوری جائزہ لینے میں بھی تعاون کیا جائے۔وزیر اعلیٰ نے مزید کہا کہ آسام نے خواتین۔ بچوں۔ معذور افراد اور بزرگوں کے لیے خصوصی امداد کی بھی درخواست کی ہے۔ اس کے ساتھ رہائش۔ پانی کی فراہمی۔ زراعت۔ صحت اور سماجی تحفظ سے متعلق قومی منصوبوں کو آفات سے متعلق امدادی پروگراموں کے ساتھ مربوط کرنے کی بھی اپیل کی ہے۔انہوں نے کہا۔ہمیں یقین ہے کہ بین وزارتی مرکزی ٹیم زمینی حقائق کو مدنظر رکھتے ہوئے ہماری تجاویز اور مطالبات کی مناسب سفارش مرکز سے کرے گی۔

آسام کے سیلاب کو قومی آفت قرار دینے کا مطالبہ

ادھر آسام جاتیہ پریشد نے مرکزی حکومت سے مطالبہ کیا ہے کہ آسام میں بار بار آنے والے سیلاب اور کٹاؤ کو قومی آفت قرار دیا جائے اور وزیر اعظم نریندر مودی سے اپیل کی ہے کہ وہ جلد از جلد متاثرہ علاقوں کا دورہ کریں۔29 جولائی کو وزیر اعظم کو پیش کیے گئے ایک یادداشت نامے میں پارٹی نے تین بڑے مطالبات رکھے۔وزیر اعظم فوری طور پر متاثرہ علاقوں کا دورہ کریں تاکہ تباہی اور متاثرہ لوگوں کی مشکلات کا خود جائزہ لے سکیں۔ڈیزاسٹر مینجمنٹ ایکٹ 2005 میں مناسب ترمیم کی جائے یا انتظامی حکم جاری کر کے آسام میں بار بار آنے والے سیلاب اور کٹاؤ کے بحران کو قومی اہمیت کی آفت قرار دیا جائے۔متاثرہ اضلاع میں امداد۔ بحالی اور تعمیر نو کے لیے مکمل مالی اور انتظامی تعاون فراہم کیا جائے۔