بھکتی چالک

جب بھی ہندوستانی ترنگا لہراتا ہے تو ہمارے دل فطری طور پر فخر سے بھر جاتے ہیں۔ لیکن اس پرچم کے ہمارے ہاتھوں تک پہنچنے سے بہت پہلے یہ محنت۔ غیر متزلزل لگن اور خاموش حب الوطنی کے سفر سے گزرتا ہے۔ پونے کے ایک معمولی سے گھر میں قومی پرچم تیار کرنے اور اسے ہزاروں گھروں تک پہنچانے کی قابل فخر روایت 52 سال سے بلا تعطل جاری ہے۔ اس روایت میں شیخ خاندان کی تین نسلیں شامل ہیں۔

کسبہ پیتھ کی تنگ گلیوں سے شروع ہونے والی یہ خاندانی روایت بڑے سیلاب۔ نقل مکانی اور بدلتے وقت کے باوجود آج بھی قائم ہے اور اب یہ ایک ایسی محبت بھری خدمت بن چکی ہے جس کے تحت ہر سال 50 ہزار سے زیادہ پرچم تیار کیے جاتے ہیں۔ شیخ خاندان کے لیے یہ صرف کاروبار نہیں بلکہ ملک کے لیے خالص عقیدت کا اظہار ہے۔

کسبہ پیتھ کے سیلاب سے ابھرنے کی داستان

ترنگا تیار کرنے کے ساتھ اس خاندان کا سفر 5 دہائیاں قبل شروع ہوا تھا۔ اس کی بنیاد الیاس شیخ کے سسر نے کسبہ پیتھ میں رکھی تھی۔ جب اس علاقے میں تباہ کن سیلاب آیا تو مقامی میونسپل کارپوریشن نے خاندان کو ایک نئی جگہ پر منتقل کردیا۔ سیلاب میں خاندان نے بہت کچھ کھو دیا لیکن انہوں نے قومی پرچم بنانے کی اپنی روایت کو چھوڑنے سے انکار کردیا۔بزرگوں کی شروع کی ہوئی یہ روایت پہلے ان کی بہو نے سنبھالی اور پھر پورے خاندان نے اسے اپنا لیا۔ ابتدا میں جہاں سالانہ صرف 400 سے 500 پرچم تیار کیے جاتے تھے وہیں اب یہ کام ایک بڑے عمل میں تبدیل ہوچکا ہے اور ہر سال فخر کے ساتھ 50 ہزار پرچم تیار کیے جاتے ہیں۔

حب الوطنی کا تہوار جو مہینوں پہلے شروع ہوجاتا ہے

15 اگست یا 26 جنوری کو حب الوطنی کے نغموں کی آوازیں سنائی دینے سے بہت پہلے شیخ خاندان کا گھر ایک مصروف ورکشاپ میں تبدیل ہوجاتا ہے۔ تیاری 2 سے 3 ماہ پہلے شروع ہوجاتی ہے۔ مہاتما پھولے منڈی سے لکڑی کی ڈنڈیاں حاصل کرنے سے لے کر کاغذ کاٹنے۔ رنگ کرنے اور گوند لگانے تک ہر کام خاندان کے افراد خود کرتے ہیں۔ایک پرچم مکمل ہونے سے پہلے 4 سے 5 افراد کے ہاتھوں سے گزرتا ہے۔ تیار ہونے کے بعد انہیں 50 کے بنڈل میں ترتیب سے باندھا جاتا ہے اور مقامی دکانداروں اور سڑک کنارے سامان فروخت کرنے والوں کے حوالے کردیا جاتا ہے۔

اس کام سے اپنے گہرے جذباتی تعلق کے بارے میں الیاس شیخ کہتے ہیں کہ ’’ہمیں اپنے قومی پرچم سے بے حد احترام اور محبت ہے۔ ہم یہ کام منافع کے لیے نہیں کرتے بلکہ خالص محبت اور خوشی کے لیے کرتے ہیں۔ ہم اتنے برسوں سے یہ کام کر رہے ہیں کہ اگر ہم پرچم نہ بنائیں تو ہمیں بے چینی محسوس ہوتی ہے۔ آج ہم اس روایت کو بڑی حد تک اس لیے جاری رکھے ہوئے ہیں کیونکہ ہمارے بچے اس پر اصرار کرتے ہیں۔ اس سے انہیں خوشی ملتی ہے۔‘‘

منافع نہیں فخر ہے اصل محرک

ایسے دور میں جب ہر کوشش کو منافع اور نقصان کے پیمانے پر پرکھا جاتا ہے شیخ خاندان ایک نایاب مثال کے طور پر سامنے آتا ہے۔ مالی اعتبار سے خاندان خوشحال ہے۔ اللہ کے فضل سے نئی نسل کے افراد اچھی ملازمتیں اور مستقل آمدنی رکھتے ہیں۔ اس کے باوجود وہ اس مسلسل محنت والی روایت کو زندہ رکھنے کے لیے پُرعزم ہیں۔

الیاس کہتے ہیں کہ یہ کام ہمیں بے حد خوشی دیتا ہے۔ جب تک ہمارے جسم میں سانس ہے ہم یہ پرچم بناتے رہیں گے۔ اگر ہم نے یہ کام چھوڑ دیا تو ہمیں سمجھ نہیں آئے گا کہ خود کو کس کام میں مصروف رکھیں۔ اللہ کے فضل سے ہمارے بچے اچھی کمائی کرتے ہیں لیکن ہم یہ مبارک کام اپنے ملک کے لیے کرتے ہیں۔ اس سے ہمارے دل کو سکون ملتا ہے اور ملک کی خدمت کا روحانی ثواب بھی حاصل ہوتا ہے۔‘‘نئی نسل بھی اسی قدر پُرجوش ہے۔ گھر کی نوجوان بہو ایمن شیخ بھی خاندان کے دیگر افراد کے ساتھ اسی جوش و خروش سے کام کرتی ہیں۔ اپنے فخر کا اظہار کرتے ہوئے وہ کہتی ہیں۔’’شادی سے پہلے میری دنیا گھر۔ اسکول اور کالج تک محدود تھی۔ لیکن جب میں اس خاندان میں آئی تو مجھے احساس ہوا کہ وہ کتنے نیک اور بڑے کام میں مصروف ہیں۔ مجھے اس عمل کا حصہ بننے اور ملک کے لیے اپنا کردار ادا کرنے پر بے حد فخر ہے۔‘‘

نہ ہندو نہ مسلمان۔ صرف ہندوستانی

ایسے معاشرے میں جہاں لوگ اکثر مذہب کی بنیاد پر دیواریں کھڑی کرنے کی کوشش کرتے ہیں شیخ خاندان کے گھر کی دہلیز پر یہ تمام رکاوٹیں ختم ہوجاتی ہیں۔ جو بھی شخص ان کے گھر پرچم لینے آتا ہے وہ صرف ایک شناخت کے ساتھ آتا ہے۔ وہ ہندوستانی ہے۔اپنے بزرگوں کی روایت کو جاری رکھنے کے فلسفے کے بارے میں الیاس کہتے ہیں۔’’ایسا نہیں ہے کہ ہمیں اس کام سے بہت زیادہ منافع حاصل ہوتا ہے۔ لیکن میرے سسرال کے بزرگوں نے جو نسل در نسل روایت شروع کی تھی وہ رکنی نہیں چاہیے۔ ہم صرف ایک خواب سے متحرک ہیں کہ ترنگا ہر ہاتھ اور ہر گھر تک پہنچے۔‘‘وہ مسکراتے ہوئے مزید کہتے ہیں۔’’ہم یہاں یہ نہیں دیکھتے کہ کون ہندو ہے اور کون مسلمان۔ جو شخص ہمارے پاس آتا ہے وہ صرف ہندوستان کا پرچم لینے آتا ہے۔ وہ اپنی مذہبی شناخت نہیں بتاتا اور ہم بھی نہیں پوچھتے۔ جسے پرچم چاہیے ہم خوشی سے اسے دے دیتے ہیں۔

ہندوستان سے محبت کی نہ ٹوٹنے والی روایت

پونے کے اس چھوٹے سے گھر میں تیار ہونے والا ہر ترنگا شیخ خاندان کی ہندوستان سے غیر مشروط محبت اور وفاداری کی گواہی ہے۔ اس گھر میں نہ منافع کا حساب ہے۔ نہ ذات یا مذہب کی بنیاد پر کوئی امتیاز۔ یہاں صرف ایک گہرا جذبہ جڑ پکڑے ہوئے ہے۔قوم سب سے پہلے۔