آواز بیرو : تروچیراپلی میں انسانیت اور بھائی چارے کی ایک منفرد مثال قائم کرتے ہوئے ایک ہندو ماں نے رمضان المبارک کے دوران مسلم طلبہ کے لیے سحری تیار کرنے کو اپنی محبت بھری خدمت بنا لیا ہے۔ جے کے نگر خجامالائی کے قریب واقع سیلوی راجیشوری کے گھر سے ہر رات آٹھ بجے کے بعد گھی اور مصالحوں کی خوشبو پھیلنے لگتی ہے۔ جب شہر نیند کی تیاری کر رہا ہوتا ہے تو راجیشوری بڑے برتن چولہے پر رکھ کر پیاز کاٹتی ہیں چاول دھوتی ہیں اور دیگ میں پکانے کا انتظام کرتی ہیں۔ ہندو ہونے کے باوجود وہ آج رمضان کی روایت کا اہم حصہ بن چکی ہیں۔

گزشتہ کئی برسوں سے وہ ان مسلم طلبہ کے لیے سحری کی تیاری میں مدد کر رہی ہیں جو مختلف ہاسٹلوں میں مقیم ہیں اور خود کھانا نہیں بنا سکتے۔ اس خدمت کا آغاز ان کے کرایہ دار پروفیسر معین الدین عبدالقادر نے کیا تھا۔ وہ بیرون شہر سے آنے والے طلبہ کی مشکلات دیکھ کر متاثر ہوئے اور خود کھانا پکا کر مفت تقسیم کرنا شروع کیا۔ جو کام ابتدا میں ایک چھوٹی سی کوشش تھا وہ آج روزانہ ایک سو سے دو سو طلبہ تک پہنچنے والی بڑی خدمت میں بدل چکا ہے۔

راجیشوری اس پورے عمل میں مرکزی کردار ادا کرتی ہیں۔ پیاز چھیلنے سے لے کر چولہا جلانے اور کھانے کے پیکٹ تیار کرنے تک وہ معین الدین اور ان کی والدہ فاطمہ کے ساتھ برابر شریک رہتی ہیں۔ گھی چاول کسکا سبزی بریانی دال چاول اور ٹماٹر رائس کے ساتھ ابلے ہوئے انڈے بھی تقسیم کیے جاتے ہیں۔

میڈیا سے گفتگو کرتے ہوئے راجیشوری کہتی ہیں کہ فاطمہ اور ان کے بیٹے روزہ دار طلبہ کے لیے سحری تیار کرتے ہیں اور وہ ہر رات آٹھ بجے سے ان کی مدد کرتی ہیں۔ ان کا کہنا ہے کہ وہ ذات اور مذہب دیکھے بغیر انسانیت کی خدمت کرنا چاہتی ہیں اور اس سے انہیں دلی سکون ملتا ہے۔

तामिळनाडूमध्ये हिंदू माऊलीकडून मुस्लिम विद्यार्थ्यांसाठी 'सेहरी'ची मेजवानी#TamilNadu #Hindu #Muslim #Unity #student #hindumuslim #unityindiversity #food #mealsforkids #religious #Harmony #Brotherhood #awazmarathi pic.twitter.com/gRlq4GZV5e

— Awaz - The Voice मराठी (@awaz_marathi) February 25, 2026

رات گیارہ بجے تک کھانے کے پیکٹ تیار ہو جاتے ہیں جس کے بعد معین الدین پچاس کلومیٹر کے دائرے میں کے کے نگر سبرا منی اپورم اور سیتھو راپتی جیسے علاقوں کے سرکاری اور نجی کالجوں کے ہاسٹلوں تک یہ پیکٹ پہنچاتے ہیں۔ یہ خدمت صبح چار بجے تک جاری رہتی ہے۔ اخراجات دوستوں اور فلاحی اداروں کے تعاون سے پورے کیے جاتے ہیں تاہم راجیشوری کی شمولیت نے اس پہل کو خاص توجہ دلائی ہے۔ وہ سادگی سے کہتی ہیں کہ انہیں اپنا کام پسند ہے اور اس سے اطمینان حاصل ہوتا ہے۔

جامعہ انوار العلوم عربک کالج کے استاد این معین الدین عبدالقادر اور ان کی ٹیم نے انیس فروری سے شروع ہونے والے رمضان کے بعد سے روزانہ رات گیارہ بجے سے صبح ساڑھے چار بجے تک یہ خدمت جاری رکھی ہے۔ سحری کے لیے رجسٹریشن دوپہر تک کی جاتی ہے اور یہ تمام تیاری اس جگہ پر ہوتی ہے جو راجیشوری نے مفت فراہم کی ہے۔

یہ سفر جو کووڈ انیس کے دوران شروع ہوا تھا آج بھی تسلسل کے ساتھ جاری ہے۔ راجیشوری کے کچن میں جس طرح مصالحے گھل مل جاتے ہیں اسی طرح مذاہب بھی باہم شیر و شکر نظر آتے ہیں۔ تروچیراپلی کے طلبہ کے لیے ہر رمضان یہ گرم کھانا بڑی سہارا بن جاتا ہے اور ان پیکٹوں کے ذریعے ایک ماں کی شفقت ہر طالب علم تک پہنچتی ہے۔