ٹورنٹو:  فیفا فٹ بال ورلڈ کپ 2026 کے دوسرے دن کے پہلے میچ میں میزبان کینیڈا اور بوسنیا و ہرزیگووینا کی ٹیموں کے درمیان دلچسپ مقابلہ ایک ایک گول سے برابر رہا۔

ٹورنٹو کے بھرپور تماشائیوں سے کھچا کھچ بھرے اسٹیڈیم میں کھیلے گئے میچ میں کینیڈا نے آغاز ہی سے جارحانہ انداز اپنایا اور حریف دفاع پر مسلسل دباؤ برقرار رکھا۔ تاہم ابتدائی حملوں کے باوجود پہلا گول بوسنیا کی جانب سے اسکور کیا گیا۔

میچ کے 21ویں منٹ میں بوسنیا کے فارورڈ جووو لوکچ نے عمدہ موقع سے فائدہ اٹھاتے ہوئے گیند کو جال کی راہ دکھائی اور اپنی ٹیم کو ایک صفر کی برتری دلادی۔ اس گول کے بعد بوسنیا نے دفاعی حکمت عملی اختیار کرتے ہوئے کینیڈا کے حملوں کو ناکام بنانے کی کوشش کی۔

پہلے ہاف کے اختتام تک بوسنیا کو ایک صفر کی سبقت حاصل رہی جبکہ میزبان ٹیم متعدد مواقع پیدا کرنے کے باوجود گول کرنے میں کامیاب نہ ہو سکی۔

دوسرے ہاف میں کینیڈا نے مزید جارحانہ کھیل پیش کیا اور برابر ی کے گول کے لیے مسلسل کوششیں جاری رکھیں۔ کینیڈین کھلاڑیوں نے کئی خطرناک حملے کیے لیکن بوسنیا کے دفاع اور گول کیپر نے شاندار کارکردگی کا مظاہرہ کرتے ہوئے اپنی ٹیم کی برتری برقرار رکھی۔

بالآخر 79ویں منٹ میں کینیڈا کی محنت رنگ لے آئی جب گائل نے ایک زبردست کک کے ذریعے گیند کو جال میں پہنچا کر مقابلہ ایک ایک گول سے برابر کر دیا۔ اس گول کے بعد اسٹیڈیم میں موجود شائقین خوشی سے جھوم اٹھے اور میزبان ٹیم کو فتح دلانے کے لیے بھرپور حوصلہ افزائی کرتے رہے۔

میچ کے آخری لمحات میں دونوں ٹیموں نے فیصلہ کن گول کرنے کی کوشش کی لیکن مضبوط دفاع اور چند ضائع شدہ مواقع کے باعث کوئی بھی ٹیم دوبارہ اسکور نہ کر سکی۔

یوں مقررہ وقت کے اختتام پر کینیڈا اور بوسنیا و ہرزیگووینا کے درمیان مقابلہ ایک ایک گول سے برابر ختم ہوا اور دونوں ٹیموں نے ایک ایک پوائنٹ حاصل کر لیا۔