بھکتی چالک | ممبئی
پورا مہاراشٹر اس وقت مانسون کی غیر یقینی صورتحال اور پانی کی قلت کے خدشات سے دوچار ہے۔ آبی ذخائر میں پانی کی سطح کم ہونے پر تشویش بڑھ رہی ہے۔ ایسے میں ریاست بھر میں مختلف مساجد میں بارش کے لیے دعائیں کی جارہی ہیں ۔جن میں ہزاروں افراد شرکت کررہے ہیں ۔ ممبئی کے ماہم علاقے کی تین بڑی مساجد میں بارش کے لیے خصوصی دعاؤں کا اہتمام کیا گیا، جہاں مسلمانوں نے اجتماعی طور پر اللہ تعالیٰ سے بارانِ رحمت کی دعا کی۔یہ خصوصی دعائیں ماہم جامع مسجد، ماہم قبرستان مسجد اور بسم اللہ مسجد میں کی گئیں۔ اس کے علاوہ ممبئی کے کلیان اور تھانے علاقوں میں بھی بارش کے لیے خصوصی دعاؤں کا اہتمام کیا گیا۔
بسم اللہ مسجد میں خصوصی دعا
ماہم کی بسم اللہ مسجد میں نمازِ جمعہ کے بعد نمازیوں نے 30 منٹ تک بارش کے لیے خصوصی دعا کی۔ مسجد کے ٹرسٹی محی الدین حاجی کے مطابق مسجد کے اراکین نے بارش میں تاخیر اور ممکنہ پانی کے بحران پر تشویش ظاہر کی ،جس کے بعد اجتماعی دعا کا فیصلہ کیا گیا۔انہوں نے کہا کہ جمعہ مسلمانوں کے لیے ایک بابرکت اور اہم دن ہے، اسی لیے ہم نے اسی دن بارش کے لیے اجتماعی دعا کا اہتمام کیا۔
جامع مسجد میں بھی اجتماعی دعا
ماہم کی جمعہ مسجد میں بھی جمعہ کی بڑی نماز کے موقع پر نمازیوں کو پیشگی اطلاع دے کر بارش کے لیے خصوصی دعاؤں کا اہتمام کیا گیا۔ مسجد کے انتظامی ٹرسٹی فہاد خلیل پٹھان نے کہا کہ طویل عرصے سے جاری خشک موسم کی وجہ سے شہریوں میں تشویش اور بے چینی بڑھ گئی ہے۔ بارش میں غیر معمولی تاخیر ہو رہی ہے۔ جھیلوں میں پانی کی سطح کم ہو گئی ہے اور درجہ حرارت بھی مسلسل بڑھ رہا ہے۔ اسی وجہ سے ہم نے اللہ تعالیٰ سے بارش کی دعا کرنے کا فیصلہ کیا۔مسجد کے امام اور مولانا سعد نے موجود نمازیوں سے خصوصی دعا کرنے کی اپیل کی۔ انہوں نے کہا کہ اللہ تعالیٰ سے اپنی غلطیوں کی معافی مانگنا یعنی استغفار کرنا اور سچے دل سے توبہ کرنا اللہ کی رحمت حاصل کرنے اور بارش جیسی نعمت کے نزول کا سب سے مؤثر ذریعہ ہے۔ انہوں نے نمازیوں کو کثرت سے استغفار اور دعا کی تلقین کی تاکہ اللہ تعالیٰ اپنی رحمت نازل فرمائے اور خشک سالی کی کیفیت کا خاتمہ ہو۔
ماہم مسجد میں دعا
ماہم قبرستان مسجد کے ٹرسٹی سہیل کھنڈوانی نے فطرت میں پانی کی اہمیت پر روشنی ڈالتے ہوئے کہا کہ پودوں جانوروں اور انسانوں کی بقا کے لیے ضروری میٹھے پانی کی فراہمی کا بنیادی ذریعہ بارش ہے۔ بارش ہی دریاؤں جھیلوں اور زیر زمین پانی کے ذخائر کو بھرنے کا سبب بنتی ہے۔ اسی کے ذریعے پینے کے لیے پانی دستیاب ہوتا ہے۔ زراعت کو سہارا ملتا ہے اور صفائی ستھرائی کی ضروریات پوری ہوتی ہیں۔ اس لیے بارش کا ہونا انتہائی ضروری ہے۔ماہم قبرستان مسجد کے منتظم شبر کابلی نے روزمرہ زندگی میں پانی کی اہمیت کو اجاگر کرتے ہوئے کہا کہ پانی پینے۔ خوراک کی تیاری۔ صفائی۔ صنعت۔ ماحولیاتی نظام اور موسم کے توازن سمیت زندگی کے ہر شعبے کے لیے ناگزیر ہے۔ انہوں نے کہا کہ موجودہ خشک سالی کے دوران پانی کا دانشمندانہ اور محتاط استعمال وقت کی اہم ضرورت ہے تاکہ اس قیمتی نعمت کو ضائع ہونے سے بچایا جا سکے۔
پانی زندگی کی بنیاد
ماہم قبرستان مسجد کے ٹرسٹی سہیل کھنڈوانی نے کہا کہ بارش ہی تازہ پانی کا بنیادی ذریعہ ہے، جو انسانوں، جانوروں اور پودوں کی بقا کے لیے ضروری ہے۔انہوں نے کہا:"بارش دریاؤں، جھیلوں اور زیرِ زمین پانی کے ذخائر کو بھرنے کا ذریعہ بنتی ہے، جس سے پینے، زراعت اور صفائی ستھرائی کے لیے پانی دستیاب ہوتا ہے۔اسی مسجد کے منتظم شبر کابلی نے روزمرہ زندگی میں پانی کی اہمیت اجاگر کرتے ہوئے کہا کہ پینے، کھانا پکانے، صفائی، صنعت، ماحولیات اور موسمی توازن کے لیے پانی ناگزیر ہے، اس لیے خشک سالی کے دوران اس کا محتاط استعمال ضروری ہے۔
ریاست بھر کی مساجد سے اپیل
ماہم قبرستان مسجد کے ایک اور ٹرسٹی مدثر لامبے نے مہاراشٹر بھر کی مساجد سے بارش کے لیے خصوصی دعاؤں کے اہتمام کی اپیل کی۔انہوں نے کہا کہ ڈیموں کو بھرنے، زرعی پیداوار بڑھانے اور پن بجلی کی پیداوار کے لیے پانی بنیادی ضرورت ہے، اس لیے تمام مسلمانوں کو اجتماعی طور پر دعا کرنی چاہیے۔
ماہم ریذیڈنٹس گروپ کی سماجی پہل
مساجد میں ہونے والی ان روحانی کوششوں کے ساتھ سماجی ذمہ داری کو بھی جوڑا گیا ہے۔ ماہم ریذیڈنٹس گروپ کے اراکین نے شہریوں سے پانی کی بچت کرنے کی اپیل کی ہے۔ گروپ کے رکن سید گلزار رانا نے کہا کہ روزمرہ زندگی میں پانی کے ضیاع سے بچنا وقت کی اہم ضرورت ہے۔ انہوں نے توجہ دلائی کہ دانت صاف کرتے وقت۔ شیو بناتے وقت۔ یا گاڑیاں دھوتے وقت نل کھلا چھوڑ دینے سے بڑی مقدار میں پانی ضائع ہو جاتا ہے۔ اسی طرح ٹپکتے ہوئے نل ہر ماہ سینکڑوں لیٹر پانی ضائع کرنے کا سبب بنتے ہیں۔
نوی ممبئی میں سماجی کارکن حاجی شہنواز خان نے اسلامی مفکرین۔ مساجد کے ائمہ اور عوام سے صلوٰۃ الاستسقاء یعنی بارش کے لیے پڑھی جانے والی خصوصی نماز اور دعا کا اہتمام کرنے کی اپیل کی ہے۔ انہوں نے مختلف مساجد سے خصوصی دعائیہ اجتماعات منعقد کرنے کی درخواست کی۔ ساتھ ہی تمام خاندانوں سے کہا کہ وہ اس خشک اور دشوار موسمی صورتحال سے نجات کے لیے اپنے گھروں میں بھی خصوصی دعاؤں کا اہتمام کریں۔
چند روز قبل ساکی ناکہ علاقے میں میٹرو کے تعمیراتی کام کے دوران بلدیہ کی مرکزی آبی لائن پھٹ گئی تھی جس کے باعث کرلا ویسٹ۔ ایل وارڈ اور آس پاس کے متعدد علاقوں میں پانی کی فراہمی مکمل طور پر معطل ہو گئی تھی۔ لوگ پانی کی شدید قلت اور مشکلات کا سامنا کر رہے تھے۔ایسے مشکل حالات میں کرلا کی تکیہ جامع مسجد نے قابل ستائش اقدام کرتے ہوئے اپنی بورویل کا پانی تمام ضرورت مند شہریوں کے لیے بلا تفریق مذہب و برادری مفت فراہم کیا۔ مسجد کی اس خدمت کو مقامی لوگوں نے انسانی ہمدردی اور سماجی یکجہتی کی بہترین مثال قرار دیا۔اس مشکل وقت میں تکیہ جامع مسجد نے مثالی اقدام کرتے ہوئے اپنی بورویل کا پانی بلا تفریق مذہب و برادری تمام ضرورت مند شہریوں کے لیے مفت فراہم کیا، جس سے متاثرہ علاقوں کے لوگوں کو بڑی راحت ملی۔یہ اقدامات اس بات کی مثال ہیں کہ مشکل حالات میں عبادت، اجتماعی ذمہ داری اور انسانیت کی خدمت ایک ساتھ چل سکتی ہیں، اور پانی جیسی قیمتی نعمت کے تحفظ کے لیے ہر فرد کو اپنا کردار ادا کرنا چاہیے۔
