آواز دی وائس : نئی دہلی 

مکہ مکرمہ کی ایک غیر معمولی فضائی جھلک نے آن لائن دنیا میں بے حد توجہ حاصل کی ہے۔ اس تصویر میں خانہ کعبہ خلا کی وسعتوں سے ایک روشن نقطے کی طرح دکھائی دیتا ہے۔ یہ منظر چار سو کلومیٹر کی بلندی سے بین الاقوامی خلائی اسٹیشن سے لیا گیا تھا۔ اس نے دنیا بھر میں مسلمانوں اور خلائی تحقیق سے دلچسپی رکھنے والوں کو حیرت میں ڈال دیا ہے۔ناسا کے خلا باز ڈان پیٹٹ نے یہ تصویر ایکس پر شیئر کی۔ انہوں نے کہا کہ مکہ مکرمہ کا یہ نظارہ ان کے خلائی سفر کے خوبصورت ترین لمحات میں شامل ہے۔ تصویر کے وسط میں نظر آنے والی روشنی خانہ کعبہ ہے جو تاریکی میں بھی نمایاں رہتی ہے۔ڈان پیٹٹ اپنے چوتھے خلائی مشن کے دوران فوٹوگرافی کے شوق کے باعث بھی مشہور رہے ہیں۔ انہوں نے یہ منظر آئی ایس ایس کی کاپولا ونڈو سے ہائی ریزولوشن نیکون کیمرے کے ذریعے محفوظ کیا۔ اسی وجہ سے منظر کی خوبصورتی اور بھی بڑھ گئی

ناسا کے تجربہ کار خلا باز اور فوٹوگرافر  پیٹٹ نے اپنے حالیہ مشن کے بعد یہ تصویر شیئر کی ہے۔ وہ دو سو بیس دن خلا میں گزارنے کے بعد زمین پر لوٹے ہیں۔ان کی شیئر کردہ تصویر میں مکہ ناہموار وادیوں کے درمیان روشن دکھائی دیتا ہے۔ مرکز میں موجود مسجد الحرام اور اس کے وسط میں کعبہ روشنی کی شدت کے باعث نمایاں ہے۔ پیٹٹ اکثر خلا سے لی گئی اپنی تصاویر ایکس (سابقہ ٹوئٹر) پر شیئر کرتے رہتے ہیں، رواں ہفتے انہوں نے مکہ مکرمہ کی یہ نایاب تصویر بھی اپنےفالوورز کے لیے شیئر کی۔پیٹٹ نے تصویر کے ساتھ تحریر کیا۔مکہ کا مداری نظارہ۔ درمیان میں روشن جگہ خانۂ کعبہ ہے۔ اسلام کا مقدس ترین مقام جو خلا سے بھی واضح نظر آتا ہے۔ یہ تصویر شیئر ہوتے ہی تیزی سے وائرل ہو چکی ہے۔ مختلف پلیٹ فارمز پر لاکھوں لوگ اسے دیکھ چکے ہیں اور تبصروں میں خانۂ کعبہ کی روح پرور چمک کو سراہ رہے ہیں۔

Orbital views of Mecca, Saudi Arabia. The bright spot in the center is the Kaaba, Islam's holiest site, visible even from space. pic.twitter.com/yLSOnboOZC

— Don Pettit (@astro_Pettit) December 1, 2025

کعبہ کی چمک کی اصل وجہ

خانہ کعبہ سیاہ کسوہ میں ڈھکی مکعب شکل کی عمارت ہے۔ اس پر مسلسل فلڈ لائٹس پڑتی رہتی ہیں جن کی روشنی رات کے وقت خلا تک منعکس ہو جاتی ہے۔ اسی وجہ سے یہ خلا میں موجود کیمروں میں ایک روشن نقطے کی طرح نظر آتا ہے۔ مکہ کے اطراف ہزاروں لائٹس کی روشنی بھی مجموعی طور پر ایک جھرمٹ جیسی چمک پیدا کرتی ہے۔

سوشل میڈیا پر حیرت

یہ تصویر دنیا بھر میں شیئر کی جا رہی ہے اور کئی لوگ اس کی چمک سے متاثر نظر آتے ہیں۔ کچھ صارفین نے مصنوعی ذہانت سے بھی پوچھا کہ کعبہ اتنا روشن کیوں دکھائی دیتا ہے۔ اس کے جواب میں بتایا گیا کہ فلڈ لائٹس کی طاقتور روشنی خلا تک جانے والی جھلک پیدا کرتی ہے اور اسی وجہ سے یہ جگہ مرکز میں سب سے زیادہ روشن دکھائی دیتی ہے۔

دنیا کا سب سے زیادہ زیارت کیا جانے والا مقام

کعبہ مسلمانوں کا قبلہ ہے۔ دنیا بھر کے مسلمان اسے احترام کی نظر سے دیکھتے ہیں اور پانچ وقت کی نماز اسی سمت رخ کرکے ادا کرتے ہیں۔ ہر سال حج کے ایام میں لاکھوں لوگ مکہ پہنچتے ہیں۔ عمرے کے لیے بھی سال بھر زائرین کی بڑی تعداد موجود رہتی ہے۔ ماہرین نے اس بات کی بھی توثیق کی کہ یہ منظر جدید سیٹلائٹ ٹیکنالوجی اور خلا میں لی گئی خصوصی فوٹوگرافی کی بدولت ممکن ہوا ہے۔ یہ تصویر سائنسی تحقیق کے شائقین کے لیے دلچسپی کا باعث بنی ہے اور مذہبی حوالے سے بھی ایک منفرد اہمیت رکھتی ہے۔یہ منظر صرف مسلمانوں کے لیےروحانی قدر نہیں رکھتا بلکہ دنیا بھر کے لوگوں کو یہ بھی دکھاتا ہے کہ اسلامی مقدس مقامات کس طرح روشنی اور عظمت کے ساتھ نمایاں ہوتے ہیں۔ یہ جھلک اپنے اندر ایک خاص تاثیر اور کشش رکھتی ہے۔

پیٹٹ کا طویل خلائی مشن

ڈونلڈ پیٹٹ فلکیاتی فوٹوگرافی کے ماہر ہیں۔ وہ ستاروں اور فلکیاتی مناظر کی ہزاروں تصاویر لے چکے ہیں۔ گزشتہ سال وہ دو روسی خلا باز وں کے ساتھ سویوز ایم ایس۔26 خلائی جہاز پر روانہ ہوئے تھے۔ انہوں نے بین الاقوامی خلائی سٹیشن پر دو مشنز کے دوران زمین کے گرد تین ہزار پانچ سو بیس چکر لگائے۔ اس عرصے میں انہوں نے نو ہزار تین سو تین ملین میل کا سفر مکمل کیا۔

اہم سائنسی تجربات

مشن کے دوران پیٹٹ نے متعدد سائنسی تحقیقات کیں۔ ان میں کم کشش ثقل میں پودوں کی افزائش۔ پانی کی صفائی کے تجربات۔ اور خلا میں آگ کے رویے کا مشاہدہ شامل تھا۔ یہ مشن بیس اپریل کو قازق سطح مرتفع پر بحفاظت اختتام پذیر ہوا۔ اسی دن پیٹٹ کی ستر سالگرہ بھی تھی۔ وہ خلا سے واپس آنے والے ناسا کے معمر ترین حاضر سروس خلا باز بن گئے۔

تصویر کب لی گئی تھی

کچھ رپورٹس کے مطابق اس تصویر کو گزشتہ سال ستمبر میں زمین کے گرد چکر لگاتے ہوئے کھینچا گیا تھا۔ بعد ازاں پیٹٹ نے زمین پر واپسی کے بعد اسے دنیا کے سامنے پیش کیا۔