اگرتلہ: افطار کی تقسیم صرف کھانا بانٹنے تک محدود نہیں ہوتی بلکہ یہ باہمی احترام اور مذہبی ہم آہنگی کا پیغام بھی دیتی ہے۔ اسی روایت کو برقرار رکھتے ہوئے گزشتہ 30 برسوں کی طرح اس سال بھی رکن اسمبلی سدیپ رائے برمن نے اگرتلہ اسمبلی حلقہ کی مختلف مساجد میں جا کر خود روزہ داروں میں افطار تقسیم کی۔

ہفتہ کے روز راجدھانی اگرتلہ کے بھاٹی ابھے نگر کے بزرگ شہری روہت میا نے رکن اسمبلی سدیپ رائے برمن سے افطار حاصل کرنے اور مبارکباد لینے کے بعد اپنے تاثرات کا اظہار کیا۔ اس موقع پر رکن اسمبلی نے بھاٹی ابھے نگر علاقے میں تقریباً 1200 افراد میں افطار تقسیم کی۔ وہ خود اس پروگرام میں موجود رہے اور پارٹی کارکنوں کے ساتھ مل کر روزہ داروں کو افطاری پیش کی۔

اس دوران انہوں نے فورکانیہ مدرسہ کے طلبہ اساتذہ اور مقامی لوگوں میں مٹھائی اور ناشتے کے پیکٹ افطار کے طور پر تقسیم کیے۔ اس پروگرام میں ہندو اور مسلم دونوں برادریوں کے افراد نے شرکت کی اور بڑی تعداد میں روزہ دار بھی موجود رہے۔

رکن اسمبلی سدیپ رائے برمن نے کہا کہ وہ 1993 سے رمضان المبارک کے مقدس مہینے میں علاقے کے مسلمان باشندوں کے ساتھ افطار کی اس روایت کو جاری رکھے ہوئے ہیں۔ انہوں نے بتایا کہ وہ ہر سال مساجد مدارس اور پنجی خانوں میں جا کر افطار تقسیم کرتے ہیں۔

انہوں نے کہا کہ اس بابرکت مہینے میں مسلمان دن بھر روزہ رکھتے ہیں اور پانی تک نہیں پیتے۔ شام کو اذان کے بعد وضو کر کے جب وہ افطار کرتے ہیں تو ہم بھی اس روحانی ماحول میں شریک ہونے کی کوشش کرتے ہیں۔

انہوں نے رمضان المبارک اور آنے والی عید کے موقع پر مذہب اور ذات پات سے بالاتر ہو کر سبھی لوگوں کو مبارکباد پیش کی۔ مقامی مسلم باشندوں نے بھی رکن اسمبلی کے اس اقدام کو سراہا۔ علاقے کے ایک رہائشی روہت میا نے کہا کہ ہمارے رکن اسمبلی گزشتہ 30 برس سے اس روایت کو برقرار رکھے ہوئے ہیں۔ افطار تقسیم کر کے وہ ہم سے اپنی محبت اور تعلق کا اظہار کرتے ہیں۔ انہوں نے کہا کہ محبت اور ہم آہنگی کا یہ رشتہ اللہ کی ایک خاص نعمت ہے۔