سپنا وید

ایک ایسا ملک جہاں خاندان کی قدریں اور بزرگوں کا احترام فخر کی علامت ہیں، وہاں ایک خاموش بحران بند دروازوں کے پیچھے پنپ رہا ہے۔ ہندوستان تیزی سے عمر رسیدہ ہوتا جا رہا ہے، مگر جھریوں اور تجربے کے ساتھ لاکھوں بزرگ ایک ایسا بوجھ بھی اٹھائے ہوئے ہیں جو نظر نہیں آتا: ذہنی بیماری، جس کا کوئی ذکر نہیں کرنا چاہتا۔ہندوستان میں ذہنی صحت کے بارے میں بات چیت آخرکار جڑ پکڑنے لگی ہے۔ مشہور شخصیات اپنے ذاتی مسائل پر کھل کر بات کر رہی ہیں، کمپنیاں فلاح و بہبود کے پروگرام لا رہی ہیں، اور سوشل میڈیا تھراپی، اضطراب اور خود پر توجہ دینے سے متعلق پوسٹس سے بھرا ہوا ہے۔ نوجوان نسل کی جانب سے خاموشی توڑنا یقیناً خوش آئند ہے ۔لیکن اس بڑھتی ہوئی گفتگو کے بیچ ہمارے بزرگ اب بھی خاموش ہیں، اپنے جذباتی بوجھ تنہائی میں اٹھائے ہوئے۔

اب بھی بہت سے ہندوستان ی گھروں میں ذہنی صحت ایک ایسا موضوع ہے جس پر بات کرتے ہوئے ہچکچاہٹ محسوس ہوتی ہے، جسے بدنامی، غلط فہمی، اور بعض اوقات شرمندگی نے گھیر رکھا ہے۔ اب بھی یہ کہنا عام ہے: "کمزور مت بنو" یا "لوگ کیا کہیں گے؟"۔ اکثر جذباتی پریشانی کو توہمات سے جوڑ دیا جاتا ہے یا محض ضرورت سے زیادہ سوچنے کا نتیجہ قرار دے دیا جاتا ہے۔ اور بزرگوں کے حوالے سے تو اکثر کہہ دیا جاتا ہے: "یہ تو بڑھاپا ہے۔"

مگر اعداد و شمار کچھ اور بتاتے ہیں۔

ہندوستان ایک سنگین ذہنی صحت کے بحران سے گزر رہا ہے ۔ملک میں 19 کروڑ 70 لاکھ سے زیادہ افراد کسی نہ کسی ذہنی بیماری میں مبتلا ہیں۔ یعنی ہر دس میں سے ایک بالغ اس وقت ذہنی مسائل سے دوچار ہے، اور تقریباً 14 فیصد افراد زندگی میں کسی نہ کسی مرحلے پر ذہنی صحت کا مسئلہ جھیلتے ہیں۔ یہ صرف اعداد نہیں، بلکہ وہ انسان ہیں جو خاموشی سے اپنے دکھ سہہ رہے ہیں۔ اور ان میں سب سے زیادہ متاثر ہونے والوں میں ہمارے سینئر شہری شامل ہیں۔

ہندوستان میں 83.58 ملین یعنی 8 کروڑ 35 لاکھ سے زائد افراد 60 سال یا اس سے زیادہ عمر کے ہیں۔ ان میں سے کروڑوں بزرگ ڈپریشن، اضطراب، یا یادداشت سے متعلق امراض جیسے ڈیمینشیا جیسے مسائل سے دوچار ہیں۔ تحقیق بتاتی ہے کہ 1.7 سے 3.4 کروڑ بزرگ ذہنی صحت کی کسی نہ کسی حالت میں مبتلا ہیں۔ لیکن زیادہ تر کیسز میں یہ بیماریاں نہ صرف تشخیص سے محروم رہتی ہیں بلکہ ان کا علاج بھی نہیں ہوتا۔

یہ مسئلہ بزرگوں کے لیے مخصوص گھروں، جیسے اولڈ ایج ہومز میں خاص طور پر شدید ہے۔ ایک تحقیق کے مطابق وہاں کے 64.4 فیصد رہائشی کسی نہ کسی ذہنی مسئلے سے دوچار ہیں۔ یہ ایک خاموش وبا ہے جو بند دروازوں کے پیچھے پنپ رہی ہے۔

ان میں سے کئی افراد کو ان کے خاندان چھوڑ چکے ہیں، یا وہ مجبوری میں ان گھروں میں رہنے پر مجبور ہوئے ہیں، آرام یا خوشی سے نہیں۔ یہ صرف اعداد و شمار نہیں ۔یہ ماں، باپ، دادا، نانی، ریٹائرڈ اساتذہ، فنکار اور کسان ہیں۔ وہ لوگ جنہوں نے بھرپور زندگیاں گزاری ہیں، اور اب خاموشی، تنہائی اور مایوسی سے لڑ رہے ہیں۔

ان علامات کو پہچاننا آسان نہیں۔ ایک بزرگ جو خاموش ہو جائے، ایک دادی اماں جو نام بھولنے لگیں، یا وہ شخص جسے اب کسی چیز میں دلچسپی نہیں رہی ۔یہ صرف بڑھاپے کی علامت نہیں، بلکہ ڈپریشن یا یادداشت کی بیماریوں کی علامات ہو سکتی ہیں۔

بدقسمتی سے اکثر خاندان یا تو ان علامات کو پہچانتے نہیں، یا بدتر یہ کہ نظر انداز کر دیتے ہیں۔ ذہنی صحت پر گفتگو پہلے ہی مشکل ہے، اور جب اس میں نسلی فرق، معاشرتی رویے اور آگاہی کی کمی شامل ہو جائے تو نتیجہ یہ ہوتا ہے کہ ان گنت بزرگ تنہائی میں جیتے ہیں ۔جسمانی طور پر موجود، مگر جذباتی طور پر گویا غائب۔

بزرگ افراد ذہنی صحت کے مسائل کے لیے زیادہ حساس کیوں ہوتے ہیں؟ اس کی کئی وجوہات ہیں: تنہائی، شریک حیات کی موت، مالی عدم تحفظ، مسلسل جسمانی بیماری، اور یہ دردناک احساس کہ وہ دوسروں پر بوجھ بن چکے ہیں۔ کچھ بزرگ اپنے بچوں کے ساتھ رہتے ہیں، لیکن وہ خاندان بھی اپنی روزمرہ کی مصروفیات اور دباؤ سے اتنے تھکے ہوتے ہیں کہ حقیقی تعلق یا توجہ کی گنجائش باقی نہیں رہتی۔

بہت سے بزرگ اکیلے رہتے ہیں، اور خود ہی اپنی صحت اور گھر کو سنبھالتے ہیں۔ اور ہاں، بزرگوں کے ساتھ بدسلوکی ۔چاہے وہ جذباتی ہو، زبانی ہو یا جسمانی ۔اب بھی کئی گھروں کی تکلیف دہ حقیقت ہے۔

مزید یہ کہ، ہندوستان میں تربیت یافتہ بزرگوں کے لیے مخصوص ذہنی صحت کے ماہرین کی شدید کمی ہے۔ ذہنی صحت کو عموماً بزرگوں کی عام صحت کے معائنے کا حصہ نہیں سمجھا جاتا۔ اکثر اسپتالوں میں جب تک کوئی سنگین ایمرجنسی نہ ہو، کوئی یہ نہیں پوچھتا کہ بزرگ مریض جذباتی طور پر کیسا محسوس کر رہا ہے۔ نوجوان نسل کو جہاں آن لائن تھراپی اور سپورٹ گروپس تک آسان رسائی حاصل ہے، وہیں بزرگ افراد کے پاس نہ تو وہ ڈیجیٹل صلاحیتیں ہوتی ہیں اور نہ ہی اعتماد کہ وہ ان ذرائع سے مدد حاصل کریں۔

تو سوال یہ ہے: آگے کیا کیا جائے؟

سب سے پہلے: ہمیں بات کرنی ہوگی۔ اپنے گھروں کے بزرگوں سے بات شروع کریں۔ صرف گھٹنوں یا بلڈ پریشر کے بارے میں نہ پوچھیں، بلکہ یہ بھی پوچھیں: "آپ کیسا محسوس کرتے ہیں؟ آپ کس بارے میں سوچتے ہیں؟ آپ کو کس بات کا ڈر ہے؟" بعض اوقات صرف سن لینا ہی بہت بڑی مدد بن سکتا ہے۔

دوسری بات: صحت کے نظام کو بہتر بنانے کی ضرورت ہے۔ ہر بزرگ کے چیک اپ میں ذہنی صحت کی اسکریننگ لازمی ہونی چاہیے۔ ڈاکٹروں اور دیکھ بھال کرنے والوں کو یہ سکھایا جانا چاہیے کہ وہ ان علامات کو پہچانیں۔ حکومت کو بزرگوں کے لیے مخصوص ذہنی صحت کے پروگراموں میں سرمایہ کاری کرنی چاہیے ۔یہ صرف اضافی منصوبہ نہ ہو بلکہ عوامی صحت کی پالیسی کا بنیادی حصہ بنے۔

کمیونٹی سینٹرز، بزرگوں کے کلب، اور یہاں تک کہ مندر بھی ایسے محفوظ مقامات بن سکتے ہیں جہاں لوگ جذباتی سکون اور تعلق محسوس کریں۔ جو این جی اوز پہلے ہی بزرگوں کی خدمت کر رہی ہیں، انہیں جذباتی فلاح پر بھی توجہ دینی چاہیے۔ چھوٹے اقدامات جیسے فون پر حال چال، کہانیوں کی محفلیں، یا غم بانٹنے کے حلقے ۔ یہ سب بہت بڑا فرق ڈال سکتے ہیں۔اور سب سے بڑھ کر ہمیں یہ سوچنے کا انداز بدلنا ہوگا کہ بڑھاپا کیا ہے۔ عمر کا بڑھنا کسی کے پیچھے ہٹ جانے یا نظر انداز ہونے کا وقت نہیں، بلکہ عزت، سکون، اور جذباتی اطمینان کا دور ہونا چاہیے ۔نہ کہ خاموش اذیت کا۔ذہنی صحت صرف نوجوانوں کا مسئلہ نہیں ۔یہ ہم سب پر اثر انداز ہوتی ہے۔ اور ہمارے وہ بزرگ، جنہوں نے ساری زندگی دوسروں کی خدمت کی، انہیں یہ جنگ اکیلا نہیں لڑنی چاہیے۔