بنگلور: کرناٹک ہائی کورٹ نے قرار دیا ہے کہ مسلم شخصی قانون یا شریعت قانون کے تحت انجام پانے والی شادی بعد میں خصوصی شادی ایکٹ 1954 کے تحت رجسٹر ہونے کے باوجود اسی قانون کے تحت چلتی رہے گی۔عدالت نے واضح کیا کہ 1954 کے ایکٹ کے تحت محض رجسٹریشن سے ایسی شادی کی قانونی حیثیت تبدیل نہیں ہوتی اور نہ ہی طلاق کے معاملے میں خصوصی شادی ایکٹ کی دفعات اس پر لاگو ہوتی ہیں۔

 جسٹس ڈی کے سنگھ اور جسٹس ٹی ایم نداف پر مشتمل ڈویژن بنچ نے ایک مسلم شوہر کی جانب سے دائر اپیل خارج کر دی۔ شوہر نے فیملی کورٹ کے اس حکم کو چیلنج کیا تھا جس میں خصوصی شادی ایکٹ کی دفعہ 27(1)(d) اور (e) کے تحت دائر اس کی طلاق کی درخواست کو ناقابل سماعت قرار دیتے ہوئے مسترد کر دیا گیا تھا۔

بنچ نے کہا کہ ہماری رائے میں محض کسی ایسی شادی کی رجسٹریشن جسے متعلقہ برادری کے قانون کے مطابق انجام دیا گیا ہو یعنی مسلمانوں کے لیے شریعت قانون یا ہندوؤں کے لیے ہندو میرج ایکٹ یا عیسائیوں کے لیے کرسچن میرج ایکٹ وغیرہ کے تحت ہوئی ہو اس شادی کی نوعیت صرف رجسٹریشن کے عمل کی وجہ سے تبدیل نہیں ہوجاتی۔‘‘خصوصی شادی ایکٹ اور شخصی قوانین کی ہم آہنگ تشریح پر زور دیتے ہوئے عدالت نے مزید کہا کہ ’’جب شادی فریقین کی برادری پر نافذ مخصوص قانون کے تحت انجام دی جاتی ہے تو خصوصی شادی ایکٹ کے تحت محض رجسٹریشن سے اس شادی کی نوعیت اور اثر تبدیل نہیں ہوتا اور وہ شریعت قانون یا ہندو قانون یا عیسائی قانون کے تحت ہونے والی شادی ہی رہتی ہے۔‘‘

پس منظر

دونوں فریق مسلمان تھے اور انہوں نے 4 اپریل 2015 کو شریعت قانون کے مطابق نکاح کیا تھا۔ اس کے بعد نکاح کو نکاح رجسٹرار کے پاس باقاعدہ رجسٹر کرایا گیا۔چونکہ دونوں بیرون ملک سفر کرنا چاہتے تھے اس لیے بعد میں انہوں نے اپنی شادی کو خصوصی شادی ایکٹ کے تحت بھی رجسٹر کرایا اور 21 دسمبر 2015 کو شادی کا سرٹیفکیٹ جاری کیا گیا۔ازدواجی اختلافات پیدا ہونے کے بعد شوہر نے خصوصی شادی ایکٹ کی دفعہ 27 کے تحت طلاق کے لیے فیملی کورٹ سے رجوع کیا۔

فیملی کورٹ نے درخواست مسترد کرتے ہوئے قرار دیا کہ شادی مسلم شخصی قانون کے تحت انجام دی گئی تھی اور بعد میں خصوصی شادی ایکٹ کے تحت اس کی رجسٹریشن نے اسے اس قانون کے تحت ہونے والی شادی میں تبدیل نہیں کیا۔ہائی کورٹ کے سامنے شوہر نے دلیل دی کہ ایک مرتبہ شادی خصوصی شادی ایکٹ کے تحت رجسٹر ہوجائے تو وہ مسلم شادی کی حیثیت کھو دیتی ہے اور اس کے بعد اسے خصوصی شادی ایکٹ کے تحت ہونے والی شادی تصور کیا جانا چاہیے۔ اس لیے طلاق سے متعلق اس ایکٹ کی دفعات بھی لاگو ہونی چاہئیں۔

ہائی کورٹ نے اس دلیل کو مسترد کرتے ہوئے عدالتی معاون کی اس دلیل کو تسلیم کیا کہ صرف وہی شادیاں خصوصی شادی ایکٹ کے تحت طلاق سمیت دیگر معاملات میں اس ایکٹ کے تابع ہوتی ہیں جو خود خصوصی شادی ایکٹ کے تحت انجام دی گئی ہوں۔ وہ شادیاں جو پہلے شخصی قوانین کے تحت انجام دی گئی ہوں اور بعد میں صرف خصوصی شادی ایکٹ کے تحت رجسٹر کی گئی ہوں اس مقصد کے لیے ایکٹ کے تحت آنے والی شادیاں نہیں بن جاتیں۔

عدالت نے شوہر کی جانب سے پیش کیے گئے دہلی ہائی کورٹ کے ایک فیصلے کو بھی مختلف قرار دیا۔ عدالت نے کہا کہ اس معاملے میں شادی خود خصوصی شادی ایکٹ کے تحت انجام دی گئی تھی جبکہ موجودہ معاملے میں ایسا نہیں ہوا تھا۔اپیل میں کوئی قانونی بنیاد نہ پاتے ہوئے ڈویژن بنچ نے فیملی کورٹ کے فیصلے کو برقرار رکھا اور مقدمہ خارج کر دیا۔

حال ہی میں کرناٹک ہائی کورٹ نے یہ بھی قرار دیا تھا کہ کسی مسلمان مرد کی پہلی شادی برقرار ہونے کے دوران خصوصی شادی ایکٹ 1954 کے تحت کی گئی دوسری شادی ابتدا ہی سے باطل ہوگی۔ہائی کورٹ نے کہا تھا کہ جو فریق رضاکارانہ طور پر خصوصی شادی ایکٹ کے تحت شادی کا انتخاب کرتے ہیں وہ مکمل طور پر اسی قانونی نظام کے تابع ہوجاتے ہیں اور بعد میں اپنی شخصی شریعت کا سہارا لے کر اس شادی کو جائز قرار نہیں دے سکتے۔

جسٹس سچن شنکر مگدوم نے ایک خاتون کی جانب سے دائر درخواست خارج کر دی تھی۔ خاتون نے تقسیم کے ایک مقدمے میں متوفی مدعا علیہ کی دوسری بیوی ہونے کا دعویٰ کرتے ہوئے اسے قانونی وارث کی حیثیت سے فریق بنانے کی درخواست کی تھی۔ عدالت نے ٹرائل کورٹ کی جانب سے اسے متوفی کا قانونی نمائندہ بنانے سے انکار کے فیصلے کو برقرار رکھا جبکہ اس تعلق سے پیدا ہونے والی بیٹی کو قانونی فریق بنانے کے فیصلے کی بھی توثیق کی۔

عدالت نے کہا کہ ’’یہ درست ہے کہ محمدی شخصی قانون اپنی تسلیم شدہ شرائط اور حدود کے تحت ایک مسلمان مرد کو ایک سے زیادہ شادیاں کرنے کی اجازت دیتا ہے۔ تاہم یہ اجازت صرف ان شادیوں کے معاملے میں نافذ ہوتی ہے جو اسی شخصی قانون کے تحت انجام دی گئی ہوں۔‘‘عدالت نے مزید کہا کہ جب فریقین خصوصی شادی ایکٹ کا انتخاب کرتے ہیں تو قانونی حیثیت بنیادی طور پر تبدیل ہوجاتی ہے۔عدالت نے کہا کہ ’’یہ ایکٹ ایک سیکولر اور خود مکمل قانونی ضابطہ ہے جو اس کی دفعات کے تحت کی جانے والی شادیوں کی شرائط اور انعقاد کے ساتھ ساتھ ان کے نتائج کو بھی منظم کرتا ہے۔ جب فریقین شعوری طور پر اپنے شخصی قانون کے بجائے اس ایکٹ کی دفعات اختیار کرتے ہیں تو وہ خود کو پارلیمنٹ کے وضع کردہ لازمی قانونی نظام کے تابع کردیتے ہیں۔‘‘بنچ نے زور دیا کہ ایسی شادیوں سے پیدا ہونے والے حقوق اور ذمہ داریاں خصوصی شادی ایکٹ کے ذریعے ہی طے ہوں گی نہ کہ شخصی قانون کے ذریعے۔