پرموُد جوشی

جنگیں انسانیت کے لیے اچھی نہیں ہوتیں، مگر اکثر اس لیے ہوتی ہیں کیونکہ کوئی دوسرا راستہ باقی نہیں بچتا۔ مستقبل کی بڑی جنگوں کو روکنے کے لیے بھی بعض اوقات جنگیں ضروری ہو جاتی ہیں۔ یورپ نے دو عالمی جنگوں کے بعد سمجھا کہ جنگیں بے معنی ہوتی ہیں۔‘آپریشن سندور’ کے تحت تین دن تک جاری رہنے والی جنگ کے طویل المدتی اثرات کا اندازہ بعد میں ہوگا، لیکن پہلا اور فوری نتیجہ یہ ہے کہ ایک طویل عرصے بعد دونوں ممالک کے درمیان 12 مئی کو بات چیت ہونے جا رہی ہے، چاہے وہ صرف ڈائریکٹر جنرل ملٹری آپریشنز کی سطح پر ہی کیوں نہ ہو۔یقیناً یہ بات چیت صرف فوجی سرگرمیوں تک محدود رہے گی، مگر ممکن ہے کہ مستقبل کی بات چیت کا کوئی راستہ اسی میں سے نکل آئے۔ اگر ایسا نہ بھی ہوا، تب بھی پہلی امید یہی ہے کہ لائن آف کنٹرول پر 2021 سے جاری جنگ بندی کو بحال رکھنے کا فیصلہ کیا جائے گا۔

اس دوران ہندوستان کی جانب سے سندھ طاس معاہدے کو غیر مؤثر کرنے کا اعلان بھی اہم اور دور رس نتائج کا حامل ہے۔ ہندوستان نے واضح کر دیا ہے کہ فی الحال پاکستان کے ساتھ صرف جنگ بندی کے امور پر ہی بات چیت ہوگی، باقی کسی بھی موضوع پر گفتگو نہیں کی جائے گی۔ اندازہ ہوتا ہے کہ ہندوستان سندھ طاس معاہدے کی شرائط میں تبدیلی پر زور دے گا۔اس میں کوئی دو رائے نہیں کہ یہ جنگ بندی امریکہ کی کوششوں سے ممکن ہوئی ہے، لیکن اس کا مطلب یہ نہیں کہ ہندوستان کسی تیسرے ملک کی ثالثی کو تسلیم کرے گا۔ 1999 کی کارگل جنگ کے دوران بھی امریکہ نے مداخلت کی تھی۔

دہشت گرد چہرہ

اس بار بھی پاکستان کا دہشت گرد چہرہ بے نقاب ہوا ہے۔ ہندوستان نے امریکہ کے سامنے ثبوت کے ساتھ ثابت کیا کہ جنگ کے دوران پاکستان نے شہری پروازوں کو اپنی ڈھال بنایا، جو کہ ایک سنگین جرم تھا۔ اس بار پاکستان کو جو دھچکا لگا ہے، وہ اسے اپنے دہشت گردی سے متعلق ڈھانچے پر سنجیدگی سے سوچنے پر مجبور کرے گا۔اس بار ہندوستان کی ‘سرجیکل اسٹرائیک’ 2016 اور 2019 کے مقابلے میں کہیں زیادہ بڑی تھی، جو اس بات کی علامت ہے کہ ہندوستانی ردعمل وقت کے ساتھ مزید سخت ہو رہے ہیں۔ ہندوستان نے اس بار برداشت کی حد کی سرخ لکیر کو اور گہرا کر دیا ہے۔جنگ کا رک جانا ہر صورت میں مثبت پیش رفت ہے۔ ہندوستان کو اسے روکنے میں کوئی دقت نہیں تھی، کیونکہ ہندوستان نے خود اس کو شروع کرنے پر زور نہیں دیا تھا۔ چونکہ پاکستانی فوج نے 7 مئی کی ‘سرجیکل اسٹرائیک’ کو تسلیم نہیں کیا اور جواب دینے کا اعلان کر دیا، تو ہندوستان کے پاس جواب دینے کے علاوہ کوئی چارہ نہیں بچا تھا۔

پاکستانی ناسمجھی

ہندوستانی حکومت کا خیال تھا کہ 6-7 مئی کی رات پاکستان کے نو دہشت گرد مراکز پر کارروائی کے بعد پاکستان کوئی ایسا قدم نہیں اٹھائے گا جس سے تنازعہ بڑھے۔ مگر ایسا نہ ہوا اور 7-8 مئی کی رات پاکستان نے ہندوستان کے کچھ شہروں پر میزائل حملے کیے۔ ہندوستانی فوج ان حملوں کا مقابلہ کرنے کے لیے تیار تھی اور اس نے نہ صرف ان حملوں کو ناکام بنایا بلکہ 8 مئی کو صبح سے شام تک جوابی حملے بھی کیے۔پاکستانی فوج کو لگتا تھا کہ اگر وہ ‘آپریشن سندور’ کا جواب نہیں دے گی تو ان کی ساکھ متاثر ہوگی۔ فی الحال ایسا محسوس ہوتا ہے کہ انہوں نے جنگ بندی کو قبول کر کے اپنی ساکھ کو خود ہی نقصان پہنچایا ہے، جس سے ان کی پوزیشن پہلے کے مقابلے میں کمزور ہو گئی ہے۔

محتاط ردعمل

7 مئی کو ‘آپریشن سندور’ پر پریس بریفنگ کے دوران ہندوستان نے اپنے ردعمل کو مرکوز، محتاط اور غیر اشتعال انگیز قرار دیا تھا۔ خاص طور پر یہ ذکر کیا گیا تھا کہ پاکستانی فوجی تنصیبات کو نشانہ نہیں بنایا گیا۔ہندوستان نے ساتھ ہی یہ بھی واضح کر دیا تھا کہ اگر ہندوستان میں فوجی تنصیبات پر حملے کی کوشش کی گئی تو اس کا مناسب جواب دیا جائے گا۔ ساتھ ہی کہا گیا تھا کہ ہندوستان کا مقصد جنگ کو بڑھانا نہیں ہے۔خصوصی بریفنگ میں خارجہ سیکریٹری وکرم مسری نے کہا کہ پہلگام حملہ پہلا اشتعال انگیز قدم تھا، جس کی ذمہ داری پاکستان پر عائد ہوتی ہے۔ انہوں نے پاکستان کے اس مطالبے کی حقیقت بھی بے نقاب کی کہ پہلگام واقعے کی غیر جانبدار عالمی تحقیقات ہونی چاہیے۔انہوں نے کہا کہ 26/11 اور 2016 کے پٹھان کوٹ حملوں کے وقت ہندوستان نے پاکستان کے ساتھ تعاون کی پیشکش کی تھی، لیکن پاکستان نے پیچھے ہٹنے کا راستہ اپنایا۔ جب ہندوستان نے آپریشن روم سے حاصل کردہ وائس ریکارڈنگ کا موازنہ حافظ سعید اور ذکی الرحمان لکھوی جیسے زیر حراست افراد سے کرنے کی کوشش کی، تو پاکستان نے انکار کر دیا۔

قاتلوں کی شناخت

انہوں نے کہا کہ پہلگام حملے میں شامل حملہ آوروں کی شناخت ہو چکی ہے۔ ہماری انٹیلیجنس نے حملے میں ملوث افراد کے بارے میں معلومات حاصل کر لی ہیں۔ اس حملے کا تعلق پاکستان سے ہے۔ سب سے اہم بات یہ ہے کہ اس حملے کی ذمہ داری دہشت گرد تنظیم ‘دی ریزسٹنس فرنٹ(TRF)’ نے ایک نہیں بلکہ دو مرتبہ قبول کی تھی۔اس تنظیم کے بارے میں ہندوستان پہلے بھی اقوام متحدہ کی سلامتی کونسل کو آگاہ کرتا رہا ہے۔ سلامتی کونسل کے بیان سے اس تنظیم کا نام حذف کیے جانے پر بھی توجہ دینی چاہیے۔ہندوستان نے 7 مئی کو نو مقامات پر حملے کرنے کے بعد صاف کر دیا تھا کہ ہمارا ارادہ کسی اور مقام پر حملہ کرنے کا نہیں ہے۔ ہمارا مقصد صرف ان افراد کو سزا دینا ہے جو دہشت گرد کارروائیاں چلاتے ہیں۔

پانچ دہشت گرد

ہفتہ کے روز ہندوستان نے اُن پانچ بڑے دہشت گردوں کی فہرست جاری کی، جو ‘آپریشن سندور’ کے دوران مارے گئے۔ بہاولپور اور مریدکے میں مارے گئے ان افراد کے جنازوں میں وہاں کے فوجی سربراہ اور اقوام متحدہ کی جانب سے نامزد دہشت گرد ایک ساتھ کھڑے تھے۔ان جنازوں کی تصاویر دیکھ کر صرف وردی سے فرق کا اندازہ لگایا جا سکتا تھا، ورنہ یہ بتانا مشکل تھا کہ کون فوجی ہے اور کون دہشت گرد۔ درحقیقت اب یہ پاکستان کا کام ہے کہ وہ ثابت کرے کہ جسTRF نے پہلگام حملے کی ذمہ داری قبول کی، اس کا لشکر طیبہ سے کوئی تعلق نہیں ہے۔ اور یہ بھی ثابت کرے کہ لشکر طیبہ کے علاوہ جیش محمد اور حزب المجاہدین کے کیمپ بھی پاکستان میں سرگرم نہیں تھے۔

جھوٹا پروپیگنڈہ

جبTRF نے پہلگام حملے کی ذمہ داری خود لی، تو پاکستانی قیادت کو اس بات کی سنجیدگی کا اندازہ ہوا۔ تب انہوں نے کہنا شروع کیا کہ ہندوستان ثبوت دے اور یہ ہندوستان کا ‘فالس فلیگ آپریشن’ ہے۔پاکستان کے اشارے پر اگلے ہی دنTRF نے اپنا بیان واپس لے لیا اور کہا کہ ان کے سوشل میڈیا اکاؤنٹس ہیک ہو گئے تھے۔ یہ باتTRF کو تب معلوم ہوئی جب پاکستان کے وزیر دفاع نے کہا کہ پہلگام واقعے میں پاکستان کا کوئی ہاتھ نہیں۔ حیرت کی بات یہ ہے کہ پاکستان نے آج تک پہلگام قتل عام کی مذمت تک نہیں کی۔

ترک بہ ترک

اس آپریشن کے دوران ہندوستانی فوج نے بارہا کہا کہ ہم اب پاکستانی فوج کی کسی بھی کارروائی کا اسی مقام اور اسی شدت سے جواب دیں گے۔ ہفتے کے روز ہندوستان نے یہ اصولی اعلان بھی کر دیا کہ مستقبل میں کسی بھی دہشت گرد حملے کو ہندوستان کے خلاف اعلان جنگ سمجھا جائے گا۔بہرحال، دیکھنا یہ ہے کہ تین دن کی اس جنگ کا پاکستان کی داخلی سیاست پر کیا اثر ہوگا۔ اس سے بھی بڑا سوال جنرل عاصم منیر کے مستقبل کا ہے۔ اطلاعات ہیں کہ پاکستانی فوج کے اندر ان کے خلاف مخالفت پائی جا رہی ہے۔ دوسری طرف عمران خان کے حامی دباؤ میں نہیں آ رہے۔

مصنف روزنامہ ہندستان کے سابق مدیر ہیں