میامی: سعودی عرب کی قومی فٹبال ٹیم نے فیفا ورلڈ کپ 2026 میں اپنے سفر کا آغاز ایک حوصلہ افزا ڈرا کے ساتھ کیا۔ گروپ مرحلے کے اپنے پہلے میچ میں گرین فالکنز نے مضبوط حریف یوراگوئے کے خلاف 1-1 سے برابر مقابلہ کھیل کر ایک قیمتی پوائنٹ حاصل کر لیا۔

اس نتیجے کے بعد گروپ کی چاروں ٹیموں کے ایک، ایک پوائنٹ ہو گئے ہیں، جس سے گروپ میں مقابلہ مزید دلچسپ ہو گیا ہے۔

سعودی وقت کے مطابق منگل کی شب ایک بجے شروع ہونے والے اس میچ کی میزبانی میامی اسٹیڈیم نے کی، جہاں سعودی شائقین کی بڑی تعداد اپنی ٹیم کی حوصلہ افزائی کے لیے موجود تھی۔ اسٹیڈیم میں شاندار ماحول دیکھنے میں آیا اور گرین فالکنز کے حق میں نعروں کی گونج سنائی دیتی رہی۔

سعودی وزیر کھیل شہزادہ عبدالعزیز بن ترکی الفیصل بھی قومی ٹیم کی حمایت کے لیے اسٹیڈیم میں موجود تھے۔ آفیشل اعداد و شمار کے مطابق میچ کو 62 ہزار 764 تماشائیوں نے براہ راست دیکھا۔

پہلے ہاف میں سعودی ٹیم نے عمدہ کھیل کا مظاہرہ کیا اور 40ویں منٹ میں عبداللہ العمری نے گول کرکے اپنی ٹیم کو برتری دلائی۔ یہ گول اس وقت ہوا جب مڈفیلڈر محمد کنو کی زوردار کوشش کو یوراگوئے کے تجربہ کار گول کیپر فرنینڈو مسلیرا نے روک لیا، تاہم ریباؤنڈ پر عبداللہ العمری نے فوری ردعمل دکھاتے ہوئے گیند کو جال میں پہنچا دیا۔

دوسرے ہاف میں سعودی ٹیم نے اپنی برتری برقرار رکھنے کے لیے بھرپور دفاعی کھیل پیش کیا۔ گول کیپر محمد العویس نے کئی یقینی گول بچا کر اپنی صلاحیتوں کا لوہا منوایا، تاہم 80ویں منٹ میں یوراگوئے کے میکسمیلیان آراؤخو نے گول کرکے مقابلہ 1-1 سے برابر کر دیا۔

اس ڈرا کے باوجود سعودی ٹیم کی کارکردگی کو شائقین اور مبصرین نے سراہا، خصوصاً دفاعی نظم و ضبط اور اجتماعی کھیل کو ٹیم کی بڑی کامیابی قرار دیا جا رہا ہے۔

یہ گول ورلڈ کپ کی تاریخ میں سعودی عرب کا مجموعی طور پر 15واں گول تھا۔ عرب ممالک میں ورلڈ کپ میں سب سے زیادہ گول کرنے کا اعزاز اب بھی مراکش کے پاس ہے، جس نے مجموعی طور پر 21 گول کیے ہیں، جبکہ سعودی عرب 15 گول کے ساتھ تیونس کے برابر دوسرے نمبر پر آ گیا ہے۔

مزید برآں، سعودی ٹیم نے اپنی ورلڈ کپ تاریخ میں صرف دوسری مرتبہ پہلے ہاف میں پہلا گول اسکور کیا ہے۔ اس سے قبل 1994 کے ورلڈ کپ میں سعید العویران نے بیلجیئم کے خلاف تاریخی مقابلے میں پہلا گول کیا تھا، جو آج بھی سعودی فٹبال کی یادگار ترین لمحات میں شمار ہوتا ہے۔

میچ میں سعودی عرب کی نمائندگی محمد العویس (گول کیپر)، سعود عبدالحمید، حسان التمبکتی، عبداللہ العمری، متعب الحربی، محمد کنو، عبداللہ الخیبری، مصعب الجویر، محمد ابو الشامات، سالم الدوسری (کپتان) اور فراس البریکان نے کی۔

افتتاحی میچ سے قبل سعودی قومی ٹیم کے کھلاڑیوں نے دو مرتبہ کی عالمی چیمپیئن یوراگوئے کے خلاف بھرپور تیاری اور مضبوط کارکردگی کے عزم کا اظہار کیا تھا، اور میدان میں ان کی کارکردگی نے ثابت کیا کہ گرین فالکنز اس ورلڈ کپ میں کسی بھی حریف کے لیے آسان شکار ثابت نہیں ہوں گے۔