.webp "پونے پولیس اور مسلم تنظیموں کا مشترکہ افطار پروگرام")
بھکتی چالک۔ پونے۔
پونے شہر ہمیشہ سے اپنی ثقافتی اور سماجی ہم آہنگی کے لیے جانا جاتا ہے۔ اسی روایت کا ایک خوبصورت منظر اس وقت دیکھنے کو ملا جب ماہ مقدس رمضان کے موقع پر یہاں دعوت افطار کا ایک مشترکہ پروگرام منعقد کیا گیا۔
اس پروگرام کو شہر کے مختلف مذاہب سے تعلق رکھنے والے شہریوں نے نہایت گرمجوشی سے سراہا۔ یہ تقریب کیمپ علاقے میں واقع اعظم کیمپس کے اسمبلی ہال کے سامنے بیڈمنٹن کورٹ میں بڑے جوش و خروش کے ساتھ منعقد ہوئی۔
یہ افطار پروگرام لشکر پولیس اسٹیشن۔ جمعیت علمائے ہند پونے اور مہاراشٹر مسلم کانفرنس کی جانب سے مشترکہ طور پر منعقد کیا گیا تھا۔ اس پروگرام کا بنیادی مقصد معاشرے میں بھائی چارہ۔ اتحاد اور باہمی ہم آہنگی کو فروغ دینا تھا۔
.webp)
اس تقریب کے پس منظر میں یہ پیغام تھا کہ ملک میں امن اور ہم آہنگی کو برقرار رکھا جائے۔ پروگرام میں مختلف مذاہب سے تعلق رکھنے والے شہری۔ سماجی کارکنان اور معزز شخصیات بڑی تعداد میں شریک ہوئیں۔ تمام شرکاء نے ایک ساتھ افطار میں حصہ لے کر سماجی اتحاد کا خوبصورت پیغام دیا۔
اس پروگرام میں پونے شہر کے پولیس کمشنر امیتیش کمار بطور مہمان خصوصی شریک ہوئے۔ ان کے ساتھ پولیس محکمہ کے کئی سینئر افسران اور مختلف شعبوں سے تعلق رکھنے والی معروف شخصیات بھی موجود تھیں۔
اس پروگرام کے انعقاد میں ایڈیشنل پولیس کمشنر منوج پاٹل۔ ڈپٹی کمشنر آف پولیس راج لکشمی شیونکر۔ اسسٹنٹ کمشنر آف پولیس سنگیتا شندے اور سینئر پولیس انسپکٹر سنتوش کھیت مالاس کا خصوصی تعاون حاصل رہا۔اس موقع پر میڈیا سے گفتگو کرتے ہوئے پولیس کمشنر امیتیش کمار نے کہا کہ وہ اس پروگرام کے انعقاد پر تمام منتظمین کا شکریہ ادا کرتے ہیں اور پوری پونے پولیس کی جانب سے سب کو رمضان کی مبارکباد پیش کرتے ہیں۔
.webp)
انہوں نے کہا کہ پولیس کی جانب سے اس طرح کے کئی پروگرام منعقد کیے جاتے ہیں اور آئندہ بھی ہوتے رہیں گے۔ انہوں نے بتایا کہ وہ شروع سے ہی شہر کے تمام مذہبی رہنماؤں کے ساتھ قریبی رابطے میں ہیں اور کوشش کی جا رہی ہے کہ پونے میں رمضان کا مہینہ پرامن اور خوشگوار ماحول میں گزرے۔پولیس کمشنر نے مشکل وقت میں پولیس پر اعتماد کرنے اور ہنگامی حالات میں تعاون کرنے پر مسلم برادری کا شکریہ ادا کیا۔ اس کے ساتھ ہی انہوں نے غیر قانونی اسمگلنگ اور منشیات کے کاروبار میں ملوث افراد کو سخت انتباہ دیتے ہوئے کہا کہ ان کے خلاف سخت کارروائی کی جائے گی۔
یہ پروگرام مہاراشٹر مسلم کانفرنس کے بانی صدر حاجی زبیر میمن اور جمعیت علمائے ہند پونے کے صدر قاری ادریس انصاری کی کوششوں سے کامیاب ہوا۔اس پروگرام میں بڑی تعداد میں شریک ہونے والے پونے کے شہریوں نے باہمی بھائی چارہ بڑھانے کا عزم کیا۔ اس افطار پروگرام کے ذریعے ملک میں امن۔ اتحاد اور ہم آہنگی کا پیغام دور دور تک پہنچا۔
.gif)
