تحریر: بھکتی چالک

ایک طرف حضرت پیر دستگیر درگاہ کا سندل جلوس، اور دوسری طرف دیوی درگا کا مذہبی جلوس۔ یہ منظر مہاراشٹر کے تعلقہ کورےگاؤں کے گاؤں بنواڑی کا تھا۔ گاؤں کی تاریخ میں پہلی بار یہ دونوں جلوس آمنے سامنے آئے۔ اس موقع پر نہ صرف دو مذہبی روایتیں ملیں، بلکہ بھائی چارے اور اتحاد کا ایک نیا باب بھی رقم ہوا۔ اس تاریخی لمحے کے ذریعے بنواڑی کے لوگوں نے معاشرتی اتحاد اور مذہبی ہم آہنگی کی ایک شاندار مثال پیش کی۔

ستارا ضلع کا یہ گاؤں عرصہ دراز سے سماجی اور مذہبی یکجہتی کا مرکز رہا ہے۔ یہاں ہندو اور مسلمان برسوں سے امن و محبت کے ساتھ رہتے آئے ہیں، اور اس ہم آہنگی کی جھلک روزمرہ زندگی میں صاف دیکھی جا سکتی ہے۔ ابھی کچھ ماہ پہلے، اپریل میں، گیانیشوری پاراین ہفتہ کے اختتامی موقع پر مقامی مسلم برادری نے "مہاپرساد" یعنی اجتماعی ضیافت کا اہتمام کیا تھا۔ اس کے ذریعے انہوں نے "ایک گاؤں، ایک خاندان" کا جذبہ زندہ کیا۔ یہی روح دوبارہ اس وقت دیکھی گئی جب دونوں مذہبی جلوس ایک ساتھ آئے۔

جب دونوں جلوس ملے تو ارباز شیخ نامی ایک نوجوان نے چھترپتی شیواجی مہاراج کی شان میں ایک پرجوش نظم پیش کی۔ اس لمحے کی ویڈیو وائرل ہوئی اور ارباز کو زبردست پذیرائی ملی۔

حضرت پیر دستگیر بابا کی درگاہ نہ صرف ستارا بلکہ پورے مہاراشٹر اور ملک کے مختلف حصوں سے آنے والے عقیدتمندوں کے لیے عقیدت کا مرکز ہے۔ یہاں ہر سال "گیارہویں شریف" کے موقع پر عظیم الشان عرس منایا جاتا ہے۔ یہ دن بغداد کے مشہور صوفی بزرگ حضرت عبدالقادر جیلانیؒ کی یاد میں منایا جاتا ہے۔ بنواڑی کی یہ درگاہ ان سے منسوب چلہ گاہ مانی جاتی ہے۔ عرس کے دوران ہزاروں زائرین درگاہ پر حاضری دیتے ہیں، اور یہ دن گاؤں میں مذہبی و ثقافتی سرگرمیوں کا مرکز بن جاتا ہے۔

درگاہ ٹرسٹ کی صدر شکیلہ پٹیل نے "آواز مراٹھی" سے گفتگو میں بتایا، "ستارا ضلع شیواجی مہاراج کا مضبوط گڑھ رہا ہے۔ ہم آج بھی ان کے اصولوں اور تعلیمات پر عمل کرتے ہیں۔ اسی لیے یہاں کبھی فرقہ وارانہ کشیدگی پیدا نہیں ہوتی۔ الٹا، ہم ہندو اور مسلمان مل کر ہر تہوار مناتے ہیں۔ دسہرے کے اگلے دن پورے مہاراشٹر نے ہماری یکجہتی دیکھی۔"

شکیلہ پٹیل بتاتی ہیں، "ہر سال دسہرے کے دوسرے دن دیوی درگا کی پالکی کا جلوس نکلتا ہے۔ اتفاق سے اسی دن اس بار درگاہ کا سندل بھی تھا۔ دونوں جلوس ایک ہی دن ہونے کی وجہ سے سوال اٹھا کہ کیا کیا جائے۔ گرام پنچایت کے دو ارکان، درگاہ ٹرسٹ کے ایک ڈائریکٹر اور میں نے بیٹھک کی، اور وہیں سے ہم آہنگی کی راہ نکلی۔"

انہوں نے بتایا، "فیصلہ ہوا کہ دونوں جلوس ایک ہی دن نکالے جائیں۔ ظاہر ہے کہ یہ مذہبی جذبات سے جڑا معاملہ تھا، اس لیے کچھ اندیشہ بھی تھا۔ پھر مسلم برادری نے عزم کیا کہ سب پرامن طریقے سے ہوگا، اور ہندو برادری نے بھی پوری ذمہ داری سے ساتھ دیا۔ یوں دونوں فریقوں نے مل کر امن و بھائی چارے کا پیغام دیا۔"

شکیلہ کہتی ہیں، "جب ہم نے یہ تجویز واٹھر پولیس کے سامنے رکھی تو ابتدا میں وہ ہچکچائے، کیونکہ ایسے مواقع پر ان پر بڑی ذمہ داری ہوتی ہے۔ مگر ہم نے یقین دلایا کہ بنواڑی میں کبھی کوئی ناخوشگوار واقعہ نہیں ہوگا۔ پولیس نے نہ صرف ہمارے فیصلے کی تعریف کی بلکہ مشورہ دیا کہ دونوں جلوس کا ’سنگم‘ کرایا جائے۔ یوں دونوں جلوس ایک ساتھ ملے اور پورے  نے امن و اتحاد کا پیغام پایا۔"

واٹھر پولیس اسٹیشن کے اسسٹنٹ پولیس انسپکٹر اویناش مانے نے بھی خاص پہل کی۔ ان کی رہنمائی میں یہ منفرد  واقعہ کامیاب رہا۔ اویناش مانے نے کہا، "پولیس انتظامیہ نے دونوں برادریوں کے ساتھ مل کر سماجی ہم آہنگی برقرار رکھی۔ گاؤں کے سب لوگوں نے اس موقع پر بھرپور تعاون کیا، اور اپنے عمل سے یہ پیغام دیا کہ یکجہتی ہی اصل طاقت ہے۔"

سندل کی روایت شاہو مہاراج نے شروع کی
درگاہ کی تاریخ بتاتے ہوئے شکیلہ پٹیل نے کہا، "مقامی لوگوں کے مطابق یہ درگاہ تقریباً چار سو سال پرانی ہے۔ سترہویں صدی میں عادل شاہ نے چندن۔وندن قلعہ تعمیر کیا تھا۔ تب سے حضرت پیر دستگیر بابا کا چلہ وہاں موجود تھا۔ بعد میں جب شیواجی مہاراج نے قلعہ فتح کیا تو انہوں نے درگاہ کو جوں کا توں باقی رکھا۔ پھر چھترپتی شاہو مہاراج کے دور میں اس درگاہ پر سندل اور عرس کی روایت شروع ہوئی۔"

انہوں نے بتایا، "کہا جاتا ہے کہ شاہو مہاراج نے چندن کی محبوب سبحانی درگاہ اور وندن کی عبدالصاحب درگاہ کے عرس بھی شروع کیے تھے۔ اس وقت انہوں نے درگاہ سے وابستہ مسلم سپہ سالاروں کو زمینیں عطا کیں۔ ہم آج بھی اس وراثت کو بڑی محنت سے سنبھالے ہوئے ہیں۔"

ٹرسٹ کے ذریعے خدمت خلق
حضرت پیر دستگیر درگاہ ٹرسٹ 2007 میں قائم ہوا۔ شکیلہ پٹیل اس کے قانونی معاملات دیکھتی رہی ہیں اور کووِڈ کے بعد صدر بنیں۔ اب وہ شکیل ابراہیم پٹیل اور اپنے دیگر ساتھیوں کے ساتھ مل کر ٹرسٹ کی سرگرمیاں چلاتی ہیں۔

شکیلہ بتاتی ہیں، "ٹرسٹ کی آمدنی بہت زیادہ نہیں، لیکن ہم جتنا ہو سکے عوامی خدمت کرتے ہیں۔ میں نے 2015 میں اپنے خاندان اور رشتہ داروں کی مدد سے ایک تنظیم قائم کی۔ ہم شادی، علاج اور تعلیم کے شعبوں میں زیادہ سے زیادہ مالی مدد فراہم کرتے ہیں۔"

آخر میں شکیلہ پٹیل نے کہا، "ہم مدد کرتے وقت مذہب نہیں دیکھتے، صرف انسان دیکھتے ہیں۔ ہمارے مذہب میں کہا گیا ہے کہ اگر تمہارے گھر عید پر بریانی پکی ہے اور تمہارا پڑوسی، چاہے وہ کسی بھی مذہب کا ہو، بھوکا ہے، تو تمہارا یہ جشن حرام ہے۔ یہی پیغام ہمیں معاشرے میں پھیلانا ہے کہ کوئی بھوکا یا مظلوم نہ رہے۔ ہمارا ملک تبھی مضبوط بنے گا جب ہم سب مل جل کر رہیں گے۔"