ممبئی ؛ مسلم وکلا، قانون کے طلبہ اور سماجی کارکنوں کے ایک گروپ نے ماہِ رمضان کے دوران لاؤڈ اسپیکر کے استعمال کے لیے شہر سے متعلق خصوصی ایس او پی جاری کرنے کا مطالبہ کیا ہے۔ اس سلسلے میں ریاستی حکومت اور متعلقہ محکموں کو خطوط بھی ارسال کیے گئے ہیں۔

گزشتہ کچھ عرصے سے ممبئی کی مساجد میں لاؤڈ اسپیکر کے استعمال کو لے کر تنازع جاری ہے۔ انتظامیہ کی جانب سے کئی مساجد کے خلاف کارروائی کی گئی اور لاؤڈ اسپیکر ہٹائے گئے۔ یہ معاملہ اس وقت Bombay High Court میں زیرِ سماعت ہے۔ تاہم رمضان کی آمد کے پیش نظر مسلم برادری کے لیے لاؤڈ اسپیکر کا استعمال اہم قرار دیا جا رہا ہے، اسی لیے نوجوان وکلا نے صرف ممبئی کے لیے واضح اور مخصوص رہنما اصول جاری کرنے کی اپیل کی ہے۔

ایڈوکیٹ فیاض عالم نے بتایا کہ رمضان شروع ہونے والا ہے اور برادری کے لوگوں کو خدشہ ہے کہ اجازت نامہ حاصل کرنے کا عمل طویل اور پیچیدہ ہوسکتا ہے۔ اسی خوف کے باعث کئی مقامات پر پیشگی طور پر لاؤڈ اسپیکر ہٹا دیے جاتے ہیں جس سے خصوصاً رمضان میں عوام کو دشواری پیش آتی ہے۔ سحری اور افطار جیسے امور اذان کی آواز سے وابستہ ہوتے ہیں، اس لیے اجازت نہ ملنے کی صورت میں مشکلات بڑھ سکتی ہیں۔

ایڈوکیٹ سلمان انصاری نے کہا کہ جس طرح رمضان میں ہوٹلوں اور کھانے پینے کے مراکز کو رات میں کھلا رکھنے کے لیے خصوصی ہدایات جاری کی جاتی ہیں، اسی طرح لاؤڈ اسپیکر کے استعمال کے لیے بھی واضح ایس او پی جاری کی جائے تاکہ مساجد مقامی پولیس کو انہی ہدایات کا حوالہ دے کر آسانی سے اجازت حاصل کرسکیں۔

قانون کے طالب علم فیض علی خان کے مطابق ماضی میں لاؤڈ اسپیکر کے مسئلے پر جس طرح تنازع کھڑا ہوا تھا، اس کی تکرار نہیں ہونی چاہیے۔ ان کا کہنا تھا کہ مخصوص رہنما اصول اور مقررہ ڈیسی بل حد کے اندر استعمال کی اجازت دی جائے تاکہ کسی بھی طبقے کو پریشانی نہ ہو اور قانون کی پاسداری بھی برقرار رہے۔

نوجوان وکلا نے ریاست کے چیف سیکریٹری، پولیس کمشنر، بی ایم سی کمشنر اور مہاراشٹر پولیوشن کنٹرول بورڈ کو خطوط لکھ کر مطالبہ کیا ہے کہ رمضان کے مہینے تک محدود خصوصی ایس او پی جاری کی جائے جس میں چھوٹے باکس نما لاؤڈ اسپیکر مقررہ ڈیسی بل لاک کے ساتھ استعمال کرنے کی اجازت دی جائے۔

پولیوشن کنٹرول بورڈ کے نوائس پولیوشن رولز 2000 کے مطابق رات 10 بجے سے صبح 6 بجے تک لاؤڈ اسپیکر کے استعمال پر پابندی ہے۔ تجارتی علاقوں میں 65 ڈیسی بل اور رہائشی علاقوں میں 55 ڈیسی بل کی حد مقرر ہے۔

فی الحال یہ معاملہ عدالت میں زیرِ سماعت ہے، تاہم وکلا کا کہنا ہے کہ ان کا مطالبہ صرف رمضان تک محدود ہے تاکہ کوئی نیا تنازع پیدا نہ ہو، دیگر برادریوں کو کوئی تکلیف نہ پہنچے اور شہر میں امن و ہم آہنگی برقرار رہے۔

 اذان پر آواز دی وائس کا خصوصی پروگرام  دیکھیں